သျှမ်းပြည် လားရှိုးခရိုင်ရှိ ကွမ်းလုံမြို့အား အပြီးအပိုင် သိမ်းပိုက်နိုင်ခဲ့ကြောင်း ညီနောင်မဟာမိတ်အဖွဲ့မှ ကိုးကန့်တပ်ဖွဲ့ MNDAA က ကိုးကန့်မီဒီယာမှတဆင့် သတင်းထုတ်ပြန်လာသည်။
ကိုးကန့်တပ်ဖွဲ့ MNDAA က ထိုးစစ်ဆင် တိုက်ခိုက်ခဲ့သည့် သံလွင်မြစ် အရှေ့ဘက်ခြမ်းရှိ ကွမ်းလုံမြို့ကို အလုံးစုံ ထိန်းချုပ်ထားနိုင်ပြီး သံချပ်ကာယာဉ်နှင့် လက်နက်ခဲယမ်း အများအပြားကို သိမ်းဆည်းရမိကြောင်း သတင်းထုတ်ပြန်ထားသည်။
ထို့အပြင် သံလွင်မြစ် အနောက်ဘက်ရှိ စစ်ကောင်စီ၏ ဗျူဟာကုန်း တပ်စခန်းကိုလည်း ယမန်နေ့ (နိုဝင်ဘာ ၁၀ ရက်) က သိမ်းပိုက်ရရှိထားသည်ဟု ကြေညာထားသည်။
ကိုးကန့်တပ်ဖွဲ့ MNDAA က လောက်ကိုင်မြို့အနီး ရှီယွင်ကြည်ရွာရှိ စစ်ကောင်စီ ဗျူဟာကုန်း၏ တွဲဖက်တပ်စခန်းများကို ယမန်နေ့ (နိုဝင်ဘာ ၁၁ ရက်) နံနက် ၈ နာရီကျော်တွင် သိမ်းယူနိုင်ခဲ့ပြီး စစ်ကောင်စီအထိနာခြင်းကြောင့် လေကြောင်းဖြင့် ညနေပိုင်းတွင် ပြန်လည်တိုက်ခိုက်ခဲ့ရာ လောက်ကိုင်မြို့မှ တိမ်းရှောင်ထွက်ပြေးလာသူ လူအုပ်ကြားထဲ ဗုံးကျရောက်ပေါက်ကွဲခဲ့ကြောင်း စစ်ဘေးရှောင်နေရသူများက ပြောသည်။
“လောက်ကိုင်ကနေ ထွက်လာတဲ့ စစ်ဘေးရှောင်တွေ ပါစင်ကျော်နားက ဆယ်တန်ဂိတ်မှာ ပိတ်မိနေတဲ့အချိန် လူအုပ်ထဲကို ဗုံးကျကွဲတာ။ လူအုပ်ထဲ ကျတာဆိုတော့ အကုန်လုံးလန့်ဖြန့်ပြီး ဝရုန်းသုန်းကား ပြေးကြတာ။ အဲ့မှာ ဆိုင်ကယ်ကော ကားနဲ့ကော ရှောင်လာကြတဲ့လူတွေအကုန် ပါစင်ကျော်ထဲ ပြန်ပြေးဝင်လာကြတာ။ အသေအပျောက် များတယ်ပြောတယ်”ဟု လောက်ကိုင်တွင် ရောက်ရှိနေသည့် စစ်ဘေးရှောင်တစ်ဦးက ပြောသည်။
စစ်ဘေးရှောင်လူအုပ်အတွင်း လက်နက်ကြီး ကျရောက်ပေါက်ကွဲခြင်းကြောင့် စစ်ဘေးရှောင် ၁၀ ဦးထက်မနည်း သေဆုံးပြီး ထိခိုက်ဒဏ်ရာရရှိသူ အများအပြားရှိကာ ၎င်းတို့ကို ကိုးကန့်တပ်ဖွဲ့ MNDAA က လုံခြုံသည့်နေရာတွင် ဆေးဝါးကုသမှု လုပ်ဆောင်ပေးနေကြောင်း သိရသည်။
“အခု ဆယ်တန်ဂိတ်နဲ့ ပါစင်ကျော် ကြားထဲမှာ လူထောင်ချီ ပိတ်မိနေတုန်းပဲ။ ကလေးငယ်ရှိတဲ့ နို့တိုက်မိခင်တွေကော၊ သက်ကြီးရွယ်အိုတွေကော၊ အရေးပေါ်ဆေးကုရမယ့် လူနာတွေ အများကြီးရှိတယ်။ ရာသီဥတုကလည်း အရမ်းအေးတော့ အဲ့ဒီလူတွေအတွက် အရမ်းအန္တရာယ်ရှိနေတယ်။ ဒီမှာ ဘာဆေးဝါးမှလည်း မရနိုင်ဘူး၊ အစားအသောက်လဲ အခက်အခဲ ဖြစ်နေတယ်”ဟု လမ်းခရီးတွင် ပိတ်မိနေသည့် စစ်ဘေးရှောင်တစ်ဦးက ပြောသည်။
ယမန်နေ့ (နိုဝင်ဘာ ၁၀ ရက်)နေ့ကလည်း ကိုးကန့်တပ်ဖွဲ့ MNDAA မှ လမ်းခရီးတွင် ပိတ်မိနေသည့် စစ်ဘေးရှောင် ၃၀၀၀ ကျော်အတွက် ကားများစီစဉ်ပေးပြီး လုံခြုံသည့် နေရာများသို့ ပို့ဆောင်ပေးခဲ့သည်ဟု ထုတ်ပြန်ထားသည်။
ထို့အပြင် ချင်းရွှေဟော်သို့ သွားသည့်လမ်းကြောင်းသည် ဆက်လက်ပိတ်ထားနေဆဲဖြစ်ပြီး ပြည်သူများအနေဖြင့် လမ်းတွင် ပိတ်မိခံရခြင်းနှင့် ထိခိုက်မှုများကို ရှောင်ရှားနိုင်ရန်အတွက် ခရီးသွားလာခြင်းကို အထူးဂရုပြုကြရန်လည်း ကိုးကန့်တပ်ဖွဲ့ MNDAA က သတိပေးထားသည်
