ညီနောင်မဟာမိတ် ၃ ဖွဲ့က စစ်ကောင်စီတပ်အပေါ် ဆင်နွှဲနေသည့် “၁၀၂၇ စစ်ဆင်ရေး”ကြောင့် ထွက်ပြေးတိမ်းရှောင်နေရသည့် လားရှိုးမြို့မှ စစ်ဘေးရှောင်ပြည်သူများအတွက် သျှမ်းပြည်တိုးတက်ရေးပါတီ SSPP တပ်ဖွဲ့ နှင့် သျှမ်းပြည်ပြန်လည်ထူထောင်ရေးကောင်စီ RCSS တပ်ဖွဲ့တို့က စားနပ်ရိက္ခာအတွက် ဆန် နှင့် အလှူငွေများ ကူညီထောက်ပံ့ခဲ့ကြောင်း သိရသည်။

ယမန်နေ့ (နိုဝင်ဘာလ ၆ ရက်) တွင် သျှမ်းပြည်တိုးတက်ရေးပါတီ/ သျှမ်းပြည်တပ်မတော် (SSPP/SSA) ဗဟိုဌာနချုပ်မှ လားရှိုးမြို့နယ်အတွင်း ထွက်ပြေးတိမ်းရှောင်နေရသည့် စစ်ဘေးရှောင်ပြည်သူများအတွက် စားနပ်ရိက္ခာ အကူအညီအဖြစ် ဆန်အိတ်ပေါင်း (၁၆၀) အိတ်ကို ကူညီပေးခဲ့သည်ဟု SSPP တပ်ဖွဲ့၏ သတင်း နှင့် ပြန်ကြားရေးဌာနက ယနေ့ (နိုဝင်ဘာ ၇ ရက်) တွင် သတင်းထုတ်ပြန်ထားသည်။

ပြီးခဲ့သည့် နိုဝင်ဘာလဆန်းပိုင်းက သိန္နီမြို့နယ် နှင့် ကျောက်မဲမြို့နယ်ရှိ ဘုန်းကြီးကျောင်းများတွင် ထွက်ပြေးတိမ်းရှောင်နေရသည့် စစ်ဘေးရှောင်များ စားနပ်ရိက္ခာအတွက် ဆန်နှင့်ဆီ တို့ကို SSPP တပ်ဖွဲ့ တာဝန်ရှိသူများက သွားရောက်လှူဒါန်းခဲ့သည်ဟု သိရသည်။

ကျန်ရှိနေသေးသည့် သျှမ်းပြည်မြောက်ပိုင်း မြို့နယ်အသီးသီးမှ စစ်ဘေးရှောင် ပြည်သူများအတွက်လည်း SSPP တပ်ဖွဲ့မှ တာဝန်ရှိသူများ စာရင်းပြုစုပြီး အတတ်နိုင်ဆုံး လိုအပ်သည့် အကူအညီများ ပေးအပ်သွားမည်ဟု ထုတ်ပြန်ထားသည်။

အလားတူ လွန်ခဲ့သည့် အောက်တိုဘာလ ၃၁ ရက်တွင်လည်း သျှမ်းပြည်ပြန်လည် ထူထောင်ရေးကောင်စီ/ သျှမ်းပြည်တပ်မတော် (RCSS/SSA) ဥက္ကဋ္ဌ ဗိုလ်ချုပ်ကြီး ယွက်စစ် မှ လားရှိုးမြို့နယ် မန်ဆူသျှမ်းကျောင်းတွင် စစ်ဘေးရှောင်နေရသည့် ပြည်သူများအတွက် အလှူငွေ ကျပ်သိန်း ၁၀၀ ကို ကူညီထောက်ပံ့ပေးခဲ့သည်ဟု သိရသည်။

“စဝ်ယွက်စစ် ဦးဆောင်ပြီးတော့ RCSS တပ်ရင်းတပ်ဖွဲ့တွေက စစ်သားတွေ စုပေါင်းပြီး လားရှိုးမြို့ မန်ဆူသျှမ်းကျောင်းမှာ ရောက်ရှိနေကြတဲ့ စစ်ဘေးရှောင်တွေအတွက် အလှူငွေ ကျပ်သိန်း ၁၀၀ ကို ကူညီထောက်ပံ့ပါတယ်”ဟု RCSS ဥက္ကဋ္ဌ ဗိုလ်ချုပ်ကြီး ယွက်စစ်နှင့် ရင်းနှီးသူတစ်ဦးက သျှမ်းသံတော်ဆင့်ကို ပြောသည်။

ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့ တိုက်ခိုက်နေသည့် “၁၀၂၇ စစ်ဆင်ရေး”ကြောင့် သျှမ်းပြည်မြောက်ပိုင်း မြို့နယ် (၁၂) ခုတွင် စစ်ဘေးရှောင်ဦးရေ ၃ သောင်းကျော်အထိ ရှိလာပြီး စားနပ်ရိက္ခာ၊ ဆေးဝါးနှင့် အမျိုးသမီးများအတွက် တစ်ကိုယ်ရေသုံး ပစ္စည်းများ၊ ကလေးငယ်များအတွက် အဝတ်အထည်များ စသည့် လူသားချင်း စာနာထောက်ထားမှုဆိုင်ရာ အကူအညီများ အလျင်အမြန် အရေးပေါ်လိုအပ်နေသည်။