မြန်မာ-တရုတ်နယ်စပ်ဒေသ နမ့်ခမ်းမြို့တွင် စစ်ကောင်စီတပ်နှင့် တအာင်း (ပလောင်) အမျိုးသား လွတ်မြောက်ရေး TNLA တို့ သုံးရက်ကျော်ကာလအတွင်း တိုက်ပွဲကြောင့် နေရပ်စွန့်ပြီး ထွက်ပြေးတိမ်းရှောင်နေရသည့် စစ်ရှောင်ဦးရေ ၂,၅၀၀ ဝန်းကျင်အထိ ရှိလာပြီဖြစ်ကြောင်း စုံစမ်းသိရှိရသည်။
ပြီးခဲ့သည့်ရက်ပိုင်း (နိုဝင်ဘာလ ၃ ရက်)တွင် နမ့်ခမ်းမြို့တွင် မြေပြင်တိုက်ပွဲအပြင် စစ်ကောင်စီဘက်မှ လေကြောင်းဖြင့် ဗုံးကြဲတိုက်ခိုက်ခြင်းကြောင့် ဒေသခံ ၁,၅၀၀ ကျော်သည် နမ့်ခမ်းမြို့ မန့်နောင်ခမ်းကျေးရွာ၊ ကွန်ဟိုင်းကျေးရွာနှင့် မန့်ကွန်ရွာရှိ ဘုန်းကြီးကျောင်းသို့ ထွက်ပြေးတိမ်းရှောင်နေရပြီး ဖြစ်သည်။
ယင်းကဲ့သို့ တိုက်ပွဲကြောင့် သုံးရက်ကျော် ကာလအတွင်း ထွက်ပြေးတိမ်းရှောင်နေရသည့် စစ်ရှောင်ဦးရေ ၁ ထောင်ကျော် ထပ်မံတိုးလာပြီး စုစုပေါင်း စစ်ရှောင်ဦးရေ ၂,၅၀၀ ဝန်းကျင်အထိ ရှိလာပြီဖြစ်ကြောင်း စစ်ရှောင်ကူညီသူများထံမှ သိရသည်။
“ နောင်ခမ်းရွာမှာတော့ စစ်ရှောင်ဦးရေတွေ ထပ်တိုးလာတယ်။ အခု ၁၀၀၀ ကျော်သွားပါပြီ။ ဒီနေ့ထိလည်း လာနေတုန်းပဲ။ စားဖို့သောက်ဖို့တော့ ဒီကလူတွေ စီစဉ်ပေးထားတယ် “ ဟု ၎င်းစစ်ရှောင်ကူညီသူ ဒေသခံတစ်ဦးက ပြောသည်။
လက်ရှိမှာ စစ်ရှောင်များအတွက် စားနပ်ရိက္ခာ၊ ဆေးဝါးနှင့် နေစရာ အထိုင်အခင်းများကို ကျေးရွာနေ ဒေသခံများက စုပေါင်းပြီး ထောက်ပံပေးထားသည်။
နမ့်ခမ်းမြို့ စစ်ရှောင်ကူညီသူတစ်ဦးက “ စားနပ်ရိက္ခာကတော့ ဒီရွာကလူတွေ ကျွေးမွေးထားပါတယ်။ SSPP ဘက်ကလည်း နည်းနည်းထောက်ပံ့တာရှိတယ်။ တချို့စစ်ရှောင်တွေကလည်း နည်းနည်းပါးပါးပါလာတယ်။ စားနပ်ရိက္ခာတော့ ဒီရှေ့နှစ်ရက်ဆို လုံလောက်သေးတယ်။ ရက်ရှည်ကြာလာရင်တော့ မသိဘူး၊ ထောက်ပံ့မှုတွေ မလောက်မှာပဲ စိုးရိမ်ရတယ် “ ဟု ၎င်းက ပြောသည်။
တိုက်ပွဲအတွင်း ထွက်ပြေးတိမ်းရှောင်လာရသဖြင့် စစ်ရှောင်များသည် စိတ်ပိုင်းဆိုင်ရာ ပြသာနာနှင့် ကြုံတွေ့မှု ရှိနိုင်ကြောင်းလည်း ၎င်းကထပ်လောင်းပြောသည်။
အောက်တိုဘာ ၂၇ ရက်မှစ၍ “ ၁၀၂၇ စစ်ဆင်ရေး “ ခေါင်းစဉ်ဖြင့် စတင်ခဲ့သည့် သျှမ်းမြောက် ဒေသတလျောက် တိုက်ပွဲကြောင့် စုစုပေါင်း စစ်ရှောင်ဦးရေ ၄ သောင်းဝန်းကျင်အထိ ရှိလာပြီဖြစ်ကြောင်း လူသားချင်းစာနာမှုဆိုင်ရာ ကုလသမဂ္ဂညှိနှိုင်းရေးမှုးရုံး UNOCHA က ထုတ်ပြန်ထားသည်။
ထို့အပြင် နမ့်ခမ်းမြို့ပြည်သူ ထွက်ပြေးတိမ်းရှောင်ရအချိန် စစ်ကောင်စီတပ်ဖွဲ့မှ လူနေအိမ်ရပ်ကွက်အတွင်း တပ်စွဲနေထိုင်ပြီး ပြည်သူပိုင် ကုန်စုံဆိုင်မှ ပစ္စည်းများကို အဓမ္မယူဆောင်စားသုံးနေသည်ဟု နမ့်ခမ်းမြို့ဒေသခံတစ်ဦးက သျှမ်းသံတော်ဆင့်ကို ပြောဆိုထားသည်။
