သျှမ်းပြည်မြောက်ပိုင်း တိုက်ပွဲများကြောင့် လတ်တလော နေရပ်စွန့်ခွာထွက်‌ပြေးနေကြရသည့် စစ်ဘေးရှောင်ပြည်သူများအတွက် အမေရိကန်ဒေါ်လာတစ်သန်း အသုံးပြုသွားမည်ဖြစ်ကြာင်း ကုလသမ္ဂဆိုင်ရာ လူသားချင်းစာနာ‌ထောက်ထားမှုပေါင်းစပ်ညှိနှိုင်းရေးရုံး UNOCHA(ယူအန်အိုချာ) ၏ ကနဦးအစီရင်ခံစာ ထုတ်ပြန်ချက်အရ သိရသည်။

အောက်တိုလာလ ၂၇ ရက်မှ စ၍ သျှမ်းပြည်မြောက်ပိုင်းရှိ မြို့နယ် ၂၂ ခုတွင် အနည်းဆုံး မြို့နယ် ၉ ခု၌ တိုက်ပွဲများဖြစ်ပွားခဲ့သဖြင့် လူဦးရေ ၅၀,၀၀၀ ခန့် နေရပ်စွန့်ခွာ ထွက်ပြေးနေရသောကြောင့် မရှိမဖြစ်လိုအပ်နေသည့် အခြေခံစားနပ်ရိက္ခာနှင့်ကယ်ဆယ်ရေးပစ္စည်းများကို စစ်ဘေးရှောင်ပြည်သူများထံ ထောက်ပံ့ပေးသွားမည်ဖြစ်ကြောင်း UNOCHA ၏ နိုဝင်ဘာလ ၉ ရက် ထုတ်ပြန်ချက်အရ သိရသည်။

“တိုက်ပွဲတွေက ရွာတွေမှာစဖြစ်တော့ မြို့ပေါ်က ဘုန်းကြီးကျောင်းတွေ၊ဘာသာရေးအဆောက်အဦးတွေမှာ စစ်ရှောင်နေရတယ်။ ဆောင်းဝင်လာပြီမို့ အနွေးထည်နဲ့ စောင်တွေ အရေးပေါ်လိုအပ်‌နေပါတယ် ၊အဓိကလမ်းမကြီးတွေ ပိတ်ထားကြတော့ အကူညီပေးမယ့်အဖွဲ့တွေ လာဖို့ လွယ်ပါ့မလား” ဟု စစ်ဘေးရှောင်များကို ကူညီပေးနေသည့် လားရှိုးမြို့ခံတစ်ဦးက သျှမ်းသံတော်ဆင့် သို့ ပြောသည်။

စစ်ဘေးရှောင်ပြည်သူများကို ထိထိရောက်ရောက် ကူညီ‌နိုင်ရန် အတွက် သက်ဆိုင်ရာအဖွဲ့အစည်းအားလုံးက တိုက်ပွဲများကိုရပ်ပြီး အတားအဆီးမဲ့ ဝင်ရောက်ကူညီခွင့်ပြုရန် အရေးကြီးသည်ဟု UNOCHA မှ တောင်းဆိုထားကြောင်း အစီရင်ခံစာတွင် ဖော်ပြချက်အရ သိရသည်။

ပြီးခဲ့သည့်အောက်တိုဘာလ၂၇ရက်မှ စ၍ လားရှိုး-မူဆယ် ပြည်ထောင်စုလမ်းမကြီး နှင့် လားရှိုး-ချင်းရွှေဟော် ပြည်ထောင်စုလမ်းမကြီးများကို ပိတ်ထားလိုက်သဖြင့် နယ်စပ်ကုန်သွယ်ရေးများ လည်း ရုတ်တရက် ရပ်တန့် သွားပြီး အခြေခံစားသောက်ကုန်များနှင့် အခြားလူသုံးကုန်စည်များ ဈေးနှုန်း အဆမတန် မြင့်တက်လာမှု‌ေကြာင့် ဒေသခံပြည်သူများ အခက်အခဲများစွာဖြစ်ပေါ်နေကြရသည်။

ထောက်ပံ့ပေးအပ်လိုက်သည့် အကူအညီများသည် ကြီးမားသော လိုအပ်ချက်များကို ဖြည့်ဆည်ပေးနိုင်ရန် မလုံလောက်သေးပဲ ဝင်ရောက်ကူညီရေးနှင့် သွားလာရေးမှာတွင် အလွန်အမင်းခက်ခဲနေသောကြောင့် အရေးပေါ်ကျန်းမာရေးစောင့်ရှောက်မှုများ အချိန်မီမရရှိကြသဖြင့် အရပ်သားနှစ်ဦး သေဆုံးခဲ့ရကြောင်း အစီရင်ခံစာတွင် ဖော်ပြပါရှိသည်။