သျှမ်းပြည် နမ့်ခမ်းမြို့နယ် စစ်ကောင်စီလက်အောက်ရှိ အထွေထွေအုပ်ချုပ်ရေးရုံးနှင့် ရဲစခန်းတို့ကို တအာင်းအမျိုးသား လွတ်မြောက်ရေးတပ်မတော် TNLA တပ်ဖွဲ့က ဝိုင်းရံပိတ်ဆို့ထားကြောင်း စုံစမ်းသိရသည်။

ယနေ့ (နိုဝင်ဘာ ၅ ရက်) နံနက် ၆ နာရီခန့်မှပြီး နမ့်ခမ်းမြို့ရှိ စစ်ကောင်စီ ထွေအုပ်ရုံးနဲ့ ရဲစခန်းတို့ကို TNLA တပ်ဖွဲ့က ဝိုင်းရံပိတ်ဆို့ထားပြီး အနီးအနားရှိ ပြည်သူများနှင့် ဈေးဝယ်ထွက်သူများကို မိမိအိမ်တွင်သာ နေကြရန် TNLA တပ်ဖွဲ့က ညွှန်ကြားနေသည်ဟု နမ့်ခမ်းမြို့ ဒေသံများက ပြောသည်။

“ဒီနေ့လယ်အထိတော့ သေနတ်သံမထွက်သေးဘူး။ ဈေးထွက်ဝယ်တဲ့လူတွေကို တော့ အိမ်မြန်မြန်ပြန်ကြဖို့ လာပြောတာရှိတယ်။ ထွေအုပ်ရုံးကို မနက်အစောကတည်းက သူတို့ဝိုင်းထားတာ ဟုတ်တယ်။ နမ့်ခမ်းက ထွေအုပ်ရုံးနဲ့ ရဲစခန်းကို သူတို့သိမ်းတော့မယ်လို့ မနေ့တနေ့ကတည်းက ကြားတာ။ အခု အဲ့ဒီထွေအုပ်ရုံးထဲမှာ ဘယ်သူမှ မရှိတော့ဘူး။ ရဲစခန်းက လူတွေလဲ အစကတည်းက ထွက်ပြေးဖို့ အထုပ်ပြင်ထားကြတယ် ထင်တယ်၊ သွားကုန်ကြပြီ”ဟု နမ့်ခမ်းမြို့ဒေသခံတစ်ဦးက သျှမ်းသံတော်ဆင့်ကို ပြောသည်။

ထို့အပြင် နမ့်ခမ်းမြို့အခြေစိုက် စစ်ကောင်စီ တပ်မ-၁၁ ၏ စခန်းသစ် စစ်ဗျူဟာကုန်းကိုလည်း တိုက်ခိုက်သိမ်းပိုက်ရန် TNLA တပ်ဖွဲ့က အင်အားဖြည့်တင်းနေခြင်းကြောင့် စစ်ကောင်စီတပ်ဘက် လေကြောင်းမှ ပြည်သူလူထု နေထိုင်ရာ မြို့ရွာအတွင်းသို့ ဗုံးကြဲတိုက်ခိုက်မည်ကို နမ့်ခမ်းမြို့ခံများက စိုးရိမ်ထိတ်လန့်နေကြသည်။

“မြို့တွင်းထဲလဲ ဘယ်သူမှ မထွက်ရဲဘူး၊ စစ်ကောင်စီတပ်က လက်နက်ကြီးနဲ့ လေယာဉ်ဗုံးကျဲမှာ ကြောက်ရလို့။ ဟိုနေ့က အရမ်းဖြစ်တဲ့နေ့မှာ လေယာဉ်နဲ့ ၁၀ ခေါက်လောက်ပတ်ပြီး ပစ်နေတာ။ လေယာဉ်က နိမ့်နိမ့်လေးပျံတော့ အိမ်ခေါင်မိုးပေါ် ကျော်သွားရုံပဲလို့တောင် ထင်တာ။ လေယာဉ်သံနဲ့ သေတဲ့လူရှိတယ်လို့ ပြောတယ်”ဟု နမ့်ခမ်းမြို့ဒေသခံက သျှမ်းသံတော်ဆင့်ကို ဆက်ပြောသည်။

စစ်ကောင်စီတပ်နှင့် TNLA တပ်ဖွဲ့တို့ လက်ရှိဖြစ်ပွားနေသည့် တိုက်ပွဲကြောင့် နမ့်ခမ်းမြို့ပေါ် ရပ်ကွက် ၂ ခုနှင့် မြို့ဆင်ခြေဖုံး ကျေးရွာ ၁၀ ရွာတို့မှ စစ်ဘေးရှောင်ဦးရေ ၁၅၀၀ ကျော်သည် ရွှေလီမြစ် မြောက်ဘက်ခြမ်းသို့ ထွက်ပြေးတိမ်းရှောင်နေရသည်ဟု သိရသည်။

TNLA တအာင်းပလောင်တပ်ဖွဲ့ဝင်များသည် “၁၀၂၇ စစ်ဆင်ရေး”နှင့်အတူ သျှမ်းပြည်မြောက်ပိုင်း နမ့်ခမ်း၊ မူဆယ်၊ ကွယ်ခိုင်၊ မန်တုံ၊ နမ္မတူ၊ ကျောက်မဲ၊ နောင်ချိုနှင့် မိုးကုတ် မြို့နယ်များတွင် စစ်ဆင်ရေး ဆင်နွှဲနေသည်။