သျှမ်းပြည် လားရှိုး-မူဆယ် ပြည်ထောင်စုကားလမ်းမပေါ် ရှိ သိန္နီမြို့အဝင် တံတား ယနေ့ (အောက်တိုဘာလ ၃၀ ရက်) နံနက်ပိုင်းအချိန်တွင် ကျိုးကျသွားပြီဖြစ်ကြောင်း စုံစမ်းသိရသည်။
ယနေ့ (အောက်တိုဘာလ ၃၀) နံနက်ပိုင်းအချိန်တွင် လားရှိုး-မူဆယ် ပြည်ထောင်စုကားလမ်းမပေါ်ရှိ သိန္နီမြို့အဝင်မှ ကုန်သွယ်ရေးလမ်းကြောင်းအတွက် ဆက်သွယ်ထားသော တံတား (အဓိကကျသည့် တံတားကြီး) သည် ကျိုးကျသွားပြီဖြစ်ကြောင်း ကိုယ်တိုင်သွားရောက်ကြည့်ရှုခဲ့သူ ဒေသခံတစ်ဦးက ပြောသည်။
“ ဟုတ်တယ်။ တံတားက တကယ်ကျိုးသွားပြီ။ သွားလာလို့မရတော့ဘူး။ အခုတော့ အပြင်မထွက်ရဲတော့ဘူး “ ဟု ၎င်းအမျိုးသားတစ်ဦးက ပြောသည်။
အလားတူ တအာင်း (ပလောင်) အမျိုးသား လွတ်မြောက်ရေးတပ်မတော် TNLA တပ်ဖွဲ့ဝင် တပ်သားတစ်ဦးကလည်း အဆိုပါ တံတားသည် စစ်ကောင်စီ၏ စစ်ကူနှင့် စစ်ထောက်ပို့များ သယ်ယူပို့ဆောင်ရေးမှာ အဓိကအသုံးပြုသည့် တံတားဖြစ်သည့်အတွက် ဖောက်ခွဲဖျက်စီးခဲ့ကြောင်း ၎င်းရဲ့ လူမှုကွန်ရက်ပေါ်၌ ရေးသားဖြန့်ဝေထားသည်။
တစ်ဖက်တွင် ကွတ်ခိုင်နှင့် နမ့်ဖတ်ကာကြားရှိ နမ့်ခိုင်စစ်ဆေးရေးဂိတ်တံတားအနီး စစ်ကောင်စီဂိတ်ကို ညီနောင်မဟာမိတ်တို့က တိုက်ခိုက်နေသည့်အတွက် ယခုလို ဖောက်ခွဲပစ်လိုက်ခြင်းဖြစ်ကြောင်း ရေးသား ဖော်ပြထားသည်။
လက်ရှိမှာ သိန္နီမြို့အတွင်း ပြည်ထောင်စုလမ်းမကြီးသည်လည်း ဖျက်ဆီးခံရကြောင်း ဒေသခံအမျိုးသားတစ်ဦးက ဆက်ပြောသည်။
“ ဟုတ်တယ်။ တံတားက ကျိုးသွားပြီ။ အခု သန္နီမြို့ထဲမှာလည်း လမ်းတွေ ထူးထားတယ်။ ကားသွားလာလို့မရ “ ဟု ၎င်းကဆိုသည်။
ထို့အပြင် နောင်ချို-ကျောက်မဲ-လားရှိုး-မူဆယ်-ချင်းရွှေဟော် စသည့် လမ်းပိုင်းအား ဖြတ်သန်း သွားလာခွင့် တားမြစ်ထားဆဲဖြစ်ရာ မည်သူမဆို ယာဉ်ဖြင့်ဖြတ်သန်းသွားလာပါက စစ်တပ်ထောက်ပို့ယာဉ်အဖြစ် သတ်မှတ်၍ ပြင်းထန်စွာတိုက်ခိုက် ချေမှုန်းသွားမည် ဟု MNDAA မှ အောက်တိုဘာ ၂၇ ရက်၌ ထုတ်ပြန်ထားသည်။
Leave a Comments