သျှမ်းပြည် တန့်ယန်းမြို့သို့ ရောက်ရှိနေသည့် စစ်ရှောင် ၁ ထောင်ကျော် အတွက် အရေးပေါ် စားနပ်ရိက္ခာအကူအညီ လိုအပ်နေကြောင်း စစ်ရှောင်ကော်မတီထံမှ စုံစမ်းသိရှိရသည်။

“ ၁၀၂၇ စစ်ဆေးရေး “ တိုက်ပွဲကြောင့် လောက်ကိုင်မြို့အတွင်း ထွက်ပြေးလာသူများနှင့် ချင်းရွှေဟော်မြို့ရှိ စစ်ရှောင်များသည် ဒေသအတွင်း အာဏာပိုင်များ၏ အကူအညီဖြင့် တန့်ယန်းမြို့ရှိ ဘုန်းကြီးကျောင်းနှင့် “ဝ” စာပေနှင့်ယဉ်ကျေးမှုကျောင်းထံသို့ နိုဝင်ဘာ ၃ ရက်တွင် စတင်ရောက်ရှိလာခဲ့ခြင်း ဖြစ်သည်။

ယနေ့ ( နိုဝင်ဘာလ ၈ ရက်)အထိ လောက်ကိုင်၊ ချင်းရွှေဟော်ဘက်မှ ထွက်ပြေးတိမ်းရှောင်လာသည့် စစ်ရှောင်များ ထပ်မံ ရောက်ရှိလာနေပြီး စုစုပေါင်း စစ်ရှောင်ဦးရေ ၁,၀၀၀ ကျော်အထိ ရှိလာနေသဖြင့် စားနပ်ရိက္ခာမလုံလောက်မှုပြသာနာနှင့် ကြုံတွေ့နေရကြောင်း စစ်ရှောင်ကူညီသူ ဒေသခံတစ်ဦးက ပြောသည်။

“ အဓိကတော့ နေရာအထိုင်အခင်း၊ ဆေးဝါးနဲ့ စားနပ်ရိက္ခာတွေ လိုအပ်တာပေါ့။ နေ့တိုင်း စစ်ရှောင်အသစ်တွေ ထပ်ရောက်လာတော့ စားဖို့သောက်ဖို့က မနက်ပိုင်းအချိန်ကို ကော်ဖီနဲ့ မုန့်ပဲစားရတယ်။ ကျန်တဲ့အချိန်တွေ ကျတော့ ဒီကလူတွေ စုပြီး ထမင်းလာဝေတယ်၊ ချက်ကျွေးတယ်။ ဒါပေမယ့် လူဦးရေများတော့ မလောက်ဘူး “ ဟု ၎င်းဒေသခံတစ်ဦးက ပြောသည်။

လက်ရှိ စစ်ရှောင်များသည် တန့်ယန်းမြို့ရှိ အောင်မင်္ဂလာ ဘုန်းကြီးကျောင်း၊ အားကစားကွင်း (ဘောလုံးကွင်း)အဆောင် နှင့် “ ဝ “ စာပေနှင့် ယဉ်ကျေးမှုကျောင်းတွင် ခိုလှုံနေကြပြီး၊ ထိုထဲတွင် ကလေးငယ်နှင့် ကိုယ်ဝန်သည်မိခင် ဦးရေ ၂၅ ရာခိုင်နှုန်း ပါဝင်သည်။

တချို့စစ်ရှောင်သည် ထွက်ပြေးလာစဉ် လမ်းတစ်ဝက်၌ စစ်ဆေးမေးမြန်းခံရပြီး မှတ်ပုံတင်၊ ဖုန်းနှင့် ပိုက်ဆံများ သိမ်းဆည်းခံလိုက်ရသောကြောင့် အဝတ်တစ်ထည် ကိုယ်တစ်ခုဖြင့် ထွက်တိမ်းရှောင်လာရသည်။
ယင်းကဲ့သို့ တိုက်ပွဲဖြစ်ပွားခြင်းနှင့် ထွက်ပြေးတိမ်းရှောင်လာစဉ် လမ်းပိုင်းစစ်မေးမြန်းခံရခြင်းကြောင့် တချို့ ကလေးမိခင်မှာ စိတ်ပိုင်းဆိုင်ရာ ပြသာနာနှင့် ကြုံတွေ့နေရသည်ဟု စစ်ရှောင်ကူညီသူတစ်ဦးက ပြောသည်။

“ အခုတွေ့ရသလောက်တော့ တချို့ကလေးမိခင်တွေက စိတ်ပိုင်းဆိုင်ရာ ပြသာနာနဲ့ ကြုံတွေ့ရတာရှိတယ်။ လူကို ကြောက်တယ်၊ လန့်တယ်။ သူတို့စိတ်ပိုင်းဆိုင်ရာ ထိခိုက်သွားပုံရတယ်။ အခုကြုံတွေ့နေရတဲ့ ပြသာနာနဲ့ ပတ်သက်ပြီး လာကူညီမယ့်အဖွဲ့အစည်းကလည်း မရှိသေးဘူး “ ဟု ၎င်းက ပြောသည်။

သျှမ်းမြောက်ဒေသတွင် လဝက်နီးပါးကြာ “ ၁၀၂၇ စစ်ဆေးရေး “ တိုက်ပွဲကြောင့် မိမိနေရပ်၊ အိုးအိမ်ကို စွန့်ပစ်ပြီး ထွက်ပြေးတိမ်းရှောင်နေရသူ စုစုပေါင်း စစ်ရှောင်ဦးရေ ၄ သောင်း ဝန်းကျင်အထိ ရှိလာပြီဖြစ်ကြောင်း လူသားချင်းစာနာမှုဆိုင်ရာ ကုလသမဂ္ဂညှိနှိုင်းရေးမှုးရုံး UNOCHA က ထုတ်ပြန်ထားသည်။