သျှမ်းပြည် နမ့်ခမ်းမြို့အတွင်း တပ်စွဲနေရာ ယူထားသည့် စစ်ကောင်စီတပ်သည် ပြည်သူပိုင် ကုန်စုံဆိုင်မှ ကုန်ပစ္စည်းများကို အဓမ္မယူဆောင်စားသုံးနေကြောင်းသိရသည်။
နမ့်ခမ်းမြို့ နမ့်ခမ်းဖောင်၊ ပေါက်တိုက်၊ ဟိုနောင်၊ အောင်မေတ္တာ ရပ်ကွက် နှင့် ဂျာမေ့ဗလီ တို့၌ စစ်ကောင်စီက တပ်စွဲ နေရာယူထားပြီး ပြည်သူပိုင် ကုန်ပစ္စည်းများကို ယူဆောင်စားသုံးနေကြောင်း လုံခြုံရေး အရ အမည်မဖော်လိုသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“လမ်းမကြီးဘေးမှာပဲ ပြည်သူ့အိမ်တွေကို အကာအကွယ်ယူပြီး နေရာယူ တပ်စွဲထားကြတာ။ ပြီးတော့ ဆိုင်ထဲ ပစ္စည်းတွေကိုလည်း အဓမ္မယူစားကြတာပေါ့။ သေနတ်တွေနဲ့လည်း လျှောက်ပစ်ကြတယ်” ဟု အမည်မဖော်လိုသူ အမျိုးသားကပြောသည်။
ညီနောင်မဟာမိတ် ၃ ဖွဲ့တို့၏ “၁၀၂၇ စစ်ဆင်ရေး နှင့် စစ်ကောင်စီတပ်တို့ ကြား တိုက်ပွဲကြောင့် နမ့်ခမ်းမြို့မှ ပြည်သူ ၁၅၀၀ ကျော်က စစ်ရှောင်ထွက်ပြေးနေရပြီး စားနပ်ရိက္ခာအကူအညီများ လိုအပ်နေကြောင်းလည်း သိရသည်။
လက်ရှိတွင် မဟာမိတ် တပ်ဖွဲ့သည် နမ့်ခမ်းမြို့ပြင်ရှိ ကွန်လုံဘက် သွားသည့် လမ်းမကြီး တစ်လျှောက်၌ နေရယူထားကြောင်းလည်း ဒေသခံ အမျိုးသားတစ်ဦးက ဆက်ပြောသည်။
“မဟာမိတ်တပ်က စစ်ကောင်စီတပ်ကို ဝိုင်းထားတဲ့ အနေအထားနဲ့ မြို့ပြင် လမ်းမကြီး တစ်လျှောက်မှာ နေရာယူထားတယ်။ အဲ့ကြောင့် စစ်ကောင်စီက မြို့တွင်း ပိတ်နေပြီး ပြည်သူပိုင် ကုန်ပစ္စည်းတွေကို ယူစားနေရတာပေါ့” ဟု ဒေသခံ အမျိုးသ သျှမ်းသံတော်ဆင့်ကို ဆက်ပြောသည်။
ယနေ့ နိုဝင်ဘာလ မွန်းလွဲပိုင်း ၁ နာရီခွဲ ဝန်းကျင်တွင်လည်း နမ့်ခမ်းမြို့ပေါ်မှ လက်နက်ကြီး/ငယ် ပစ်ခတ်သံများကြားရကြောင်းလည်း သိရသည်။
သျှမ်းပြည် မြောက်ပိုင်းရှိ မြို့နယ်များတွင် စစ်ကောင်စီတပ်နှင့် ညီနောင်မဟာမိတ် ၃ ဖွဲ့၊ ပြည်သူ့ကာကွယ်ရေးတပ်ဖွဲ့ PDF များ တိုက်ပွဲဆက်လက် ပြင်းထန်နေပြီး စစ်ကောင်စီတပ်မှ လေကြောင်းတိုက်ခိုက်မှုများလည်း ရှိခဲ့သည်။
ထို့အပြင် တိုက်ပွဲကြောင့် အရပ်သားပြည်သူ ထိခိုက်သေဆုံးမှု၊ နေအိမ်အဆောက်အအုံ ပျက်စီးမှု နှင့် တစ်မြို့နှင့်တစ်မြို့ ကူးသန်းသွားလာရန်အတွက် လမ်းပန်း ဆက်သွယ်ရေး ပြတ်တောက်မှုလည်း ရင်ဆိုင်ကြုံတွေ့နေရကြောင်းလည်း သိရသည်။
Leave a Comments