သျှမ်းပြည် ကျောက်မဲခရိုင်အတွင်း စစ်ကောင်စီတပ်မှ လက်နက်ကြီးဖြင့် ရမ်းသမ်းပစ်ခတ်မှုကြောင့် ကျောက်မဲမြို့တွင် အရပ်သား ၁ ဦး သေဆုံးပြီး ၊နောင်ပိန်တိုက်နယ်၌ နေအိမ် ၁၀ လုံးကျော် ထိခိုက်ပျက်စီးခဲ့ကြောင်း စုံစမ်းသိရသည်။

ကျောက်မဲမြို့အခြေစိုက် စစ်ကောင်စီတပ် ခမရ-၅၀၂ နှင့် တအာင်း(ပလောင်) TNLA တပ်ဖွဲ့တို့မှ ယမန်နေ့ (နိုဝင်ဘာ ၁၄ ရက်) နေ့လည် ၁ နာရီဝန်းကျင်တွင် လက်နက်ကြီးဖြင့် အပြန်အလှန် ပစ်ခတ်တိုက်ခိုက်ခဲ့ရာ ပြည်သူနေထိုင်ရာ ကျေးရွာအတွင်းသို့ ကျရောက်ပြီး အသက် ၄၀ အရွယ်ရှိ စိုင်းထွန်းကျော် ဆိုသူ အမျိုးသား ၁ ဦး ထိမှန်သေဆုံးသွားခဲ့ကြောင်း ကျောက်မဲဒေသခံများက ပြောသည်။

“လက်နက်ကြီးကတော့ နေရာတိုင်းကို ကျနေတာပဲ၊ ပါပုတ်၊ ပြိန်းခါး၊ နောင်ပိန်၊ နောင်ပစ်ဘက်တွေလဲ ကျတယ်။ ဘယ်လိုမှ ပြောလို့မရတော့ဘူး။ မနေ့ နေ့လယ်က မိုင်းငေါ့သွားတဲ့ဘက်က လွယ်ခွင်တောင်ဘက်လဲ ကျတာ။ အသက် ၄၀ အရွယ် အမျိုးသားတစ်ဦးကို မှန်တာ၊ ခြေထောက်နဲ့ ရင်ဘက်ကိုထိပြီး ဆုံးသွားတယ်”ဟု ကျောက်မဲမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

ယနေ့ (နိုဝင်ဘာ ၁၅ ရက်) နေ့လည် ၁၂ နာရီခန့်ကလည်း စစ်ကောင်စီတပ်မှ နောင်ပိန်ဂုတ်တွင်းအနီး စခန်းချထားသည့် TNLA နှင့် မန္တလေး-PDF ပူးပေါင်းတပ်ဖွဲ့အား Mi-35 တိုက်လေယာဉ် ၂ စီးဖြင့် တပြိုင်တည်း ဗုံးကြဲတိုက်ခိုက်ခဲ့ရာ ဇီးပင်စခန်း၊ ခေါက်ခက်၊ ပင်တီး၊ ပင်တိန်ကျေးရွာတို့မှ ပြည်သူနေအိမ် ၁၀ လုံးကျော် ထိခိုက်ပျက်စီးသွားကြောင်း နောင်ပိန်ဒေသခံများထံမှ သိရသည်။

“ဒီနေ့လယ် ၁၂ နာရီလောက်က စစ်တပ်က နောင်ပိန်ဂုတ်တွင်းတဝိုက်ကို Mi-35 တိုက်လေယာဉ် ၂ စီးနဲ့ ပြိုင်တူ ဗုံးလာကြဲတာ၊ အခုဗုံးကျတဲ့နေရာက တရုတ်ပိုက်လိုင်းရဲ့ ဓာတ်ငွေ့တွန်းအားပေးတဲ့ စခန်းနားမှာ ကျတာဆိုတော့ သူ့ကိုထိလား မထိလား သေချာမသိသေးဘူး၊ ဘေးနားက ဧဒင်စားသောက်ဆိုင်နဲ့ ၁၀ အိမ်လောက်တော့ ဗုံးမှန်ပြီး ပျက်စီးသွားတယ်”ဟု ကျောက်မဲမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီ တိုက်လေယာဉ်မှ ယခုကျဲချသည့်ဗုံးသည် နောင်ပိန် ဇီးပင်စခန်းနှင့် ပင်တီးအကြားရှိ မြန်မာ-တရုတ် သဘာဝဓာတ်ငွေ့ပိုင်းလိုင်း၏ ဓာတ်အားတွန်းပို့ရုံအနီး ကျရောက်ပေါက်ကွဲခဲ့ခြင်းဖြစ်ပြီး ထိခိုက်ပျက်စီးမှုကို သျှမ်းသံတော်ဆင့်မှ ဆက်လက်စုံစမ်းနေသည်။

ထို့အပြင် ယမန်နေ့ (နိုဝင်ဘာ ၁၄ ရက်)ကလည်း သီပေါမြို့နယ် ကျင်သီကျေးရွာတွင်လည်း စစ်ကောင်စီတပ် ခလရ-၂၃ မှ ရမ်းသမ်းပစ်ခတ်လာသည့် လက်နက်ကြီးကြောင့် ပြည်သူနေအိမ် ၂ လုံး ထိခိုက်ပျက်စီးခဲ့ပြီး ဘုန်းကြီးကျောင်းမုခ်ဦးနှင့် မီးတိုင်များလဲ ပျက်စီးသွားကြောင်း သိရသည်။

လက်ရှိအချိန်တွင် ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသော စစ်ကား ၄၀ စီးကျော်နှင့် သံချပ်ကာယာဉ် ၄ စီးတို့သည် ကျောက်မဲ၊ သီပေါ၊ လားရှိုးမြို့များသို့ ချီတက်နိုင်ရန်အတွက် စစ်ကောင်စီတပ်မှ ဂုတ်တွင်းလမ်းပိုင်းကို အစွမ်းကုန် ထိုးဖောက်လျက်ရှိရာ TNLA နှင့် မန္တလေး-PDF ပူးပေါင်းတပ်ဖွဲ့တို့နှင့် တိုက်ပွဲပြင်းထန်နေသည်။

နောင်ချို-ကျောက်မဲကြားရှိ ဂုတ်တွင်းလမ်းပိုင်းတွင် ယခုဖြစ်ပွားနေသော တိုက်ပွဲများကြောင့် နောင်ပိန်တိုက်နယ်အတွင်း စစ်ဘေးရှောင်ဦးရေ ၁၅၀၀ ကျော်သည် အောင်ဓမ္မာရုံ၊ ပုဗ္ဗာရုံ၊ ကုန်းညောင်၊ ထန်းတပင်၊ ဖီတစ်ခေးနင်း၊ လွယ်ကုံ စသည့် နီးစပ်ရာ ကျေးရွာဘုန်းကြီးကျောင်းများတွင် ထွက်ပြေးတိမ်းရှောင်နေရကြောင်း သိရသည်။