သျှမ်းပြည် မူဆယ်-မန္တလေး ပြည်ထောင်စုလမ်းမကြီး တစ်လျှောက်တွင် စစ်ရေးပြင်းထန်ပြီး လမ်းကြောင်း ပိတ်ဆို့ထား သဖြင့် မူဆယ်-ဗန်းမော်ကားလမ်းဘက်ပတ်ပြီး မန္တလေးကို သွားနေရကြောင်း စုံစမ်းသိရသည်။
မူဆယ်-မန္တလေး ပြည်ထောင်စုလမ်းမကြီးသည် ညီနောင် မဟာမိတ် (၃)ဖွဲ့နှင့် စစ်ကောင်စီတို့ကြား စစ်ရေး ပြင်းထန်နေပြီး၊ သိန္နီမြို့ရှိ နမ္မတူတံတားကျိုးပျက်မှုကြောင့် ကားလမ်းများ ပိတ်ထားရသည်။
ထို့ကြောင့် မူဆယ်-မန္တလေး သို့ သွားရောက်လိုသူများသည် ဗန်းမော်-ရွှေကူ-ကသာ–မတ္တရာ -မန္တလေး လမ်းသို့ အသုံးပြုနေကြောင်း ခရီးသွားသူများက သျှမ်းသံတော်ဆင့်ကို ပြောသည်။
“ ကျနော်တို့ မန္တလေးကနေ မူဆယ်ကို အရင်လို တရက်တည်းမရောက်ဘူး။ ၂ညအိပ် ၃ရက်ကြာတယ်။ ဗန်မော်မှာ တစ်ညအိပ်ရတယ်။ နောက် လွယ်ကျယ်မှာတစ်ညပါ။ ငွေလည်း ပိုကုန်တယ်။ အချိန်လည်းပိုကုန်တာပေါ့” ဟု ခရီးသွား ပြည်သူ အမျိုးသား တစ်ဦးက သျှမ်းသံတော်ဆင့်ကိုပြောသည်။
ယခင် မူဆယ်-မန္တလေး ပြည်ထောင်စု လမ်းမကြီး တွင် ကားခ တစ်ဦးလျှင် ကျပ် ခုနစ်သောင်းပေးခဲ့ရာ လက်ရှိတွင် မူဆယ်-ဗန်မော်-မန္တလေး ကားခသည် တစ်ဦးလျှင် ကျပ် နှစ်သိန်း၃သောင်းခွဲ (၂၃၅၀၀၀) ထိပေးဆောင်ရပြီး နှစ်ညအိပ် ၃ရက်ခရီးသွားကြကြောင်း သိရသည်။
“မူဆယ် ကနေ မန္တလေး (ပြည်ထောင်စုလမ်းမကြီး)ကတော့ သွားလို့မရဘူးဗျ။ဗန်းမော်ဖက်က နေသွားရင် ဈေးကများတယ်။ ကျနော်တို့ ကားတွေကတော့ မထွက်သေးဘူးဗျ” ဟု မူဆယ်-မန္တလေး ကားသမားတစ်ဦးက ပြောသည်။
အလားတူ သျှမ်းပြည် လောက်ကိုင်မြို့နှင့် ချင်းရွှေဟော်မြို့တွင် ပိတ်မိနေသည့် ပြည်သူများကို “ဝ” UWSA တပ်ဖွဲ့က တန့်ယန်းဘက် လိုက်လံပို့ဆောင်ပေးခဲ့ကြောင်း တန့်ယန်းကားသမား တစ်ဦးက သျှမ်းသံတော်ဆင့်ကို ပြောသည်။
“ ကျနော်တို့ တန့်ယန်းဘက်ရောက်လာတဲ့ လောက်ကိုင်-ချင်းရွှေဟော်က လူတွေကို မန္တလေးဘက်ထိ လိုက်ပို့ပေးတာရှိတယ်။ လောက်ကိုင်-ချင်းရွှေဟော်ကနေ တန့်ယန်ထိတော့ “ဝ”ဘက်က တာဝန်ယူပြီးပို့တယ်။ တန့်ယန်း-မန္တလေးကတော့ တယောက်ကို ကားခ ၃သိန်းကျပ်ထိရှိပါတယ်” ဟု ကားသမားက ထပ်လောင်းပြောသည်။
နောင်ချို-ကျောက်မဲ-လားရှိုး-မူဆယ်-ချင်းရွှေဟော် စသည့် လမ်းပိုင်းများအား ဖြတ်သန်းသွားလာခွင့် တားမြစ်ထားဆဲ ဖြစ်ရာ မည်သူမဆို ယာဉ်ဖြင့်ဖြတ်သန်းသွားလာပါက စစ်တပ်ထောက်ပို့ယာဉ်အဖြစ် သတ်မှတ်၍ ပြင်းထန်စွာတိုက်ခိုက် ချေမှုန်းသွားမည် ဟု ညီနောင်မဟာမိတ် ၃ ဖွဲ့မှ အောက်တိုဘာ ၂၇ ရက်၌ ထုတ်ပြန်ထားသည်။
“၁၀၂၇” စစ်ဆင်ရေး ကြောင့် သျှမ်းမြောက် မြန်မာ-တရုတ်နယ်စပ် ကုန်သွယ်ရေးဇုံ လမ်းကြောတလျောက် ပိတ်ဆိုင်းခဲ့ရာ လက်ရှိတိုက်ပွဲကြောင့် အရပ်သား (၂၀)ဦးထက်မနည်း သေဆုံးပြီး၊ ထိခိုက်ဒဏ်ရာရရှိသူ (၄၀)ဦးထက်မနည်း ထိခိုက်ဒဏ်ရာရရှိခဲ့ကြောင်း သျှမ်းသံတော်ဆင့် ကောက်ယူထားသည့် သတင်းအချက်အလက်အရသိရသည်။
Leave a Comments