သျှမ်းပြည် ကျောက်မဲခရိုင် အခြေစိုက်သော စစ်ကောင်စီတပ်များမှ အနီးအနား ဝန်းကျင်ရှိ ကျေးရွာများသို့ လက်နက်ကြီးများဖြင့် ရမ်းသမ်းပစ်ခတ်နေကြောင်း စုံစမ်းသိရသည်။
ယမန်နေ့ (နိုဝင်ဘာလ ၁၃ ရက်) ည ၉ နာရီခန့်မှ စ၍ သီပေါမြို့ရှိ စစ်ကောင်စီ ခလရ-၂၃ တပ်စခန်းမှ ပြည်သူနေထိုင်ရာ ကျေးရွာဘက်သို့ လက်နက်ကြီးများဖြင့် ရမ်းသမ်းပစ်ခတ်ခဲ့ကြောင်း သီပေါဒေသခံများက ပြောသည်။
“မနေ့ညက သီပေါ ခလရ-၂၃ တပ်ထဲကနေ ပစ်လာတဲ့ လက်နက်ကြီးက နားလွယ်ရွာအနောက်ဘက် တောင်ယာခင်းထဲကို ကျတာ။ နှစ်လုံးကျတာမှာ တစ်လုံးကွဲတယ်၊ မကွဲတာ တစ်လုံးကျန်သေးတယ်။ ဒီနားလေးက နှမ်းခင်းထဲမှာလဲ နောက်ထပ် ၃ လုံး ကျကွဲသေးတယ်။ စုစုပေါင်း ၅ လုံးကျတဲ့အထဲမှာ နှစ်နေရာကျတာကို ပေ ၁၀၀ လောက်ပဲ ခြားတယ်”ဟု သီပေါမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် ယမန်နေ့ (နိုဝင်ဘာလ ၁၃ ရက်) ည ၇ နာရီဝန်းကျင်မှ စ၍ ကျောက်မဲမြို့ရှိ ခမရ-၅၀၁/၅၀၂ တပ်တို့မှ တိုက်ပွဲဖြစ်ပွားရာ ဂုတ်တွင်းနှင့် အနီးအနား ကျေးရွာများသို့ လက်နက်ကြီးဖြင့် ရမ်းသမ်းပစ်ခတ်ခဲ့ရာ ပြည်သူနေအိမ် ထိခိုက်မှုရှိကြောင်း ကျောက်မဲဒေသခံများက ပြောသည်။
“မနေ့ည ၇ နာရီလောက်က ကျောက်မဲ ၅၀၁ တပ်ကနေ ပစ်တာ။ မိုင်းတင်းဘက်က ပြိန်းခါးမှာ လက်နက်ကြီးက လယ်ထဲကျတာဆိုတော့ လူထိခိုက်မှုတော့ မရှိဘူး။ ဂုတ်တွင်းထဲမှာလဲ တိုက်ပွဲဖြစ်တဲ့ဘက်ကို ကျောက်မဲတပ်ကနေ လက်နက်ကြီးနဲ့ ပစ်တာရှိတယ်။ နောင်ပိန် ဇီးပင်စခန်းက တည်းခိုခန်းတစ်ခု ဗုံးစာမှန်ပြီး ခေါင်မိုးတွေ ပျက်စီးကုန်တယ် ပြောတယ်။ မနေ့ညက တိုက်ပွဲတွေကြောင့် နောင်ပိန်ဘက်မှာ ဖုန်းလိုင်းတွေလဲ ပျက်သွားတယ်”ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် နိုဝင်ဘာလ ၁၂ ရက်ကလည်း ကျောက်မဲမြို့နယ် ဟိုင်းပုနှင့် ကြူရှော၊ ပန်လင်ကျေးရွာတို့တွင် ပြည်သူနေအိမ်အနီးသို့ လက်နက်ကြီး ကျရောက်ပေါက်ကွဲခဲ့ရာ အိမ်နောက်ဖေးနှင့် နေအိမ်ခေါင်မိုး ထိမှန်ပျက်စီးခဲ့ကြောင်း သိရသည်။
အလားတူ နိုဝင်ဘာ ၁၂ ရက်တွင်လည်း နောင်ပိန်ဂုတ်တွင်း၌ စစ်ကောင်စီတပ်မှ ဂျက်ဖိုက်တာဖြင့် လေကြောင်းဗုံးကျဲ တိုက်ခိုက်ခြင်းကြောင့် နောင်ပိန်တိုက်နယ်အတွင်းရှိ နောင်ပစ်၊ ခဲလုံ၊ လုံကြိမ်၊ ဇီးပင်စခန်း၊ ပင်တီး၊ ပင်တိန်ကျေးရွာများမှ စစ်ဘေးရှောင် ၁၀၀၀ ကျော်သည် နီးစပ်ရာ ကျေးရွာဘုန်းကြီးကျောင်းများသို့ ထွက်ပြေးတိမ်းရှောင်နေရကြောင်း နောင်ပိန်ဒေသခံများက ပြောသည်။
ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသော စစ်ကား ၄၀ စီးကျော်နှင့် သံချပ်ကာယာဉ် ၄ စီးတို့သည် ကျောက်မဲ၊ သီပေါ၊ လားရှိုးမြို့များသို့ ချီတက်နိုင်ရန်အတွက် စစ်ကောင်စီတပ်မှ ဂုတ်တွင်းလမ်းပိုင်းကို အပြင်းအထန် ထိုးဖောက်လျက်ခဲ့သည်။
ထို နောက် TNLA တပ်ဖွဲ့မှ စစ်ကောင်စီ ထောက်ပို့လမ်းကြောင်းကို ဖြတ်တောက်နိုင်ရန်အတွက် သီပေါ ဘော်ကြိုအဝင်ရှိ ကျင်သီတံတားကို နိုဝင်ဘာ ၁၂ ရက်တွင် ဗုံးခွဲဖျက်ထားဆီးခြင်းကြောင့် တံတားထက်ပိုင်းကျိုးခဲ့သည်။
