သျှမ်းမြောက်ဒေသတွင် “ ၁၀၂၇ စစ်ဆင်ရေး “ တိုက်ပွဲကို ဆင်နွှဲနေလျက်ရှိသော ညီနောင်မဟာမိတ် သုံးဖော်အား သျှမ်းကျေးရွာများမှ ဒေသခံများက (လုံး၀) အလိုမရှိကြောင်း ဆန္ဒဖော်ထုတ်နေသည်ဟု သတင်းအမှား ဖြန့်ဝေနေသည်။
စစ်ကောင်စီ၏ ဝါဒဖြန့် တယ်ရီဂရမ်ချယ်နယ်ဖြစ်တဲ့ lashio thar ဆိုသည့် အကောင့်တစ်ခုမှ “ အကြမ်းဖက် မြောက်သုံးကောင်အဖွဲ့က ရှမ်းလူမျိုးများအား ဓါးစာခံအဖြစ်ဖမ်းဆီးခြင်း၊ အကြပ်ကိုင်ခြိမ်းခြောက်ခြင်း၊ အကြောင်းမဲ့သတ်ဖြတ်ခြင်း စသည့်အကြမ်းဖက်လုပ်ရပ်များ ပြုလုပ်လာသည့်အတွက် ရှမ်းရွာများရှိ ဒေသခံတိုင်းရင်းသားများက အကြမ်းဖက်မြောက်သုံးကောင်အဖွဲအား ဒေသအတွင်း လုံးဝ(လုံးဝ) အလိုမရှိကြောင်း ဆန္ဒဖော်ထုတ်ခဲ့ကြောင်း သိရှိရ “ ဟုဆိုကာ လူမျိုးရေး မုန်းတီးမှုဖြစ်အောင် ရည်ရွယ်ချက်ဖြင့် လှုံ့ဆော်ရေးသား ဖြန့်ချိနေကြောင်း မသက်ဆိုင်သည့် ရုပ်ပုံနှင့်အတူ ဖြန့်ဝေးထားသည်။
မူရင်းလင့် – https://ghostarchive.org/archive/0W4oQ
သျှမ်းသံတော်ဆင့် အချက်အလက်စစ်ဆေးသည့် အဖွဲ့အနေဖြင့် ညီနောင်မဟာမိတ်သုံးဖွဲ့အား သျှမ်းကျေးရွာများမှ ဒေသခံများက မလိုမရှိကြောင်း ဆန္ဒဖော်ထုတ်ခဲ့သည်ဆိုတဲ့ သတင်းကို စီစစ်ဆေးမှု ပြုလုပ်ခဲ့ရာတွင် သတင်းအချက်အလက် မှားယွင်းနေကြောင်း တွေ့ရသည်။
ထိုရုပ်ပုံထဲမှ ဖယောင်းတိုင်မီးထွန်းကြသူများဟာ တိုက်ပွဲအတွင်း ကျဆုံးသွားသော ရှမ်းပြည်တိုးတက်ရေးပါတီ SSPP တပ်သားများအတွက် ဝမ်းနည်းကြောင်း၊ TNLA မှဖမ်းဆီးသွားသော SSPP တပ်သား ( စစ်သုံ့ပန်း) အပေါ် သတ်ဖြတ်ခံရခြင်းကြောင့် စစ်ဉပဒေနှင့် ဆန့်ကျင်ကြောင်း ဆန္ဒဖော်ထုတ်ခြင်း ဖြစ်သည်။
မူရင်းလင့် – https://www.facebook.com/photo?fbid=657518216566334&set=pcb.657519286566227
ယင်းကဲ့သို့ ကိစ္စနှင့် ပတ်သက်၍ တအာင်း (ပလောင်) အမျိုးသားလွတ်မြောက်ရေး တပ်မတော် TNLA ဘက်က ပြဿနာအား မကြီးထွားလာစေရန် နှစ်ဖက်ခေါင်းဆောင်များမှ ထိန်းညှိ ထိန်းသိမ်းသွားမည်ဖြစ်ပြီး လက်ရှိတွင် မဟာမိတ်ရေးရာရုံးများမှ အပြန်အလှန်ဆက်သွယ်ကာ ဖြေရှင်းသွားမည်ဖြစ်ကြောင်း မီဒီယာများမှ ဖော်ပြထားသည်။
ထို့ကြောင့် သျှမ်းမြောက်ညီနောင်မဟာမိတ်သုံးဖွဲ့အား သျှမ်းကျေးရွာများမှ ဒေသခံများက (လုံးဝ) အလိုမရှိကြောင်း ဆန္ဒဖော်ထုတ်ခြင်းဆိုသည့် သတင်းမှာ မှားယွင်းနေပြီး မသက်ဆိုင်သည့် ရုပ်ပုံများကို အသုံးပြု၍ ချဲ့ကားပြောဆိုမှုကြောင့် လူမျိုးရေး မုန်းတီးမှုပြသာနာကြီးထွားလာနိုင်သည်။
သျှမ်းသံတော်ဆင့် စာဖတ်ပရိသတ်များအနေဖြင့် လူမှုကွန်ရက်စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီယာများတွင် သွားရောက်ဖတ်ရှု့ကြရန် တိုက်တွန်းပါသည်။
သျှမ်းသံတော်ဆင့် အနေဖြင့်လည်း သတင်းများကို အချိန်နှင့် တပြေးညီ တင်ဆက်ပေးနေပါသည်။