စစ်ကောင်စီဦးစီး ကျင်းပမည့် တောင်ကြီး တန်ဆောင်တိုင်ကို 1005 Infantry က မသွားရန် သတိပေးလိုက်ကြောင်း စုံစမ်းသိရပါသည်။
သျှမ်းပြည် တောင်ကြီးမြို့တွင် စစ်ကောင်စီ ဦးစီး ကျင်းပမည့် တန်ဆောင်တိုင် ရိုးရာ မီးပုံးပျံ ပွဲတော်ကို 1005 Infantry က တန်ဆောာင်တိုင်ပွဲတော်ကို မသွားရန် နိုဝင်ဘာလ ၉ ရက်တွင် သတိပေး ကြေညာခဲ့ကြောင်း တွေ့ရသည်။
“ကျနော်တို့ကျတော့ မီပုံးပျံပညာကို ပြချင်တာဗျ၊ရိုးရာ မပျက်အောင်ပါပဲ၊နိုင်ငံရေးနှင့်တော့ ပတ်သတ်တာတခုမှ မပါဘူး၊ကိုယ့် ယမ်းပညာလေးကို အသစ်အဆန်းလေးတွေပြချင်တာပါ၊စိုးရိမ်တာကတော့ ပွဲဖြတ်မှာပဲ စိုးရိမ်တာဗျ”ဟု မီးပုံးပျံဆရာတစ်ဦးကပြောသည်။
နိုဝင်ဘာ ၂၁ ရက် မှ ၂၇ ရက်နေ့အထိ တန်ဆောင်တိုင်ပွဲတော်အား ၇ ရက်ဆက်တိုက် ကျင်းပမည် ဖြစ်ကြောင်း သိရသည်။ပွဲဈေးတန်းများ၊ဈေးဆိုင်၊လမ်းများကိုလည်း ပြုပြင်ထားပြီဖြစ်ပြီး အဆင်သင့် အနေအထားရှိ နေပြီဖြစ်ကြောင်း ဒေသခံများက သျှမ်းသံတော်ဆင့်ကို ပြောသည်။
“ကျနော်တို့ကတော့ မလည်ဘူး လည်ချင်စိတ်လည်းမရှိဘူး။ လုပ်တယ်ဆိုတာကလည်း အရင်နှစ်လောက် ပျော်ကောင်း မယ် မထင်ပါဘူး။ နိုင်ငံရေးအခြေအနေ မကောင်းတဲ့အချိန်မှာတော့ မသွားတာကောင်း ပါတယ်၊ သွားတဲ့လူတွေ ကလည်း ဝါသနာပါတဲ့လူတွေ မပျော်ရတာကြာတဲ့လူအဲ့လောက်ပဲပေါ့ကွယ်”ဟု တောင်ကြီး ဒေသခံအမျိုးသားတစ်ဦး ကပြောသည်။
ထို့အတူ တောင်ကြီးမြို့နယ်တွင် တန်ဆောင်တိုင်ပွဲတော် နီးကပ်လာသဖြင့် ပွဲတော် ကျင်းပရာ အဝေရာမီးပုံပျံ ကွင်းနားရှိ ဆိုင်ခန်း ငှားရမ်းခ ဈေးနှုန်းများမှာ နှစ်ဆနီးပါး တိုးမြင့်လာကြောင်း စျေးရောင်းချသူများထံ မှ စုံစမ်း သိရသည်။
တောင်ကြီး တန်ဆောင်တိုင်မီးပုံးပျံ ရိုးရာ ပွဲတော်ကို နိုဝင်ဘာ ၂၁ ရက် မှ ၂၇ ရက်နေ့အထိ တန်ဆောင်တိုင် ပွဲတော်အား ၇ ရက်ဆက်တိုက် ကျင်းပမည်ဖြစ်ပြီး ယခုနှစ်တွင် ညလွှတ်မီးပုံးပျံမျိုးစုံ ၆၃ လုံးအထိ လွှတ်တင်သွားမည်ဖြစ်ကြောင်း သိရသည်။
မြန်မာနိုင်ငံအဝှမ်း ကိုဗစ်ရောဂါ ပြန့်ပွားလာခဲ့သည့် ၂၀၂၀ ခုနှစ်နှင့် စစ်ကောင်စီ အာဏာသိမ်းယူခဲ့သည့် ၂၀၂၁ ခုနှစ်တို့တွင် ရိုးရာ တန်ဆောင်တိုင် မီးပုံးပျံပွဲတော်ကိုရပ်နားထားခဲ့ရပြီး ၂၀၂၂ ခုနှစ်တွင် ပွဲတော်အား ပြန်လည်ကျင်းပချိန်၌ နေ့လွှတ်မီးပုံးပျံ တမျိုးတည်းသာ ယှဉ်ပြိုင်စေခဲ့သဖြင့် စည်ကားမှုမရှိခဲ့ကြောင်း သိရသည်။
Leave a Comments