သုံးနှစ်တာ ရပ်နားခဲ့ရသည့် အင်းသားအမျိုးသားနေ့ကို ညောင်ရွှေမြို့တွင် နိုဝင်ဘာလ ၁၁ ရက်မှ စတင် ကျင်းပနေပြီး နိုဝင်ဘာလ ၁၃ ရက်တွင် အင်းသားအမျိုးသားနေ့ အခမ်းအနားကျင်းပသွားမည် ဖြစ်ကြောင်း စုံစမ်းသိရှိရသည်။
သျှမ်းပြည်တောင်ပိုင်း ညောင်ရွှေမြို့တွင် နှစ်စဉ်တန်ဆောင်မုန်းလဆန်း တစ်ရက်နေ့ကို အင်းသားအမျိုးသားနေ့အဖြစ်သတ်မှတ်ကာ ဘုံကထိန်များ၊ပျော်ပွဲရွှင်ပွဲများဖြင့် စည်ကားသိုက်မြိုက်စွာ ကျင်းပလေ့ရှိသည်။
နိုဝင်ဘာလ ၁၂ရက် က ညောင်ရွှေမြို့ရှိ ရွှေတောင်ဦး စုမ့်မိန်းဓမ္မစေတီတော်ကို ဗဟိုပြု၍ နန္ဒဝန်လမ်းအတိုင်း စုပေါင်းမဟာဘုံကထိန်များ လှည့်လည်ခဲ့ကြသည်။
တတိယရက်ဖြစ်သည့် နိုဝင်ဘာလ ၁၃ ရက် တန်ဆောင်မုန်းလဆန်းတစ်ရက်နေ့တွင် အင်းသားအမျိုးသားနေ့ အခမ်းအနားကို နံနက် ၈ နာရီတွင် အင်းသားရိုးရာ ရာကျော်လှေများ ချီတက် လှော်ခတ်လာသည်ကို ကြိုဆိုခြင်း၊ အခမ်းအနားကျင်းပမည့် ကျောက်တိုင်ကွင်းသို့ ထွက်ခွာရောက်ရှိခြင်း၊ တိုင်းရင်းသားရိုးရာယဉ်ကျေးမှုပြခန်းများအား ကြည့်ရှုအားပေးခြင်း၊ လူထုအခမ်းအနား သို့ တက်ရောက်လာသည့် ရေလမ်းကုန်းလမ်းမှ လူထုပရိသတ်များ စင်မြင့်ရှေ့တွင်နေရာယူခြင်းစသဖြင့် အခမ်းအနားကို နံနက် ၉ နာရီခွဲတွင် ဖွင့်လှစ်ပြီး ၁၀ နာရီ ၁၅ မိနစ်တွင် အခမ်းအနားပြီးမြောက်ခြင်းနှင့် တိုင်းရင်းသားယဉ်ကျေးမှုအဖွဲ့များ ဖျော်ဖြေတင်ဆက်ခြင်းတို့ ပြုလုပ်မည်ဖြစ်ကြောင်း သိရသည်။
” ဟိုဘက်မှာက တိုက်ပွဲတွေဖြစ်နေကြလို့ ဒီဘက်ကလူတွေ ပျော်ပွဲရွှင်ပွဲတွေ ကြီးကြီးကျယ်ကျယ် မလုပ်သင့်ဘူး ဆိုပြီး ပြောတဲ့ အသင်းအဖွဲ့တွေရှိတယ် ရိုးရာ ဘာသာရေးပွဲမို့ လို့လည်း အတင်းအကြပ်ကြီးတော့ မပိတ်ပင်ကြပါဘူး။ ဒီဘက်ကလည်း အကျဉ်းချုံးပြီး လုပ်ကြတာပါ”ဟု ညောင်ရွှေမြို့ခံတစ်ဦးမှ သျှမ်းသံတော်ဆင့်ကိုပြောသည်။
ညောင်ရွှေမြို့ ၊ ကျောက်တိုင်ကွင်းတွင် အင်းသားအမျိုးသားနေ့အခမ်းအနားကို နိုဝင်ဘာလ ၁၄ရက်နေ့အထိ ကျင်းပသွားမည်ဖြစ်ပြီး တိုင်းရင်းသားရိုးရာယဉ်ကျေးမှု အကအဖွဲ့များ ဆိုင်းဝိုင်းများ ရိုးရာပြိုင်ပွဲများစသည့် ဖျော်ဖြေရေးအစီအစဉ်များလည်း ပါဝင်ကြောင်းသိရသည်။
ပြီးခဲ့သည့် နိုဝင်ဘာလ ၉ရက်နေ့က အင်းအမျိုးသားနေ့ကို ထောက်ခံ ကြိုဆိုသော်လည်း နိုင်ငံရေးအခြေအနေအရ အကျဉ်းချူံးသာ လုပ်ရန် အင်းလေးလူထုအရေး လှုပ်ရှားသူတစ်ချို့က လှုံ့ဆော်တိုက်တွန်းထားကြောင်းလည်း ဒေသခံများထံမှ သိရသည်။
Leave a Comments