Saturday, July 20, 2024

မန္တလေး-လားရှိုး ပြည်ထောင်စုလမ်းမကြီး ပိတ်နေဆဲ

Must read

သျှမ်းပြည် မန္တလေး-လားရှိုး ပြည်ထောင်စုလမ်းမကြီးတစ်လျှောက်တွင် စစ်ရေးအခြေအနေ တင်းမာမှုကြောင့် ကားလမ်းများသည် ယနေ့ (နိုဝင်ဘာ ၅ ရက်) အထိ ပိတ်ထားသဖြင့် လားရှိုး၊ သီ‌ပေါ၊ ကျောက်မဲမြို့များမှ ကားသမားများနှင့် ပြည်သူများက  နမ့်လန်-‌ကျောက်ဂူ-ရပ်စောက်လမ်းကို အသုံးပြုနေကြကြောင်း စုံစမ်းသိရသည်။

လက်ရှိ အသုံးပြုနေတဲ့လမ်း

စစ်ကောင်စီတပ်နှင့် ညီနောင်မဟာမိတ် ၃ ဖွဲ့တို့၏ ထိတွေ့တိုက်ပွဲများကြောင့် ပြည်ထောင်စု လမ်းမကြီးဖြစ်သည့် လားရှိုး-ကျောက်မဲ-နောင်ချို-ပြင်ဦးလွင်-မန္တလေး လမ်းမကြီးကို ညီနောင်မဟာမိတ်တပ်များက နောင်ချိုနှင့်ကျောက်မဲကြားရှိ ဂုတ်တွင်းလမ်းပိုင်းကို ‌ပိတ်ထားသဖြင့် လားရှိုး-နမ့်လန်-ကျောက်ဂူ-ရပ်စောက်-မန္တလေးလမ်းကို အသုံးပြုနေရကြောင်း ကားသမားတစ်ဦးက သျှမ်းသံတော်ဆင့်ကို ပြောသည်

“နောင်ချိုတစ်ဝိုက်မှာက ဖြတ်သန်းသွားလာခွင့် ခက်တယ်။  အဲ့ကြောင့် အားလုံးကလည်း ဒီလမ်းသွားလို့မရဘူးဆိုတော့ ကျနော်တို့လည်း တောင်ကြီးသွားတဲ့ လမ်းဖက်ကနေပဲ သွားပေးလိုက်တာ။ ကျနော်တို့ကတော့တစ်ခေါက် နှစ်ခေါက်ပဲ ရှိသေးတာပါ၊ လက်ရှိကတော့ အဆင်ပြေပါတယ်။ လမ်းကတော့ သွားလို့လာလို့ရတယ်၊ နည်းနည်းတော့ ကြမ်းတာပေါ့”ဟု မန္တလေး-လားရှိုးခရီးစဉ် ပြေးဆွဲနေသည့် ‌ဒေသခံကားသမားတစ်ဦးက သျှမ်းသံတော်ဆင့်ကို ပြောသည်။

ယခုသွားလာနေသည့် နမ့်လန်-‌ကျောက်ဂူ-ရပ်စောက် လမ်းပိုင်းတွင် စစ်ဆေးရေးဂိတ် ၂ ခု ရှိသော်လည်း ဆိုင်ကယ်၊ ကားနှင့် သွားလာလို့ရပြီး လမ်းခရီးကြမ်းတမ်းကာ သွားလာချိန်ပိုကြာကြောင်းလည်း ၎င်းကားသမားက ဆက်ပြောသည်။

ပြီးခဲ့သည့် (အောက်တိုဘာလ ၂၆) ရက်တွင်လည်း နောင်ချိုမြို့နယ် အုမ္မခါးကျေးရွာအနီး စစ်ကောင်စီတပ်ဖွဲ့ နှင့် တအာင်း TNLA တပ်ဖွဲ့၊ မန္တလေး-PDF ပူးပေါင်းတပ်ဖွဲ့တို့အကြား တိုက်ပွဲဖြစ်ပွားခဲ့ပြီး တအာင်း TNLA တပ်ဖွဲ့နှင့် မန္တလေး-PDF ပူးပေါင်းတပ်ဖွဲ့တို့က ကုန်တင်ကားတစ်စီးဖြင့် အုမ္မခါး‌ရွာရှိ အဝေးပြေးလမ်းမကို ပိတ်ဆို့ထားကာ ဖြတ်သန်းသွားလာခွင့် တားမြစ်ခဲ့ကြောင်း သိရသည်။

ထို့အပြင် နောင်ချို-ကျောက်မဲ-လားရှိုး-မူဆယ်-ချင်းရွှေဟော် စသည့် လမ်းပိုင်းများအား ဖြတ်သန်းသွားလာခွင့် တားမြစ်ထားဆဲဖြစ်ရာ မည်သူမဆို ယာဉ်ဖြင့်ဖြတ်သန်းသွားလာပါက စစ်တပ်ထောက်ပို့ယာဉ်အဖြစ် သတ်မှတ်၍ ပြင်းထန်စွာတိုက်ခိုက် ချေမှုန်းသွားမည် ဟု ညီနောင်မဟာမိတ် ၃ ဖွဲ့မှ အောက်တိုဘာ ၂၇ ရက်၌ ထုတ်ပြန်ထားသည်။

Leave a Comments

- Advertisement -spot_img

Latest article