မြန်မာ-တရုတ်နယ်စပ်ဒေသ နမ့်ခမ်းမြို့နယ်တွင် စစ်ကောင်စီတပ်နှင့် တအာင်း (ပလောင်) အမျိုးသား လွတ်မြောက်ရေးတပ်မတော် (TNLA) တို့ တိုက်ပွဲကြောင့် စစ်ရှောင် (၁,၅၀၀) ကျော် ထွက်ပြေးတိမ်း ရှောင်နေရကြောင်း စုံစမ်းသိရှိရသည်။
ယမန်( နိုဝင်ဘာလ ၃ ရက် ) နံနက်အစောပိုင်းမှစ၍ စစ်ကောင်စီတပ်နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ထိတွေ့တိုက်ပွဲကြား အပြန်အလှန် ပစ်ခတ်ခြင်းအပါအဝင် စစ်တပ်မှ လေယာဉ်ဖြင့် ဗုံးကြဲတိုက်ခိုက်မှုကြောင့် ဒေသခံများမှာ နေရပ်အိုးအိမ်စွန့်ပြီး ဘေးလွှတ်ရာ ထွက်ပြေးတိမ်း ရှောင်နေရသည်။
လက်ရှိမှာ နမ့်ခမ်းမြို့နယ် ကွန်ဟိုင်းကျေးရွာအုပ်စု၊ နောင်ခမ်းကျေးရွာအုပ်စု နှင့် မန့်ကွန်ရွာအတွင်းရှိ ဘုန်းကြီးကျောင်းများသို့ ထွက်ပြေးတိမ်းရှောင်နေရပြီး အရေးပေါ် အကူညီလိုအပ်နေကြောင်း စစ်ရှောင်ကူညီသူ တစ်ဦးက သျှမ်းသံတော်ဆင့်ကို ပြောသည်။
“ လောလောဆယ်တော့ နောင်ခမ်းရွာမှာတော့ စစ်ရှောင် ၁ ထောင်ဝန်းကျင်လောက်ရှိနေပြီ။ လူဦးရေကတော့ ဒီထက်တိုးလာဖို့ အလားအလာရှိတယ်။ မနေ့က ညနေစာအတွက်တော့ ဒီရွာကလူတွေ ပြုစုကျွေးမွေးထားပါတယ်။ အရေးပေါ်အတွက်တော့ စားနပ်ရိက္ခာတွေ၊ အထိုင်အခင်းတွေ လိုအပ်ပါတယ် “ ဟု ၎င်းက ပြောသည်။
ထွက်ပြေးတိမ်းရှောင်လာကြသည့် ကျေးရွာများမှာ နမ့်ခမ်းမြို့ အောင်မြတ်သာရပ်ကွက်၊ သာယာကုန်းရပ်ကွက်၊ ဝမ်းဟောင်း (မန့်ဟောင်း)ရွာ၊ ကွန်လုံရွာ နှင့် နောင်မလုံရွာ စသည့် ကျေးရွာ ၁၀ နီးပါးမှ စစ်ရှောင် (၁,၅၀၀) ဖြစ်ကြောင်း သိရသည်။
ထို့အတူ နမ့်ခမ်းမြို့နယ်အတွင်း စစ်ကောင်စီတပ်ဖွဲ့နှင့် TNLA တပ်ဖွဲ့တို့အကြား စစ်ရေးတင်းမာနေလျက် ရှိသောကြောင့် အချိန်မရွေးတိုက်ပွဲဖြစ်လာနိုင်ကြောင်း၊ စစ်ရှောင် ဦးရေ ထပ်တိုးလာနိုင်ကြောင်း နမ့်ခမ်းမြို့ဒေသခံတစ်ဦးက ပြောဆိုထားပါသည်။
ပြီးခဲ့သည့် (အောက်တိုဘာလ ၂၇ ) ရက်မှစပြီး “ ၁၀၂၇ စစ်ဆင်းရေး “ ခေါင်းစဉ်ဖြင့် စတင်လာခဲ့သည့် စစ်ကောင်စီတပ်နှင့် ညီနောင်မဟာသုံးသုံးဖွဲ့တို့အကြား တိုက်ပွဲကြောင့် စုစုပေါင်း စစ်ရှောင်ဦးရေ ၂ သောင်းကျော်အထိ ရှိလာပြီဖြစ်သည်။
အလားတူ တိုက်ပွဲအတွင်း အပြန် အလှန် ပစ်ခတ်တိုက်ခိုက်ခြင်း၊ လက်နက်ကြီးကျပေါက်ကွဲခြင်းအပါအဝင် စစ်တပ်လေယာဉ်သုံး ဗုံးကြဲတိုက်ခိုက်ခြင်းကြောင့် ရက်သတ္တပတ် ၁ ပတ်အတွင်း အရပ်သား ၁၇ ဦးသေဆုံးခဲ့ပြီး၊ ၂၀ ဦးထက်မနည်း ထိခိုက်ဒဏ်ရာရရှိခဲ့ပြီဖြစ်ကြောင်း သိရသည်။
Leave a Comments