သီပေါ-ကျောက်မဲကြားရှိ ကျင်သီတံတား ပျက်စီးမှုကြောင့် မွေးလူနာနှင့် ဆေးကုသမည့်သူများ သွားလာမှု အခက်အခဲရှိကြောင်း စုံစမ်းသိရသည်။
သျှမ်းပြည် သီပေါ-ကျောက်မဲ ကြားရှိ ကျင်သီတံတား ပျက်စီးမှုကြောင့် ကားများသွားလာ၍ မရသဖြင့် အရေးပေါ် လူနာများ၊မွေးလူနာများ အတွက် အခက်အခဲများ ဖြစ်နေကြောင်း ဘော်ကြို ပရဟိတ လူမှုကူညီရေး အသင်း တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“လူနာတွေဆိုရင်တော့ သီပေါကနေပြီး ကျောက်မဲ ဖက်ပို့မယ်ဆိုရင်တော့ ကျနော်တို့က ပရဟိတအသင်းကနေပဲ ထက်ဆင့် သယ်ပေးလိုက်တာပေါ့။အဲ့နားရောက်ရင် ကျောက်မဲ အဖွဲ့ကနေပဲ ပြန်သယ်တာပေါ့။မွေးလူနာတွေ ကတော့ တကယ်လို့ အဆင်မပြေရင် စက်လှေနဲ့ပဲ တဆင့် ပြန်သယ်ရမယ်။ အတက်၊အဆင်းကတော့ ဘယ်လိုမှ အဆင်မပြေဘူးလေ” ဟု ဘော်ကြို ပရဟိတ လူမှုကူညီရေး အသင်း တာဝန်ရှိသူတစ်ဦးကပြောသည်။
တံတားပျက်စီးမှုကြောင့် ကား၊ဆိုင်ကယ်များသွားလာလို့ မရကြောင်း၊ဆိုင်ကယ်များကို ရွာသားများဖြင့် ဝိုင်းဝန်း မ ကူ၍ သွားလာနေတာကြောင့် လက်ရှိတွင် ဖြတ်သန်းသွားလာမှု မရှိကြောင်း ဒေသခံများက ပြောသည်။
ကျောက်မဲမြို့နှင့် သီပေါ ဘော်ကြို ကြားရှိ ကျင်သီတံတားကို (နိုဝင်ဘာ ၁၂ ရက်) တွင် TNLA တပ်ဖွဲ့က ဗုံးခွဲဖျက်ဆီးထာပြီး တံတားအခန်း ၁ ခန်း ပဲ့ကျမှုကြောင့် သွားလာ၍ မရတော့ကြောင်း သီပေါ်မြို့ ဒေသခံများက ပြောသည်။