သျှမ်းပြည် မူဆယ်ခရိုင် ပန်ဆိုင်းမြို့မှ စစ်ကောင်စီ တပ်သားများသည် စစ်ရှောင်များ၏ နေအိမ်များထဲသို့ ဝင်ရောက်မွှေနှောက်ပြီး အဝတ် နှင့် စားစရာများကို ယူဆောင် စားသောက်နေကြကြောင်း စုံစမ်းသိရသည်။

ပန်ဆိုင်းမြို့ရှိ စစ်ကောင်စီ ခြေမြန်တပ်ရင်း အမှတ် (၅၂၅) မှ တပ်သားများသည် တပ်မှ ဆုတ်ခွာပြီး အရပ်ဝတ်ပြောင်းကာ ပြည်သူများနှင့် ရောနှောနေထိုင်နေကြပြီး၊ ပြည်သူများ၏ နေအိမ်ကို ဝင်ရောက်မွှေနှောက်ကာ အဝတ်များ အစားများယူစားနေကြကြောင်း ပန်ဆိုင်းမြို့နေ မျက်မြင်တွေ့ရှိသည့် အမျိုးသားတစ်ဦးက သျှမ်းသံတော်ဆင့်ကိုပြောသည်။

“သူတို့တပ်ကုန်းစခန်းကို မဟာမိတ်တွေ လာတိုက်ကတည်းက အဲ့တပ်မှာ ဘယ်စစ်သားမှ မနေကြတော့ဘူး၊ ခဏတဖြုတ်လာလည်း မဟာမိတ်တွေရဲ့ ဗုံးကြဲတိုက်ခိုက်တာ ခံရတယ်။ အဲ့ကြောင့် သူတို့က အရပ်ဝတ်ပြောင်းပြီး၊ ပြည်သူဆီက အစားအသောက် တွေ ယူနေပြီး ပြည်သူကြားမှာ နေနေတာ” ဟု မြေပြင် သတင်းရင်းမြစ် အမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ စစ်ကောင်စီ တပ်သားများသည် ပန်ဆိုင်းမြို့ နှင့် တရုတ်ပြည် ခြားထားသည့် နမ့်ယန်းချောင်းတစ်လျှောက် သွားလာနေထိုင်ကြပြီး ၊ အရပ်သားများထံမှ အဝတ်အထည် များ၊ အစားအသောက်များကိုလည်း လုယူစားသုံးနေကြောင်းလည်း သိရသည်။

စစ်ကောင်စီ တပ်သားများမှ ယင်းကဲ့သို့ အရပ်သားများ နှင့် ရောနှောနေထိုင်ကြသည့်အတွက် ဒေသခံများက လုံခြုံရေး အတွက် စိုးရိမ်ကြောက်လန့်နေရကြောင်းလည်း အသက် ၄၀ ကျော် အမျိုးသမီးက သျှမ်းသံတော်ဆင့်ကို ပြောသည်။