သျှမ်းပြည်နယ်မြောက်ပိုင်းမှာ စစ်ကောင်စီအရာရှိများနှင့် ရဲဘော်တွေ တိုက်ပွဲတွင် သေဆုံးမှုနှင့်စစ်သုံ့ပန်းအဖြစ် ဖမ်းဆီးခံရမှုများ များပြားနေသည့်အတွက် သီပေါမြို့နယ် တုံစင့်ဘိုးဘိုးကြီး နတ်နန်းမှာ စစ်ကောင်စီတပ်ဖွဲ့ဝင်များ အသက်အန္တရာယ် ဘေးကင်းရှင်းရေးအတွက် ပွဲထိုး ဆုတောင်း ယတြာချေနေသည်ဟု ဒေသခံများထံကနေ သိရပါသည်။
သီပေါမြို့ မြောက်ဘက် တုံစင့်ကျေးရွာ နမ္မတူ-နမ့်ဆန်သွားကားလမ်းဝဲဘက်ရှိ တုံစင့်ဘိုးဘိုးကြီး နတ်နန်းကို အောက်တိုဘာ၂၉ရက်တွင် ကျောက်မဲမြို့ ခမရ ၅၀၂နှင့် ဗိုလ်ကြီးနိုင်ဖြိုးလင်းအတွက်၊အောက်တိုဘာ ၃၁ရက်နေ့တွင် ခမရ ၅၀၃နှင့်ကွတ်ခိုင် ၄၅တပ်ရင်းအတွက် အသက်အန္တရယ်ဘေးကင်းရန် တပ်မိသားစုနှင့် တပ်အသိုင်းအဝိုင်းတွေက လာရောက်ပွဲထိုးထားခဲ့ခြင်းဖြစ်သည်။
“ရွာတွေထဲကို ကားတွေနဲ့ ရောက်လာကြတာ စစ်တွေဖြစ်နေပါတယ်ဆို ဘယ်သူတွေလဲဆိုပြီး ရွာထဲ စပ်စုကြည့်မှ စစ်သားမိသားစု မိန်းမ တွေက စစ်သားတွေဘေးကင်းဖို့ ဘိုးဘိုးကြီးဆီ ကန်တော့ပွဲလာတင်တာလို့ ပြောကြတာဘဲ ပွဲလည်းထိုးပြီးတော့ ကားတွေနဲ့ နေ့တွင်းချင်းပြန်သွားကြတာပဲ”ဟု ဒေသခံအမျိုးသားတစ်ဦးက ပြောသည်။
မြောက်ပိုင်းညီနောင်မဟာမိတ် ၃ ဖွဲ့က အောက်တိုဘာလ ၂၇ ရက်ကစတင်ပြီး ၁၀၂၇ စစ်ဆင်ရေးဆင်နွှဲကာ သျှမ်းပြည်မြောက်ပိုင်းရှိ စခန်း ၁၀၀ နီးပါး သိမ်းပိုက်နိုင်ခဲ့ပြီး စစ်ကောင်စီတပ်ဖွဲ့ဝင် ရာချီ သေဆုံးကြောင်းနှင့် စစ်သုံ့ပန်းများကိုလည်း ဖမ်းဆီးရရှိတဲ့အပြင် လက်နက်ခဲယမ်းများ သံချပ်ကာနှင့်တင့်ကား ၆ စီးကိုပါ သိမ်းဆည်းမိခဲ့သည်ဟု ညီနောင်မဟာမိတ်တပ်ဖွဲ့မှ သတင်းထုတ်ပြန်ထားသည်။
စစ်ဆင်ရေး ၇ ရက် ကာလအတွင်းမှာတော့ စစ်ကောင်စီတပ်ဖွဲ့ဝင်တွေ သေဆုံးမှုများနှင့် ဖမ်းဆီးခံရခြင်းများ များပြားလာခဲ့သည့်အတွက် ယခုလို ဘိုးဘိုးကြီး နတ်နန်းမှာ စစ်ကောင်စီတပ်ဖွဲ့ဝင်များ အသက်အန္တရာယ် ဘေးကင်းရှင်းစေရေးအတွက် ပွဲထိုးဆုတောင်း ယတြာချေမှုများကို စစ်တပ်အသိုင်းအ၀ိုင်းက လုပ်ဆောင်ပေးခဲ့တာဖြစ်သည်။
ကုန်းဘောင်ခေတ် သီပေါ စော်ဘွား ကိုးဆက်မြောက်၏ ညီဖြစ်သူ ပေါပန်ဟာ တုံစင့်ဘိုးဘိုးကြီးအဖြစ် ဒေသကို စောင့်ရှောက်လျက်ရှိသည်ဟု အဆိုပါနတ်နန်းမှာ ရှိသည့် တုံစင့်ကျောက်စာမှာ ရေးသားဖော်ပြထားသည်။
