သျှမ်းပြည် သိန္နီမြို့အတွင်း ပိုင်ရှင်မဲ့ လက်နက်ကြီးတစ်လုံး ပြည်သူနေအိမ်အပေါ် ကျရောက်ပေါက်ကွဲခြင်းကြောင့် အမျိုးသမီး နှစ်ဦး သေဆုံးခဲ့ပြီး နေအိမ်မှာလည်း ပျက်စီးသွားကြောင်း စုံစမ်းသိရသည်။
ယမန်နေ့ (နိုဝင်ဘာလ ၁ ရက်) ညနေ ၃ နာရီအချိန်ခန့်တွင် သိန္နီမြို့မှ ကွတ်ခိုင်သို့အတက် လမ်းခွဲ ကုန်းထိပ်နားတွင် ဝက်သားချဉ်ရောင်းသည့် အိမ်ကို ပိုင်ရှင်မဲ့ လက်နက်ကြီး ကျရောက်ပေါက်ကွဲခြင်းကြောင့် အမျိုးသမီး သားအမိ ၂ ဦး သေဆုံးသွားကြောင်း သိန္နီဒေသခံများက ပြောသည်။
ပြီးခဲ့သည့် အောက်တိုဘာ ၂၇ ရက် နံနက်ပိုင်းမှ စတင်လာသည့် “၁၀၂၇-စစ်ဆင်ရေး” ခေါင်းစဉ်ဖြင့် ညီနောင်မဟာမိတ် (၃)ဖွဲ့ နှင့် စစ်ကောင်စီတို့ကြား တိုက်ပွဲဖြစ်ပွားကာ ယနေ့အချိန်ထိ သိန္နီမြို့တွင် စစ်ရေးပြင်းထန်နေကြောင်း သိရသည်။
“သူတို့ သားအမိ ၂ ယောက် မနေ့ညနေက လက်နက်ကြီးကြောင့် ဆုံးသွားတာ ဟုတ်တယ်” ဟု သိန္နီမြို့မှ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
သေဆုံးသွားသည့် ၂ ဦးတွင် အမေဖြစ်သူ ပါစော နှင့် သမီးဖြစ်သူ နန်းခမ်းလျန်း အမည်ရှိ သားအမိတို့သည် သိန္နီမြို့ရှိ ရပ်ကွက် ၃ ၊ သိန္နီ – ကွတ်ခိုင် တိုးဂိတ်အနီးတွင် နေထိုင်သူများဖြစ်ပြီး အိမ်နောက်ဖေးတွင် ထမင်းစားနေချိန် လက်နက်ကြီး ကျရောက်ပေါက်ကွဲခြင်းကြောင့် ပွဲချင်းပြီး သေဆုံးသွားကြောင်း ဒေသခံများကပြောသည်။
သိန္နီမြို့နယ်အတွင်း ဖြစ်ပွားခဲ့သည့် ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့၏ နှစ်ဖက်တိုက်ပွဲအကြား အမျိုးသား (၃) ဦး နှင့် အမျိုးသမီး ၂ ဦးတို့ လက်နက်ကြီး ထိမှန်သေဆုံးခဲ့ပြီး ထိခိုက်ဒဏ်ရာရရှိသူ (၂) ဦး အထိ ရှိလာကြောင်း သျှမ်းသံတော်ဆင့်၏ စုံစမ်းမေးမြန်းချက်များအရ သိရသည်။
