သျှမ်းပြည် ကျောက်မဲမြို့နယ် နောင်ပိန်ကျေးရွာအတွင်း နေထိုင်သည့် ပြည်သူများကို ယနေ့ (နိုဝင်ဘာ ၁၃)ရက် နံနက် ၁၁နာရီအပြီး ထွက်ပြေးတိမ်းရှောင်ရန် ညီနောင် မဟာမိတ်တပ်ဖွဲ့က လာရောက်အကြောင်းကြားကြောင်း စုံစမ်းသိရသည်။
ကျောက်မဲမြို့နှင့် နောင်ချိုမြို့အကြားရှိ နောင်ပစ်လမ်းခွဲတွင် ညီနောင်မဟာမိတ် တပ်ဖွဲ့ဖြစ်သည့် တအာင်း(ပလောင်)အမျိုးသားလွတ်မြောက်ရေးတပ်မတော် (TNLA)နှင့် မန္တလေး-PDF တို့ တပ်စွဲထားသည်။
ထို့ကြောင့် နောင်ပိန်ကျေးရွာအတွင်း တိုက်ပွဲများ ပြင်းထန်လာနိုင်သဖြင့် TNLA နှင့် မန္တလေး -PDF တို့သည် ကျေးရွာအနီး ၃ မိုင် ပတ်ပတ်လည်တွင် မနေကြရန် ယနေ့ (နိုဝင်ဘာ ၁၃ ရက်) နံနက် ၁၁ နာရီအပြီး ထွက်ပြေးရန် လာရောက်ပြောသွားကြောင်း နောင်ပိန်ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“ရွာထဲက လူကြီးတွေတော့ ထွက်ပြေးကုန်ပြီ။ တချို့ကတော့ အိမ်စောင့်ကျန်ခဲ့တာရှိတယ်။ အခုမနက် ၁၀နာရီခွဲလောက်မှာ စစ်ကောင်စီက ရဟတ်ယာဉ်နဲ့ လာဝဲတယ်”ဟု နောင်ပိန်ဒေသခံ အသက် ၅၀ အရွယ် အမျိုးသားတစ်ဦးက ပြောသည်။
ထို့ပြင် ယမန်နေ့ (နိုဝင်ဘာလ ၁၂ ရက်) နေ့လည် ၁၂ နာရီနှင့် ည ၁၀ နာရီခွဲအချိန်ခန့်တွင် ကျောက်မဲဘက်ခြမ်းရှိ ဂုတ်တွင်းနှင့် နောင်ပိန်ကျေးရွာ အနီးတဝိုက်ကို စစ်ကောင်စီတပ်မှ ဂျက်ဖိုက်တာ ၂ စီးဖြင့် ၂ ကြိမ်လာရောက် ဗုံးကျဲတိုက်ခိုက်ခဲ့ကြောင်း ကျောက်မဲဒေသခံများက ပြောသည်။
“နောင်ချိုဘက်က အုမ္မသီးနဲ့ ရေမောင်းတန်းမှာ ပိတ်ထားတာက ဖွင့်လိုက်တာပေါ့နော်။ TNLA နဲ့ PDF ပူးပေါင်းတပ်တွေက အဲ့ကနေ ဆုတ်ပြီးတော့ နောင်ပိန်ဘက်ခြမ်းမှာ လာမဲနေတာ။ စစ်ကောင်စီက အရင်လို လူအရင်မတက်ဘဲ လက်နက်ကြီးတွေ အမြောက်တွေနဲ့ နောင်ချိုတပ်ဘက်ကရော၊ ကျောက်မဲတပ်ဘက်ကရော နောင်ပိန်ဘက်ကို ပစ်ကြတာ။ မနေ့က နေ့လယ် ၁၂ နာရီ တစ်ခါ၊ ည ၁၀ နာရီခွဲတစ်ခါ ဂျက်ဖိုက်တာ ၂ စီးနဲ့ ၂ ခါ နောင်ပိန်နားမှာ ပစ်သွားတယ်”ဟု ကျောက်မဲဒေသခံတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (နိုဝင်ဘာလ ၁၂ ရက်) နေ့လည် ၁၂ နာရီတွင် စစ်ကောင်စီတပ်မှ ဂျက်ဖိုက်တာဖြင့် ဂုတ်တွင်းအနီး ဗုံးကျဲချခဲ့ရာ ကျောက်မဲမြို့နယ် နောင်ပစ်ကျေးရွာ အနီးတဝိုက်တွင် ကျရောက်ပေါက်ကွဲခဲ့ပြီး ထိခိုက်ပျက်စီးမှု မရှိကြောင်း ဒေသခံများထံမှ သိရသည်။
ထို့အပြင် ယမန်နေ့ (နိုဝင်ဘာလ ၁၂ ရက်) ည ၁၀ နာရီခွဲတွင် ဂျက်ဖိုက်တာ ၂ စီးမှ နောင်ပိန်ကျေးရွာအနီးသို့ ထပ်မံဗုံးကျဲချခဲ့ရာ ပင်တိန်ကျေးရွာ သက်ကယ်ကျောင်းအနီး လယ်ကွက်ထဲသို့ ကျရောက်ပေါက်ကွဲခဲ့ပြီး အနီးအနားရှိ နေအိမ် ပြတင်းမှန်များမှာ အက်ကွဲခဲ့ကြောင်း နောင်ပိန်ဒေသခံများက ပြောသည်။
“သူတို့ ဂျက်ဖိုက်တာက ဘယ်ကိုဦးတည်ပြီး ပစ်လဲတော့ မသိဘူး။ ဂျက်ဖိုက်တာက ၁ ခါလာရင် ၂ စီးလာတာ၊ ပြီးရင် ပေါင် ၅၀၀ ဗုံးတွေနဲ့ ပစ်တာ။ မနေ့ည ပစ်တာက သက်ကယ်ကျောင်း အနောက်ဘက် ရထားသံလမ်းဘေးက လယ်ကွက်ထဲကို ကျကွဲတာ။ ပေါက်ကွဲသံ အရမ်းကျယ်တော့ ပြတင်းပေါက်မှန် ကွဲတာတွေ၊ အိမ်တံခါး ပွင့်ထွက်တာမျိုးတွေ အထိဖြစ်တာ။ လူထိခိုက်ဒဏ်ရာ ရတာမျိုးတော့ မရှိဘူး”ဟု ကျောက်မဲမြို့ နောင်ပိန်ဒေသခံတစ်ဦးက သျှမ်းသံတော်ဆင့်ကို ပြောသည်။
နောင်ပိန်ဂုတ်တွင်းတွင် စစ်ကောင်စီတပ်၏ ဂျက်ဖိုက်တာဖြင့် လေကြောင်းဗုံးကျဲ တိုက်ခိုက်ခြင်းကြောင့် နောင်ပိန်တိုက်နယ်အတွင်းရှိ နောင်ပစ်၊ ခဲလုံ၊ လုံကြိမ်၊ ဇီးပင်စခန်း၊ ပင်တီး၊ ပင်တိန်ကျေးရွာများမှ စစ်ဘေးရှောင် ၁၀၀၀ ကျော်သည် နီးစပ်ရာ ကျေးရွာဘုန်းကြီးကျောင်းများသို့ ထွက်ပြေးတိမ်းရှောင်နေရကြောင်း နောင်ပိန်ဒေသခံများက ပြောသည်။
ထို့အပြင် ကျောက်မဲမြို့နယ် ဟဲပုကျေးရွာတွင်လည်း ယမန်နေ့ (နိုဝင်ဘာ ၁၂ ရက်)က စစ်ကောင်စီတပ်မှ လက်နက်ကြီး ရမ်းသမ်းပစ်ခတ်ခြင်းကြောင့် ပြည်သူနေအိမ် ၁ လုံးထိမှန်ပျက်စီးပြီး လူထိခိုက်ဒဏ်ရာရရှိခြင်း မရှိကြောင်း သိရသည်။
ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသော စစ်ကား ၄၀ စီးကျော်နှင့် သံချပ်ကာယာဉ် ၄ စီးတို့သည် ကျောက်မဲ၊ သီပေါ၊ လားရှိုးမြို့များသို့ ချီတက်နိုင်ရန်အတွက် စစ်ကောင်စီတပ်မှ ဂုတ်တွင်းလမ်းပိုင်းကို အပြင်းအထန် ထိုးဖောက်လျက်ရှိပြီး ယနေ့ (နိုဝင်ဘာလ ၁၃ ရက်)တွင်လည်း တိုက်ပွဲပြင်းထန်မည်ကို နောင်ပိန်ဒေသခံများက စိုးရိမ်ထိတ်လန့်နေကြသည်။
ထို့ကြောင့် TNLA တပ်ဖွဲ့မှ စစ်ကောင်စီ ထောက်ပို့လမ်းကြောင်းကို ဖြတ်တောက်နိုင်ရန်အတွက် သီပေါ ဘော်ကြိုအဝင်ရှိ ကျင်သီတံတားကို ယမန်နေ့ (နိုဝင်ဘာ ၁၂ ရက်)တွင် ဗုံးခွဲဖျက်စီးထားခြင်းကြောင့် တံတားမှာ ထက်ပိုင်းကျိုး၍ သွားလာနိုင်ခြင်း မရှိတော့ကြောင်း သိရသည်။
Leave a Comments