သျှမ်းပြည် တောင်ပိုင်း ပင်လောင်းမြို့နယ်အတွင်း ပအိုဝ်းပြည်သူ့စစ် (PNO) မှ ဆက်ကြေးကောက်ခိုင်းသဖြင့် ကျေးရွာလူကြီးမှ အစည်းအဝေး ခေါ်ကာ အိမ်တိုင်းကို ပိုက်ဆံကောက်ခံနေကြောင်း ဒေသခံ တစ်ဦး၏ ပြောကြားချက်အရ စုံစမ်းသိရသည်။
“ဘာအတွက် ကောက်တာလဲဆိုတော့ အရင်ကတော့ ရွာတစ်ရွာမှာ လုံခြုံရေးအတွက် သေနတ် (၂) လက် ဝယ်ဖို့လိုတယ် ပြောတယ်။ ရေဖိုး၊ ဆန်၊ မိုင်းရှင်းခ၊ ကားဝယ်ဖို့ ဆိုပြီး ကောက်တာမျိုးတွေ ရှိတယ်။ ဥပမာ – တစ်ရွာမှာ သိန်း (၂၀၀) လို့ သတ်မှတ်ရင် တချို့ရွာတွေမှာ အိမ်ခြေနည်းတော့ တစ်အိမ်ကို (၁) သိန်း နီးပါးလောက် ကျသွားတာမျိုးရှိတယ်” ဟု ဒေသခံ တစ်ဦးမှ ပြောသည်။
ထိုကဲ့သို့ ဆက်ကြေးများ စတင် ကောက်ခံနေသည်မှာ သျှမ်းပြည် တောင်ပိုင်း ပင်လောင်း နယ်စပ်တွင် တိုက်ပွဲများ ဖြစ်ပွားချိန် မတ်လလောက်ကတည်းကဟု သိရှိရသည်။
“ကောက်တာတော့ ကြာပြီ။ (၉) လပိုင်းတုန်းက တစ်ခါပေးရသေးတယ်။ တစ်ခါကောက်ရင် (၃) သောင်း ရှိတယ်၊ (၅) သောင်းရှိတယ်။ သူတို့ လာကောက်တဲ့ အချိန် ပေးရတယ်။ အတိကျ သတ်မှတ်ထားတာတော့ မရှိဘူး။ လာကောက်တဲ့အချိန် မပေးရင်တော့ ရွာမှာ အပြောခံရတာပေါ့။ နင်ကဘာလဲဆိုပြီး မျက်နှာရှုံ့ကြတယ်” ဟု ၎င်းမှ ထပ်လောင်းပြောသည်။
ယခုကဲ့သို့ ကုန်ဈေးနှုန်းများ တက်ပြီး စားဝတ်နေရေးမှာလည်း ခက်ခဲနေသည့် အချိန်တွင် ဆက်ကြေးကောက်သည့် ကိစ္စ နှင့် ပတ်သက်ပြီးလည်း စိတ်ပူပန်ရကြောင်း ဒေသခံများထံမှ သိရှိရသည်။
“ကုန်ဈေးနှုန်းတွေက တက်နေတာ၊ ကျမတို့ စိုက်တဲ့ အသီးအနှံတွေက ဈေးကောင်းနဲ့ မရောင်းရတော့ အဆင်တော့ မပြေဘူးပေါ့။ တဖက်က အခွန်အခတွေ များတော့ စားဝတ်နေရေးအတွက် ကြပ်တယ်။ စားဝတ်နေရေးအတွက်ထက် သူတို့က ပိုက်ဆံ လာကောက်ရင် မရှိမှာစိုးလို့ အဲ့ဒါကို အရေးထားပြီး စုထားရသလိုမျိုးလည်း ဖြစ်တာပေါ့” ဟု အဆိုပါ ဒေသခံက ဆက်လက် ပြောကြားသွားသည်။
ပအိုဝ်းပြည်သူ့စစ် (PNO) သည် ပင်လောင်းမြို့နယ် တစ်ခုတည်းတွင်သာမကပဲ သျှမ်းပြည် တောင်ပိုင်းရှိ တချို့မြို့နယ်များတွင်လည်း ဆက်ကြေးများ ကောက်ခံလျက် ရှိကြောင်း သိရှိရသည်။
နော်လာဝါ မှ သတင်းပေးပို့ထားသည်။
