သျှမ်းပြည် မိုင်းရယ်မြို့တွင် “ဝ”နယ် နမ့်တစ်မြို့မှတဆင့် ပို့ဆောင်လာသော စစ်ဘေးရှောင် ၅၀၀ ကျော် ရောက်ရှိလာပြီး မြို့ပေါ်ဘုန်းကြီးကျောင်းနှင့် ဘောလုံးကွင်းတို့တွင် ခေတ္တညအိပ် တည်းခိုခဲ့ကြောင်း စုံစမ်းသိရသည်။
“ဝ”နယ် နမ့်တစ်မြို့တွင် ချင်းရွှေဟော်၊ လောက်ကိုင်၊ ကွမ်းလုံမြို့တို့မှ ထွက်ပြေး တိမ်းရှောင်လာသော စစ်ဘေးရှောင်များကို “ဝ”တပ်ဖွဲ့ UWSA မှ ပို့ဆောင်လျက်ရှိရာ မိုင်းမောမြို့နယ်မှတစ်ဆင့် တန့်ယန်းမြို့သို့ ပို့ဆောင်လာသည်။
ထိုစစ်ဘေးရှောင်များထဲမှ ၅၀၀ ခန့်သည် ယမန်နေ့ (နိုဝင်ဘာလ ၉ ရက်) ညနေပိုင်းအချိန်တွင် မိုင်းရယ်မြို့သို့ ခေတ္တညအိပ် တည်းခိုခဲ့ကြောင်း မိုင်းရယ်ဒေသခံများထံမှ သိရသည်။
“ချင်းရွှေဟော်ကနေ တရုတ်ဘက် ဝင်သွားတဲ့လူတွေက မနေနိုင်ကြလို့ “ဝ”နယ် နမ့်တစ်ဘက်ကို ဝင်လာတာ။ အဲ့ဒီကနေမှ လူတွေကို မိုင်းမောကနေတဆင့် တန့်ယန်းဘက်ကို ပို့လာတာ၊ အဲ့မှာရောက်လာတဲ့လူတွေ အရမ်းများလို့ သူတို့တွက်ပြီး မိုင်းရယ်ဘက် ထပ်ပို့လာတာ။ မနေ့ညတုန်းက မိုင်းရယ်ကို ရောက်လာကြတာ စုစုပေါင်း ၅၀၄ ယောက်ရှိတယ်” ဟု မိုင်းရယ်ဒေသခံ တစ်ဦးက သျှမ်းသံတော်ဆင့်ကို ပြောသည်။
၎င်းစစ်ဘေးရှောင်များသည် ၁၀ ဘီးကား ၅ စီးဖြင့် မိုင်းရယ်သို့ ရောက်ရှိလာကြောင်း၊ ထိုသူများသည် တောင်ကြီး၊ ရန်ကုန်၊ မန္တလေး၊ ဧရာဝတီတိုင်းဘက်မှ ပြည်သူများဖြစ်ကြောင်း သိရသည်။
ယမန်နေ့ (နိုဝင်ဘာလ ၉ ရက်) ညပိုင်းက ရောက်ရှိလာသည့် စစ်ဘေးရှောင်များကို မိုင်းရယ်မြို့ပေါ်ရှိ ကျောင်းဆိုင်မိန်း၊ မြို့လယ်ကျောင်း၊ အောင်စေတီကျောင်းနှင့် မိုင်းရယ်ဘောလုံးကွင်းတို့တွင် နေရာချပေးခဲ့ကြောင်း စစ်ဘေးရှောင် ကူညီပေးသူများထံမှ သိရသည်။
၎င်းစစ်ဘေးရှောင်များသည် ပြည်မမှ ချင်းရွှေဟော်ဘက်သို့ အလုပ်လုပ်ကိုင်ရန် ရောက်ရှိလာသူများဖြစ်ပြီး မိုင်းရယ်မြို့မှ ကျေးသီး၊ တောင်ကြီးလမ်းတို့မှတဆင့် ဇာတိရပ်မြေသို့ ပြန်ကြမည်ဟု ၎င်းစစ်ရှောင်ကူညီပေးသူက ဆက်ပြောသည်။
ထို့အပြင် “၁၀၂၇ စစ်ဆင်ရေး”ကြောင့် မိုင်းရယ်မြို့နယ်အတွင်း စစ်မီးကူးစက်လာမည်ကို ဒေသခံများက စိုးရိမ်ထိတ်လန့်နေကြပြီး ညအချိန်တွင် ဘုန်းကြီးကျောင်းသို့ ညအိပ်တိမ်းရှောင်နေခြင်းများ ရှိနေကြောင်း မိုင်းရယ်ဒေသခံများက ပြောသည်။
“မိုင်းရယ်မှာရှိတဲ့ စစ်ကောင်စီရဲ့ ဌာနဆိုင်ရာ ရုံးတွေလည်း စစ်တပ်ထဲမှာ ပြောင်းအိပ်ကြတယ်လို့ ပြောတယ်။ ပြည်သူတွေလည်း အဲ့လိုကြားတော့ စိုးရိမ်ကြတာပေါ့။ သက်ကြီးရွယ်အိုတွေ၊ ကလေးတွေနဲ့ အမျိုးသမီးတွေကတော့ ညဆို ဘုန်းကြီးကျောင်းမှာ သွားအိပ်ကြပြီ။ မိုင်းရယ်မှာလဲ တချို့ဘုန်းကြီးကျောင်းတွေက ခမရ-၃၂၅ တပ်တို့ အမြောက်တပ်တို့နဲ့ နီးတာတွေလဲ ရှိတော့လေ စိုးရိမ်ရတယ်”ဟု မိုင်းရယ်မြို့ဒေသခံတစ်ဦးက သျှမ်းသံတော်ဆင့်ကို ပြောသည်။
ယခု နိုဝင်ဘာ လဆန်းပိုင်းမှ စ၍ မိုင်းရယ်မြို့နယ်အတွင်း TNLA တပ်ဖွဲ့နှင့် စစ်ကောင်စီတပ်တို့၏ စစ်ရေးလှုပ်ရှားမှုများကြောင့် မိုင်းရယ်မြို့ပေါ် ရပ်ကွက်များတွင် တိုက်ပွဲဖြစ်ပွားမည်ကို စိုးရိမ်လျက်ရှိပြီး ဗုံးခိုကျင်းများ တူးထားရကြောင်းကိုလည်း ၎င်းမိုင်းရယ်ဒေသခံက ဆက်ပြောသည်။
လက်ရှိအချိန်တွင် ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့ တိုက်ခိုက်နေသည့် “စစ်ဆင်ရေး-၁၀၂၇”ကြောင့် သျှမ်းပြည်မြောက်ပိုင်းရှိ မြို့နယ် (၁၂)ခုတွင် စစ်ဘေးရှောင်ဦးရေ ၄ သောင်းကျော်အထိရှိလာပြီး စားနပ်ရိက္ခာနှင့် ဆေးဝါးအကူအညီများ အလျင်အမြန် အရေးပေါ်လိုအပ်နေသည်။
Leave a Comments