သျှမ်းပြည် မူဆယ်ခရိုင်၊ ပန်ဆိုင်းမြို့ရှိ စစ်ကောင်စီ၏ အမှတ် (၅၂၅) ခြေမြန် တပ်ရင်း တပ်ကုန်းစခန်းကို ညီနောင် မဟာမိတ် တပ်ဖွဲ့က ဒရုန်းဖြင့် တိုက်ခိုက်ခံရကြောင်း စုံစမ်းသိရသည်။
ယမန်နေ့ နိုဝင်ဘာလ (၁၃) ရက် ည (၉) နာရီ ဝန်းကျင် အချိန်တွင် ပန်ဆိုင်းမြို့ နမ့်ဟူးကျေးရွာ အနီးရှိ စစ်ကောင်စီတပ် အမှတ် (၅၂၅) ကို ညီနောင်မဟာမိတ်တပ်ဖွဲ့က ဒရုန်းဖြင့် တိုက်ခိုက်ခံရကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကိုပြောသည်။
“အသံက ၆ ချက်ကြားရပါတယ်။ အဲ့တပ်ကုန်းကလည်း စစ်သားတွေ မနေတော့ပါဘူး၊ ဟိုတခေါက် လာတိုက်ကတည်းက အဲ့တပ်ဆုတ်ထားတာလေ။ ဒါပေမယ့် မနေ့ညက သူတို့ပြန်လာအိပ်တဲ့သတင်းကြားလို့ ဒရုန်းနဲ့ တိုက်တာ” ဟု ပန်ဆိုင်းမြို့ခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
အဆိုပါ ဒရုန်းဖြင့် တိုက်ခိုက်မှုကြောင့် စစ်ကောင်စီတပ်စခန်း အပြင် နမ့်ဟူးကျေးရွာရှိ ဘုန်းကြီးကျောင်းဆောင် နှင့် အနီးပတ်ဝန်းကျင်ရှိ အဆောက်အအုံ အချို့လည်း ထိခိုက်ပျက်စီးရကြောင်း အထက်ပါ အမျိုးသားက ဆက်ပြောသည်။
“ရွာ နဲ့ အဲ့ တပ်ကုန်းကလည်း နီးတယ်။ ဘုန်းကြီးကျောင်းက မှန်ပြတင်းပေါက်တွေကွဲတယ်၊ အိမ်ခေါင်မိုး တချို့လည်း ကျဥ်စတွေ လာမှန်တယ်တဲ့၊ သွပ်တွေပေါက်သွားတာပေါ့” ဟု အထက်ပါအမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် နိုဝင်ဘာ ၁ ရက်တွင်လည်း ပန်ဆိုင်းမြို့ (ကြူဂုတ်) ရပ်ကွက် ၈ အတွင်းရှိ စစ်ကောင်စီ ရဲစခန်းအနီး၌ လက်နက်ကြီး ကျရောက်ပေါက်ကွဲမှုကြောင့် အမျိုးသား တစ်ဦး သေဆုံးကာ အမျိုးသမီး တစ်ဦး ထိခိုက်ဒဏ်ရာရရှိခဲ့သည်။
အလားတူ ယမန်နေ့ (အောက်တိုဘာ ၃၁ ရက်) တွင်လည်း ပန်ဆိုင်းမြို့ (ကြူဂုတ်) ရှိ ရဲစခန်းကို ညီနောင်မဟာမိတ်တို့က ဝင်ရောက်တိုက်ခိုက်ခဲ့သည်။
တိုက်ပွဲဖြစ်ပွားမှုကြောင့် ပန်ဆိုင်းမြို့ ဒေသခံများလည်း စစ်ဘေးတိမ်းရှောင် ထွက်ပြေးနေရပြီး လူဦးရေ ပမာဏ ကို ဆက်လက်စုံစမ်းနေဆဲဖြစ်သည်။
Leave a Comments