သျှမ်းပြည် ကျိုင်းတုံမြို့နယ် လယ်ယာအတွင်း ဓားခုတ်ခံရပြီး သေဆုံးရသည်အထိ ဖြစ်ပွားခဲ့ကြောင်း စုံစမ်းသိရသည်။
ပြီးခဲ့သည့် နိုဝင်ဘာလ ၁ ရက် နံနက်ပိုင်း ၇ နာရီ ဝန်းကျင် အချိန်တွင် ကျိုင်းတုံမြို့နယ်၊ မိုင်းအင်ကျေးရွာ အုပ်စု၌ နေထိုင်သည့် အမျိုးသားတစ်ဦးသည် ၎င်း၏ လယ်ယာအတွင်း ဓားခုတ်ဒဏ်ရာဖြင့် သေဆုံးလျက်တွေ့ရကြောင်း သိရသည်။
ယင်းကဲ့သို့ ဓားခုတ်ဒဏ်ရာဖြင့် လယ်ယာအတွင်း သေဆုံးလျက်တွေ့ရသည့်အမျိုးသား၏ ရုပ်အလောင်းကို တိုင်းနေလူမှုကူညီရေး အသင်းက ကျိုင်းတုံဆေးရုံသို့ ပို့ဆောင်ပေးခဲ့ကြောင်း အသက် (၄၀) ဝန်းကျင် အမျိုးသမီး တစ်ဦးက သျှမ်းသံတော်ဆင့်ကိုပြောသည်။
“ဓားချက်က (၃) ချက်ပါ။ ကျောဘက် နောက်စေ့က ဒဏ်ရာက အကြီးဆုံးဘဲ။ သူလယ်သွားကြည့်မယ်ဆိုပြီးတော့ မနက်စောစော ထွက်သွားတာ၊ မနက်စာ စားချိန်လည်း ပြန်မလာလို့ မိသားစုဝင်သွားလိုက်တော့ သေနေပြီ” ဟု အမျိုးသမီးက ပြောသည်။
သေဆုံးသူ အမျိုးသားသည် အသက် (၅၀) ကျော်ရှိသည့် မိုင်းအင်အုပ်စု ၊ နားဆိုင်ရွာနေ ဦးကျလယ် ဖြစ်ကြောင်းလည်း သိရသည်။
ဦးကျလယ်သည် အနေအေးသူဖြစ်ပြီး ခိုက်ရန်ဖြစ်ပွားခြင်းလည်း မရှိခဲ့ဖူးကြောင်း အထက်ပါအမျိုးသမီးက ဆက်ပြောသည်။
“ရန်ဖြစ်စကားများရှိတာ မကြားဖူးဘူး။ သူအသတ်ခံရတာကိုလည်း မိသားစုဝင်တွေလည်း အမှုဖွင့်ထားပါတယ်။ အရင်ပတ်ထဲမှာလည်း ဒီလို လယ်ထဲ သွားတဲ့ လူငယ်တစ်ယောက်လည်း အသတ်ခံရတယ်။ ကျမတို့ဒေသလည်း ကြောက်ဖို့ကောင်းလာပြီ” ဟု အထက်ပါ အသက် (၄၀) ဝန်းကျင် အမျိုးသမီးက ပြောသည်။
အလားတူပင် ပြီးခဲ့သည့် အောက်တိုဘာလ (၂၄) ရက်နေ့တွင် ကျိုင်းတုံမြို့နယ်မှ ဝမ်လင်ကျေးရွာနေ အသက် ၃၀ နီးပါး အမျိုးသား တစ်ဦးလည်း ၎င်း၏ လယ်အတွင်း၌ ဓားခုတ်ခံရသည့် ဒဏ်ရာများဖြင့် သေဆုံးလျက် တွေ့ရကြောင်း သိရသည်။
ယင်းကဲ့သို့ ဓားဒဏ်ရာများဖြင့် သေဆုံးသူများကို သက်ဆိုင်ရာ တာဝန်ရှိသူနှင့် ရဲများမှ စုံစမ်းစစ်ဆေး အရေးယူမည်ဟု ပြောကြား ခဲ့သော်လည်း ယနေ့အချိန်အထိ ထူးခြားမှု မရှိကြောင်း ဒေသခံများကပြောသည်။
