သျှမ်းပြည်မြောက်ပိုင်း၊လားရှိုးမြို့နယ်ရှိ စစ်ကောင်စီလက်အောက်ခံ ဂျာယန် ပ.သ.စ စခန်း နှင့် မိုင်းယန်း ပ.သ.စ စခန်း (၂)ခုတို့ကို ယနေ့ (နိုဝင်ဘာ ၄)ရက် နံနက်ပိုင်းတွင် ထပ်မံ တိုက်ခိုက်သိမ်းပိုက်နိုင်ခဲ့ကြောင်း PSLF/TNLA ၏ ထုတ်ပြန်ချက်အရ သိရသည်။
နိုဝင်ဘာလ ၄ရက်နေ့ နံနက် ၅ နာရီ ခွဲက TNLA တပ်မဟာ ၆ စစ်ဒေသ ဖြစ်သည့် လားရှိုးမြို့နယ်အတွင်း စစ်ကောင်စီတပ်စခန်း၂ခုကို တိုက်ခိုက်သိမ်းပိုက်နိုင်ခဲ့သည့်အပြင် မိုင်းကျက်တပ်စခန်းတွင်လည်း စစ်ကောင်စီ ေထာက်ပို့လေယာဉ်မှ ချပေးခဲ့သည့် လက်နက်ခဲယမ်းသေတ္တာ များကိုပါ ဖြတ်ယူနိုင်ခဲ့ကြောင်း သိရသည်။
” တပ်မဟာ (၆)စစ်ဒေသ၊ လာရှိုးက ဒီစခန်း ၂ခုရယ် မနေ့က တပ်မဟာ (၁) နမ့်ခမ်း က ၂ ခုနဲ့ တပ်မဟာ (၂) မိုးမိတ်က တစ်ခုရယ် အပြင် လက်နက်ခဲယမ်း တွေပါ သိမ်းပိုက်နိုင်ခဲ့ပါတယ် “လို့ တအောင်းတပ်မတော် PSLF/ TNLA မှ သိရသည်။
နိုဝင်ဘာ ၃ရက် နံနက်၄နာရီတွင် တပ်မဟာ(၂)စစ်ဒေသ မိုးမိတ်မြို့နယ်ရှိ စစ်ကောင်စီ ခွန်ခါ စခန်းကို လည်းကောင်း ၊ မွန်းလွဲ ၂နာရီကျော်တွင် တပ်မဟာ (၁)စစ်ဒေသ၊ နမ့်ခမ်းမြို့နယ်ရှိ စစ်ကောင်စီ၏ ဝါရော့တပ်စခန်းနှင့် ထိန်ကန်ကျေးရွာအနီးရှိ စစ်ကောင်စီတပ်စခန်း (၂)ခု တို့ကို သိမ်းပိုက်နိုင်ခဲ့ပြီး လက်နက်ခဲယမ်းများအပြင် ရိက္ခာများပါ သိမ်းဆည်းရရှိခဲ့ကြောင်း တအာင်းတပ်မတော် TNLA၏ထုတ်ပြန်ချက်အရ သိရသည်။
တပ်မဟာ(၂)စစ်ဒေသဖြစ်သည့် နောင်ချိုမြို့နယ်ရှိ၊ လယ်ကြီးတောကျေးရွာဘက်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီ နောင်ချိုတပ်မှ ၁၀၂/၁၀၅ ဟောင်ဝစ်ဇာ လက်နက်ကြီးဖြင့် အကြိမ် ၂၀ခန့် ပစ်ခတ်တိုက်ခိုက်ခဲ့သောကြောင့် အမျိုးသမီးငယ် တစ်ဦး ထိခိုက်ဒဏ်ရာရပြင်းထန်ခဲ့ပြီးနေအိမ် သုံးလုံးလည်း ပျက်ဆီးခဲ့ရကြောင်း ဒေသခံများထံမှ သိရသည်။
