ညီနောင်မဟာမိတ် ၃ ဖွဲ့က စစ်ကောင်စီတပ်ကို “၁၀၂၇ စစ်ဆင်ရေး” ဆင်နွှဲနေသည့် သျှမ်းပြည် မြောက်ပိုင်းသို့ တြိဂံဒေသနှင့် အရှေ့အလယ်ပိုင်း တိုင်းစစ်ဌာနချုပ်တို့မှ ကုန်းလမ်းဖြင့် စစ်သည်အင်အား ဖြည့်တင်းနေကြောင်း စုံစမ်းသိရသည်။
ကျိုင်းတုံမြို့ အခြေစိုက် တြိဂံဒေသ တိုင်းစစ်ဌာနချုပ်နှင့် ခိုလမ်မြို့ အခြေစိုက် အရှေ့အလယ်ပိုင်း တိုင်းစစ်ဌာနချုပ်တို့မှ စစ်သည်အင်အားများကို ကုန်းကြောင်းမှတဆင့် တိုက်ပွဲဖြစ်ပွားရာ ဒေသများသို့ စစ်ကောင်စီက အင်အားအများအပြား ဖြည့်တင်းနေကြောင်း ကိုယ်တိုင်မြင်တွေ့ခဲ့သည့် ဒေသခံများက ပြောသည်။
“စစ်ကောင်စီတပ်က ကျိုင်းတုံ၊ ခိုလမ်နဲ့ တောင်ကြီးတွေမှာ ရှိတဲ့ တိုင်းရုံးတွေကနေ မြောက်ပိုင်းကို ကုန်းလမ်းကနေ အင်အားဖြည့်နေတာ။ ဒီလဆန်းပိုင်းတုန်းက ကျိုင်းတုံကနေ ၁၂ ဘီးကားနဲ့ သံလွင်မြစ်ကို ဖြတ်လာပြီး ကာလိဘက်မှာ ၁၂ စီး တွေ့လိုက်တယ်။ သူတို့ စစ်ဝတ်စုံနဲ့ မဟုတ်ပဲ အရပ်သားတွေပုံစံ ဝတ်ထားပြီး ကားထဲမှာ အများကြီး ထိုင်လိုက်လာကြတာ တွေ့ခဲ့တယ်။ သူတို့ ဘယ်လမ်းကနေ မြောက်ပိုင်းကို တက်မလဲတော့ မသိဘူး”ဟု စစ်ကောင်စီတပ် အင်အားဖြည့်တင်းနေသည်ကို ကိုယ်တိုင်မြင်တွေ့ခဲ့သည့် ဒေသခံတစ်ဦးက သျှမ်းသံတော်ဆင့်ကို ပြောသည်။
ထို့အပြင် ခိုလမ်၊ နမ့်ဆန်တပ်နယ်တို့မှ စစ်သည်များနှင့် ရပ်စောက်၊ ဗထူးတပ်တို့မှ စစ်ကောင်စီအင်အား အများအပြားလည်း သျှမ်းပြည် မြောက်ပိုင်းသို့ ထိုးစစ်ဆင်ရန် ကုန်းကြောင်းမှ အင်အားဖြည့်တင်းနေသည်ဟု ၎င်းဒေသခံက ဆက်ပြောသည်။
အလားတူ ပြင်ဦးလွင်မြို့မှ ထိုးစစ်ဆင်ရန် အင်အားဖြည့်တင်းလာသည့် စစ်ကား ၄၀ စီးခန့်နှင့် သံချပ်ကာ ၂ စီးပါ စစ်ကောင်စီယာဉ်တန်းကိုလည်း TNLA နှင့် မန္တလေး-PDF ပူးပေါင်းတပ်ဖွဲ့တို့က နောင်ချိုမြို့နယ် အုမ္မသီးနှင့် ရွှေညောင်ပင်ရွာတွင် ဖြတ်တောက်တိုက်ခိုက်လျက်ရှိရာ စစ်ကောင်စီတပ်၏ သံချပ်ကာ ၁ စီး ဖျက်စီးထားနိုင်သည်ကို တွေ့ရကြောင်း နောင်ချိုဒေသခံများက ပြောသည်။
လက်ရှိတွင် ညီနောင်မဟာမိတ် ၃ ဖွဲ့နှင့် ပြည်သူ့ကာကွယ်ရေးတပ်ဖွဲ့ PDF များမှ ချင်းရွှေဟော်၊ ဖောင်းဆိုင်၊ ပန်ဆိုင်း(ကြူကုတ်)နှင့် သိန္နီမြို့တို့ကို ထိန်းချုပ်ထားနိုင်သည်ဟု ကြေညာထားပြီး နမ့်ခမ်း၊ ကွမ်းလုံနှင့် လောက်ကိုင်မြို့တို့ကို အလုံးစုံထိန်းချုပ်နိုင်ရန် အစွမ်းကုန်ကြိုးစားလျက် ရှိနေသည်ဟု ထုတ်ပြန်ထားသည်။
စစ်ကောင်စီအနေဖြင့် ၎င်း၏တပ်စခန်း ၁၅၀ ကျော် ဆုံးရှုံးထားရပြီး ချင်းရွှေဟော်၊ ဖောင်းဆိုင်နှင့် ပန်ဆိုင်း(ကြူကုတ်)မြို့တို့ကို လက်လွှတ်ထားရသည်ဟု ထုတ်ဖော်ဝန်ခံထားသည်။
ထို့ကြောင့် လက်ရှိမှာ စစ်ကောင်စီတပ်မှ လေကြောင်းတိုက်ခိုက်မှုများ ခပ်စိပ်စိပ် ပြုလုပ်လျက်ရှိကာ စစ်ကောင်စီခေါင်းဆောင်က ညီနောင်မဟာမိတ်တပ်ဖွဲ့များကို ပြန်လည်ခြေမှုန်းမည်ဟု နိုဝင်ဘာ ၂ ရက်တွင် ထုတ်ဖော်ပြောဆိုထားသည်။
#SHANBurmese
Leave a Comments