သျှမ်းပြည် လားရှိုးမြို့နယ် မိုင်းတင်ကျေးရွာတွင် စစ်ကောင်စီတပ်မှ ရမ်းသမ်းပစ်ခတ်သည့် လက်နက်ကြီး ကျရောက်ပေါက်ကွဲခြင်းကြောင့် ကလေးအပါအဝင် အမျိုးသမီး ၃ ဦး သေဆုံးသွားကြောင်း စုံစမ်းသိရသည်။

ယနေ့ (နိုဝင်ဘာလ ၉ ရက်) နံနက် ၇ နာရီကျော်အချိန်က လားရှိုးမြို့နယ် မိုင်းတင်ကျေးရွာတွင် အသက် ၆၀ အရွယ်ရှိ နိုင်းမွန်း ဆိုသူ အဘွား ၁ ဦးနှင့် အသက် ၁၂ နှစ်အရွယ်ရှိ နန်းဆိုင် ဆိုသူ မိန်းကလေး ၁ ဦးတို့မှာ နေအိမ်၌ နံနက်စာ ချက်ပြုတ်နေစဉ် စစ်ကောင်စီတပ်က ရမ်းသမ်းပစ်ခတ်သည့် လက်နက်ကြီး ကျရောက်ပေါက်ကွဲခြင်းကြောင့် ပွဲချင်းပြီး သေဆုံးခဲ့သည်။

ထို့အပြင် အသက် ၄၀ အရွယ်ရှိ နန်းရွှေ ဆိုသူ အမျိုးသမီးမှာ ခြေထောက်ပြတ်ဒဏ်ရာဖြင့် လားရှိုးမြို့သို့ ဆေးကုသရန် ပို့ဆောင်နေစဉ် ဆေးရုံအရောက်တွင် သေဆုံးသွားခဲ့သည်ဟု လားရှိုးမြို့နယ် မိုင်းတင်ဒေသခံများက ပြောသည်။

“ဒီမနက် ၇ နာရီကျော်လောက်က ရွာထဲကို လက်နက်ကြီးတွေ အများကြီးကျတာ။ အဘွား ၁ ယောက်နဲ့ မိန်းခလေး ၁ ယောက်က အိမ်မှာပဲ ပွဲချင်းပြီး သေသွားတာ။ ခြေထောက်ပြတ်သွားတဲ့ အသက် ၄၀ အရွယ် အမျိုးသမီးကျတော့ ဆေးရုံရောက်မှ ဆုံးသွားတယ်။ သေတာက ၃ ယောက်လုံး အမျိုးသမီးတွေကြီးပဲ”ဟု လားရှိုးမြို့ မိုင်းတင်ဒေသခံတစ်ဦးက သျှမ်းသံတော်ဆင့်ကို ပြောသည်။

ထိုသေဆုံးသွားသူများသည် ညအချိန်တွင် ဘုန်းကြီးကျောင်း၌ စစ်ရှောင်လာပြီး နံနက်အချိန်တွင် အစားအသောက် ချက်ပြုတ်ပြင်ဆင်ရန် အိမ်ပြန်ချိန် လက်နက်ကြီးထိမှန်ပြီး သေဆုံးခဲ့ကြောင်း မိုင်းတင်ဒေသခံတစ်ဦးက ပြောဆိုသည်။

ယနေ့ (နိုဝင်ဘာလ ၉ ရက်) နံနက်ပိုင်းတွင် စစ်ကောင်စီတပ် ခလရ-၆၈ မှ ရမ်းသမ်းပစ်ခတ်သည့် လက်နက်ကြီးကြောင့် လားရှိုးမြို့နယ် မိုင်းတင်ကျေးရွာအတွင်း နေအိမ် ၃ အိမ် ထိခိုက်ပျက်စီးခဲ့ပြီး မိုင်းတင်ဘုန်းကြီးကျောင်းတွင် ကျရောက်သည့် လက်နက်ကြီးမှာ မပေါက်ကွဲသေးဘဲ ရှိနေသည်ဟု မိုင်းတင်ဒေသခံများက ပြောသည်။

“ဒီနေ့မနက်မှ ရုတ်တရက်ကြီး ရွာထဲကို လက်နက်ကြီးကျလာတာ။ စစ်ကောင်စီတပ်ဘက်က လက်နက်ကြီးနဲ့ အရင်ရက်ကတည်းက ပစ်တယ်။ မိုင်းတင်ရွာထဲကို မကျဘူး။ စစ်ကောင်စီတပ်က မဟာမိတ်တပ်တွေ ရွာထဲရှိတယ်ထင်ပြီး လှမ်းပစ်တာ။ မိုင်းတင်ရွာထဲမှာ ဘာမှ မရှိဘူး၊ ရွာသူရွာသားတွေပဲရှိတာလေ။ ရွာထဲက ၃ အိမ်ထိတယ်။ ဘုန်းကြီးကျောင်းမှာတော့ လက်နက်ကြီး ၁ လုံး ကျတာ မကွဲသေးဘူး”ဟု ၎င်းက ဆက်ပြောသည်။

ပြီးခဲ့သည့် အောက်တိုဘာလ ၂၈ ရက်တွင်လည်း မိုင်းတင်ကျေးရွာအတွင်း လက်နက်ကြီး ကျရောက်ပေါက်ကွဲခြင်းကြောင့် နေအိမ် ၆ အိမ်ထက်မနည်း ထိခိုက်ပျက်စီးခဲ့သည်။

လားရှိုးမြို့နယ် မိုင်းတင်ဘုန်းကြီးကျောင်းတွင် လက်ရှိ စစ်ဘေးရှောင်ဦးရေ ၂၀၀ ခန့် ထွက်ပြေးတိမ်းရှောင်နေရပြီး သက်ကြီးရွယ်အိုများနှင့် ကလေးငယ်များမှာ ဆောင်းဝင်စ ရာသီအကူးအပြောင်းကြောင့် နာမကျန်းဖြစ်ကာ ဆေးဝါးများနှင့် စားနပ်ရိက္ခာများ အလျင်အမြန် လိုအပ်နေသည်ဟု သိရသည်။

“၁၀၂၇ စစ်ဆင်ရေး” စတင်သည့် အောက်တိုဘာလ ၂၇ ရက်နေ့မှ စ၍ ယနေ့အထိ လားရှိုးမြို့နယ်တွင် နှစ်ဘက်တိုက်ပွဲများ ပြင်းထန်လျက်ရှိကာ စစ်ဘေးရှောင်ဦးရေ ၆၅၀၀ ကျော် ထွက်ပြေးတိမ်းရှောင်နေရပြီး အမျိုးသမီးများအတွက် တစ်ကိုယ်ရေသုံးပစ္စည်းများနှင့် ကလေးငယ်များအတွက် အဝတ်အထည်များ အလျင်အမြန် လိုအပ်နေသည်။