သျှမ်းပြည် တိုက်ပွဲဖြစ်ပွားခဲ့သည့် သိန္နီမြို့ရှိ CB Bank ကို ညီနောင်မဟာမိတ် ၃ ဖွဲ့ တို့က ဝင်ရောက် ဖောက်ခွဲခဲ့ကြောင်း စုံစမ်းသိရသည်။
သျှမ်းပြည် လားရှိုးခရိုင်၊ သိန္နီမြို့၊ လားရှိုး ဘဏ်ခွဲဖြစ်သည့် သိန္နီ CB Bank ကို (နိုဝင်ဘာလ ၆ ရက်) ညနေပိုင်းတွင် ညီနောင်မဟာမိတ် ၃ ဖွဲ့ တို့က ဝင်ရောက် ဖောက်ခွဲခဲ့ပြီး မြန်မာကျပ်ငွေ သိန်းထောင်ချီ ဆုံးရှုံးသွားခဲ့ကြောင်း ဘဏ်နှင့်နီးစပ်သည့် ဒေသခံများက သျှမ်းသံတော်ဆင့်ကို ပြောသည်။
“မနေ့ ညကလည်း CB bank ထဲမှာရှိတဲ့ လူတွေကို ထွက်ခိုင်းပြီး ဗုံးနဲ့ ဘဏ်ကို ဖောက်ခွဲလိုက်တာ။ သူတို့က ဘဏ်ကိုဖောက်ပြီး ယူချင်တဲ့လူတွေ ယူဆိုပြီး အဲ့လိုလုပ်လိုက်တာ “ ဟု သိန္နီမြို့ဘဏ်နှင့်နီးစပ်သည့်ဒေသခံ အမျိုးသမီးတစ်ဦးက ပြောသည်။
အဆိုပါ CB Bank ကိုဖောက်ခွဲခြင်းနှင့် ပတ်သက်ပြီး ဆုံးရှုံးသွားသည့် ငွေပမာဏတန်ဖိုးကို သိရှိရန် လားရှိုး၊သိန္နီ ဘဏ်ရှိ တာဝန်ရှိ သူများကို အကြိမ်ကြိမ် ဆက်သွယ်သော်လည်း ကိုင်သွယ်ဖြေဆိုခဲ့ခြင်း မရှိပေ။
သျှမ်းပြည် မန္တလေး – မူဆယ် ပြည်ထောင်စု လမ်းမကြီးတစ်လျှောက် ဖော်ဆောင်နေသည့် ညီနောင်မဟာမိတ် ၃ ဖွဲ့တို့၏ “၁၀၂၇ စစ်ဆင်ရေး”တစ်ပတ်အတွင်း စစ်ဘေးရှောင် ဦးရေ ၂ သောင်းခွဲအထိ ထွက်ပြေးတိမ်းရှောင်နေရကြောင်း သိရသည်။
အလားတူ သိန္နီမြို့နယ်တွင်လည်း မြို့ပေါ် နှင့် ကျေးရွာများရှိ ဘုန်းကြီးကျောင်း (၁၀) ကျောင်းတွင် စစ်ဘေးရှောင် ဦးရေ ၈ ထောင်ကျော်အထိ ထွက်ပြေးတိမ်းရှောင်နေရပြီး ဒေသခံပြည်သူ သောင်းနှင့်ချီ တိုက်ပွဲအတွင်း ပိတ်မိနေသည်ဟု ဒေသခံများက ပြောသည်။
