သျှမ်းပြည် သိန္နီမြို့နယ်ရှိ စစ်ဘေးရှောင်စခန်းများကို စစ်ကောင်စီတပ်က သတင်းဖုံးဖိထားရန် ကြိုးပမ်းလာပြီး စစ်ဘေးရှောင်များ၏ ဖုန်းများကို တင်းတင်းကျပ်ကျပ် စစ်ဆေးနေသည်ဟု စုံစမ်းသိရသည်။
ယနေ့ (အောက်တိုဘာ ၃၀ ရက်)နေ့က သိန္နီမြို့နယ်ရှိ စစ်ဘေးရှောင်စခန်းတစ်ခုကို စစ်ကောင်စီတပ်သားများ ရောက်လာပြီး စစ်ဘေးရှောင်များ၏ မိုဘိုင်းဖုန်းထဲရှိ ဓာတ်ပုံများကို စစ်ဆေးမည်ဟု ပြောဆိုကြောင်း သိန္နီမြို့ရှိ စစ်ဘေးရှောင်ပြည်သူများက ပြောသည်။
“ခဏတုန်းက စစ်ကောင်စီတပ်က စစ်သားတွေ ရောက်လာပြီးတော့ ဖုန်းစစ်မယ်လို့ လာပြောတာ။ စစ်ရှောင်နေတဲ့ ပုံတွေကိုလည်း သူတို့ပေးမရိုက်ဘူး။ ဓာတ်ပုံတွေကို အွန်လိုင်းပေါ် ပေးမတင်ဘူး။ လိုင်းမတက်ကြဖို့၊ ဖုန်းမသုံးကြဖို့လဲ လာပြောတယ်”ဟု သိန္နီမြို့ စစ်ဘေးရှောင်စခန်းတခုမှ စစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။
သိန္နီမြို့နယ်တွင် ယနေ့ (အောက်တိုဘာလ ၃၀ ရက်)အထိ ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့ တိုက်ပွဲဆက်လက်ပြင်းထန်နေပြီး လားရှိုး-မူဆယ် ပြည်ထောင်စု ကားလမ်းမပေါ်ရှိ သိန္နီမြို့အဝင်တံတားလည်း ဖောက်ခွဲဖျက်စီးခံရခြင်းကြောင့် ယခုအချိန်ထိ သိန္နီမြို့တွင်းသို့ အဝင်အထွက် ပြုလုပ်နိုင်ခြင်း မရှိသေးဘဲ လမ်းပန်းဆက်သွယ်ရေး ပြတ်တောက်နေသည်။
ပြီးခဲ့သည့် အောက်တိုဘာလ ၂၆ ရက်မှ စတင်ပြီး လက်ရှိအချိန်အထိ သိန္နီမြို့နယ်တွင် အင်တာနက်နှင့်ဖုန်းလိုင်းများ ဖြတ်တောက်ခံထားရကာ စစ်ကောင်စီလက်အောက်ခံ မိုင်တဲလ် ကွန်ယက်လည်း မကြာခဏ ပြတ်တောက်နေသည်ဟု သိရသည်။
အောက်တိုဘာ ၂၇ ရက် မှ စတင်ဖြစ်ပွားသော ညီနောင်မဟာမိတ် ၃ ဖွဲ့နှင့် စစ်ကောင်စီတပ်တို့၏ “စစ်ဆင်ရေး-၁၀၂၇”ကြောင့် သိန္နီမြို့နယ်အတွင်း ပြည်သူထောင်နှင့်ချီ ပိတ်မိနေပြီး စစ်ဘေးရှောင်ဦးရေ ၃၀၀၀ ကျော် တိုးလာကာ ၎င်းတို့မှာ စားနပ်ရိက္ခာနှင့် သောက်သုံးရေများ အရေးပေါ်လိုအပ်နေကြောင်း သိန္နီမြို့ စစ်ဘေးရှောင်ပြည်သူများထံမှ သိရသည်။
