သျှမ်းပြည် လားရှိုးမြို့နယ် နမ့်ပေါင်ကျေးရွာအတွင်းသို့ စစ်ကောင်စီတပ်ဖွဲ့ ဝင်ရောက်နယ်မြေရှင်းရေး ပြုလုပ်နေစဉ် လမ်းမပေါ်ရှိ အရပ်သား ၅ ဦးကို ဖမ်းဆီးခေါ်ဆောင်သွားခဲ့ကြောင်း စုံစမ်းသိရှိရသည်။
ယမန်နေ့ ( နိုဝင်ဘာလ ၂ ရက် ) မွန်းလွဲ ၃ နာရီကျော် အချိန်တွင် လားရှိုးမြို့နယ် နမ့်ပေါင်ကျေးရွာ အုပ်စုအတွင်းသို့ စစ်ကောင်စီတပ်ဖွဲ့ ဝင်ရောက်နယ်မြေရှင်းလင်းရေး ပြုလုပ်နေစဉ် လမ်းမပေါ်ရှိ အမျိုးသား ၅ ဦးကို ဖမ်းဆီးခေါ်ဆောင်သွားခဲ့သည်ဟု ဒေသခံတစ်ဦးက ပြောသည်။
“ မနေ့က လမ်းမပေါ်က လူ ၅ ဦးကို စစ်တပ်က ဖမ်းခေါ်သွားတာ။ အခုထိ ပြန်လွှတ်၊ မလွှတ် မသိရသေးဘူး။ ဖမ်းသွားတာကတော့ မနေ့ကတည်းက ဖမ်းသွားတာ “ ဟု ၎င်းဒေသခံတစ်ဦးက ပြောသည်။
စစ်ကောင်စီ၏ ဖမ်းဆီးခြင်းခံရသူများမှာ အမျိုးသား ၅ ဦးဖြစ်ပြီး လက်ရှိအချိန်ထိ ပြန်လည်လွှတ်မြောက်လာခြင်း မရှိသေးကြောင်း၊ မည်သည့်နေရာ၌ ဖမ်းဆီးချုပ်နှောင်ထားခြင်း မသိရှိရသေးပေ။
ထို့အပြင် စစ်ဆင်ရေးကာလအတွင်း စစ်ရေးတင်းမာနေသည့် ဒေသဖြစ်သည့် လားရှိုး၊ သိန္နီ၊ ချင်းရွှေဟော်၊ ကွတ်ခိုင်၊ မူဆယ်၊ နမ့်ခမ်း စသည့် မြို့နယ်များမှာ မလိုအပ်ဘဲ အိမ်ပြင်ထွက်ခြင်း၊ ခရီးသွားလာခြင်း မပြုလုပ်ကြရန်လည်း ညီနောင်မဟာမိတ်သုံးဖွဲ့တို့က သတိပေးစာ ထုတ်ပြန်ထားသည်။
Leave a Comments