သျှမ်းပြည် လားရှိုးမြို့နယ် မက်ချိနုကျေးရွာအုပ်စုတွင် လားရှိုးအခြေစိုက် အရှေ့မြောက်တိုင်း စစ်ဌာနချုပ်မှ ပစ်လွှတ်လိုက်သည့် ဆင့်ကဲပေါက်ကွဲတတ်သော ဗုံးကြောင့် အရပ်သား ၂ ဦး ထိခိုက်ဒဏ်ရာရပြီး နေအိမ်များ ပျက်စီးဆုံးရှုံးခဲ့ကြောင်း စုံစမ်းသိရသည်။
လားရှိုးမြို့နယ် မက်ချိနုကျေးရွာအုပ်စု ဝမ်မွန်းကျေးရွာတွင် ယမန်နေ့ (နိုဝင်ဘာလ ၉ ရက်) ညသန်းခေါင်အချိန်တွင် လားရှိုးအခြေစိုက် အရှေ့မြောက်တိုင်း စစ်ဌာနချုပ်မှ ပစ်လွှတ်လိုက်သည့် ဆင့်ကဲပေါက်ကွဲတတ်သော ဗုံးကြောင့် အသက် ၁၅ နှစ်နှင့် အသက် ၂၉ နှစ် အရွယ်ရှိ အမျိုးသား ၂ ဦး ထိခိုက်ဒဏ်ရာရပြီး နေအိမ်များ ပျက်စီးဆုံးရှုံးခဲ့ကြောင်း လားရှိုးဒေသခံများက ပြောသည်။
“လားရှိုးစစ်တိုင်းထဲကနေ သူတို့ပစ်တဲ့ဗုံးက ဆင့်ကဲပေါက်ကွဲတတ်တဲ့ဗုံးမျိုး၊ ဗုံးတစ်လုံးထဲလာပြီး ကောင်းကင်မှာ ပေါက်ကွဲပြီးတော့ ဘေးကို ဗုံးဆံတွေက ပြန့်သွားတာ။ ထိခိုက်ဒဏ်ရာရတာ ၂ ယောက်ရှိတယ်။ တစ်ယောက်ကတော့ ခြေဖနောင့်ကို ထိတယ်၊ နောက်တစ်ယောက်က ဒူးခေါင်းကိုထိတာ။ လမ်းတော့ မလျှောက်နိုင်ဘူး၊ ဟိုပိတ်မှာ ဒဏ်ရာလာချုပ်ထားရတယ်”ဟု လားရှိုးမြို့နယ် ဝမ်မွန်းဒေသခံတစ်ဦးက သျှမ်းသံတော်ဆင့်ကို ပြောသည်။
ထိခိုက်ဒဏ်ရာရရှိသူ ၂ ဦးတွင် အသက် ၁၅ အရွယ်ရှိ စိုင်းဆိုင်ဝမ်း ဆိုသူသည် ခြေဖနောင့် ထိမှန်ပြီး အသက် ၂၉ နှစ် အရွယ်ရှိ စိုင်းအောင်ပွင့် ဆိုသူသည် ဒူးခေါင်းထိမှန်ကာ ဟိုပိတ်ကျေးရွာ ဆေးပေးခန်းတွင် လာရောက်ကုသနေရသည်ဟု သိရသည်။
ယမန်နေ့ (နိုဝင်ဘာ ၉ ရက်) ညသန်းခေါင်အချိန်က လားရှိုးမြို့နယ် ဝမ်မွန်းကျေးရွာအတွင်း ကျရောက်ပေါက်ကွဲခဲ့သည့် ဗုံးကြောင့် လူနေအိမ် ၂ အိမ် ပျက်စီးပြီး အခြားအိမ်များ၏ အိမ်ခေါင်မိုးများနှင့် အုတ်တံတိုင်းများလည်း ထိခိုက်ပျက်စီးခဲ့ကြောင်း လားရှိုးမြို့ ဝမ်မွန်းဒေသခံများက ပြောသည်။
“အရင်ကလဲ လက်နက်ကြီးကျတာရှိတယ်။ ဒီတစ်ခေါက်ကျတော့ စစ်ကောင်စီတပ်က ပစ်လာတဲ့ဗုံးက ကောင်းကင်ပေါ်မှာပဲ အရင်ပေါက်ကွဲပြီးတော့ ဗုံးဆံတွေက ပြန့်လာတာမျိုး။ ဗုံးဆံမှန်တဲ့ အိမ်တွေဆို ခေါင်မိုးပေါက်တာတွေ၊ အုတ်တံတိုင်း ပေါက်တာမျိုးတွေ ဖြစ်ကုန်တယ်။ အခုတော့ အချက်အလက်တွေ ကောက်နေတုန်း၊ ခန့်မှန်းခြေ ၁၀ အိမ်နီးပါးရှိမယ်။ သူတို့က ၅ လုံးတွဲ ၆ လုံးတွဲ အဲ့လိုပစ်တော့ ရွာထဲကို ၂ နေရာ လာမှန်တာ”ဟု ၎င်းဒေသခံက သျှမ်းသံတော်ဆင့်ကို ဆက်ပြောသည်။
လားရှိုးမြို့နယ် မက်ချိနုကျေးရွာအုပ်စု ဝမ်မွန်းရွာတွင် ယမန်နေ့ (နိုဝင်ဘာ ၉ ရက်) ညသန်းခေါင်အချိန် ဗုံးပေါက်ကွဲမှုကြောင့် ရွာသား ၁၀၀ ခန့်သည် ဟိုပိတ်ဘုန်းကြီးကျောင်းသို့ ညတွင်းချင်း ထွက်ပြေးတိမ်းရှောင်ကြရပြီး ဟိုပိတ်စစ်ရှောင်စခန်းရှိ စစ်ဘေးရှောင်ဦးရေ ၃၀၀ ခန့်အတွက် စားနပ်ရိက္ခာများ လိုအပ်နေသည်ဟု သိရသည်။
“၁၀၂၇ စစ်ဆင်ရေး” စတင်သည့် အောက်တိုဘာလ ၂၇ ရက်နေ့မှ စ၍ ယနေ့အထိ လားရှိုးမြို့နယ်တွင် နှစ်ဘက်တိုက်ပွဲများ ပြင်းထန်လျက်ရှိကာ စစ်ဘေးရှောင်ဦးရေ ၆၅၀၀ ကျော် ထွက်ပြေးတိမ်းရှောင်နေရပြီး အမျိုးသမီးများအတွက် တစ်ကိုယ်ရေသုံးပစ္စည်းများနှင့် ကလေးငယ်များအတွက် အဝတ်အထည်များ အလျင်အမြန် လိုအပ်နေသည်။
