“ ၁၀၂၇ စစ်ဆင်ရေး “ တိုက်ပွဲကြောင့် သျှမ်းပြည် လောက်ကိုင်မြို့အတွင်း ပိတ်မိနေသည့် ပြည်သူအချို့ အရဲစွန့်ပြီး နေရပ်ပြန်သွားကြကြောင်း စုံစမ်းသိရှိရသည်။
ယနေ့ ( နိုဝင်ဘာလ ၅ ရက်) နံနက်အစောပိုင်းမှစပြီး လောက်ကိုင်မြို့အတွင်း ပိတ်မိနေသော ပြည်သူအချို့သည် ကားဖြင့် လောက်ကိုင်မြို့မှတဆင့် ချင်းရွှေဟော်-ပန်ဆန်း ( “ဝ” ဒေသ)သို့ ဝင်ရောက်သည်။
ထိုမှတစ်ဆင့် တန့်ယန်း-လားရှိုးမြို့သို့ အရဲစွန့်ပြီး နေရပ်ပြန်နေကြောင်း လောက်ကိုင်မြို့ဒေသခံတစ်ဦးက ပြောသည်။
“ လောက်ကိုင်ကနေ ချင်းရွှေဟော်ထိ ဆင်းပြီး နမ့်တိန်း ( “ဝ” ဒေသ) ထဲ ဝင်လို့ရတယ်။ အဲ့ကတဆင့် ပန်ဆန်း၊ တန့်ယန်းဘက် ပတ်ပြန်မယ်။ ဒီနေ့ ပြန်တဲ့လူတွေ များတယ် “ ဟု ၎င်းကဆိုသည်။
အဆိုပါ နေရပ်ပြန်သွားကြသူများ ကားခ တစ်ဦးကို တရုတ်ယွမ်ငွေ (၂,၀၀၀) ပေးဆောင်ရကြောင်း သိရသည်။
အလားတူ လောက်ကိုင်မြို့အတွင်း ပိတ်မိနေသည့် အွန်လိုင်းဂိမ်းပိုင်ရှင်၊ သူဌေးရှင်များကို စစ်ကောင်စီမှ ရဟတ်ယာဉ်ဖြင့် အခုရက်ပိုင်းအတွင်း ကယ်ထုတ်ပြောင်းရွှေ့ပေးနေကြောင်း ကိုးကန့်တပ်ဖွဲ့ MNDAA ရဲ့ ပြောရေးဆိုခွင့်ရှိသူ လီကျားဝင်းက သျှမ်းသံတော်ဆင့်ကို ပြောသည်။
“ ဟုတ်ပါတယ်။ အခုရဟတ်ယာဉ်တွေနဲ့ အွန်လိုင်းလုပ်နေတဲ့သူဌေးတွေ၊ ပိုင်ရှင်တွေကို ရဟတ်ယာဉ်တွေနဲ့ ပြောင်းရွှေ့ပေးနေတယ် “ ဟု ကိုးကန့်တပ်ဖွဲ့ MNDAA ရဲ့ ပြောရေးဆိုခွင့်ရှိသူ လီကျားဝင်းက ပြောသည်။
ထို့အပြင် လောက်ကိုင်-ချင်းရွှေဟော်-လားရှိုး ပြည်ထောင်စုလမ်းမကြီးအတိုင်း အရဲစွန့်ပြီး နေရပ်ပြန်သွားသည့် ပြည်သူအချို့လည်း ရှိနေကြောင်း ကားဆရာသမားများထံမှ သိရသည်။
ယင်းကဲ့သို့ နေရပ်ပြန်သွားကြသည့် ပြည်သူများဟာ ယမန်နေ့ ( နိုဝင်ဘာလ ၄ ) ညပိုင်းက လှုမှုကွန်ရက်စာမျက်နှာပေါ်မှာ ပျံ့နှံလာသည့် “ လောက်ကိုင်မှ လားရှိုးသို့ လမ်းလျှောက်ပြန် “ ဆိုသည့် သတင်းအမှားတခုကြောင့် ပါဝင်သည်။
တိုက်ပွဲကြောင့် လက်ရှိမှာလည်း သျှမ်းမြောက်ဒေသ မြို့နယ်နေရာအတော်တော်များတွင် ဖုန်းလိုင်းပြတ်တောက်နေသည်။
တိုက်ပွဲကြောင့် ရက်သတ္တပတ် ၁ ပတ်ကျော်ကြာ လောက်ကိုင်မြို့အတွင်း ပိတ်မိနေတဲ့ “ ခမ်းဆိုင် “ (နာမည်လွှဲ) ဆိုသူ အမျိုးသမီးတစ်ဦးကလည်း နေရပ်ပြန်ရန်အတွက် စိုးရိမ်နေကြောင်း ပြောသည်။
“ လမ်းအခြေအနေက မကောင်းဘူး ကြောက်တယ်။ ဒီမှာနေရတာအကောင်း၊ ပြန်လိုက်မှ လမ်းမှာတခုခု ဖြစ်သွားမှာ ကြောက်တယ်။ အခုချိန်မှာလည်း လိုင်းကမရနဲ့ အိမ်ကလူနဲ့တောင် ကောင်းကောင်း စကားမပြောရဘူး “ ဟု ခမ်းဆိုင်က ပြောသည်။
လက်ရှိ သျှမ်းမြောက်ဒေသတွင် တိုက်ပွဲအချိန်မရွေးဖြစ်ပွားနိုင်သဖြင့် တိုက်ပွဲနယ်မြေအတွင်း အရဲစွန့်ပြီး ဖြတ်သန်းသွားလာခြင်း မပြုကြပါရန်၊ ထို့သို့ ဖြတ်သန်းသွားလာသူများကိုလည်း အသက်ဘေးအန္တရာယ် တာဝန်မယူပေးနိုင်ကြောင်း ကိုးကန့်တပ်ဖွဲ့ MNDAA ရဲ့ ပြောရေးဆိုခွင့်ရှိသူ လီကျားဝင်းက သျှမ်းသံတော်ဆင့်ကို ပြောဆိုထားသည်။
အောက်တိုဘာ ၂၇ ရက်မှစ၍ “ ၁၀၂၇ စစ်ဆင်ရေး “ ခေါင်းစဉ်ဖြင့် စတင်ခဲ့သည့် တိုက်ပွဲကြောင့် သျှမ်းမြောက်ဒေသဖြစ်တဲ့ လားရှိုး၊ သိန္နီ၊ နမ့်ခမ်း၊ ပန်ဆိုင်း (ကြူကုတ်) နှင့် နောင်ချို စသည့် မြို့နယ်များတွင် စစ်ရှောင် ၃သောင်းနီးပါး ရှိလာပြီဖြစ်ကြောင်း သိရသည်။
