သျှမ်းပြည် လောက်ကိုင်မြို့နယ်အတွင်း ယနေ့ (အောက်တိုဘာလ ၂၉ ) ရက်မှစပြီး အခြေအနေများ ရှုပ်ထွေးမှုကြောင့်ဆိုကာ ညအမိန့်ထုတ်ပြန်လိုက်ကြောင်း သတင်းသိရှိရသည်။

မြန်မာစံတော်ချိန် ည ၁၀ နာရီမှ နံနက် ၄ နာရီခွဲအချိန်ထိ ညမထွက်ရအချိန်အဖြစ် သတ်မှတ်ထားပြီး လိုက်နာခြင်း မရှိပါက ဉပဒေနှင့်အညီ အရေးဆောင်ရွက်သွားမည်ဟု ကိုးကန့် MNDAA မှ ထုတ်ပြန်ထားကြောင်း ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ မြို့ထဲတော့ လောလောဆယ် အဆင်ပြေတယ်။ အပြင်မထွက်ရဘူး။ ညမထွက်ရအမိန့်ထုတ်ထားတယ်။ စားစရာတွေတော့ ဝယ်စုထားရတာပေါ့။ ဆန်ဈေးတွေတော့ ရှယ်တက်နေတယ်။ ပိုက်ဆံရှိတာတောင်မှ ဝယ်လို့မရတဲ့အခြေအနေဖြစ်တယ်။ ဖွင့်လည်းမဖွင့်ဘူး၊ ရောင်းလည်းမပေးဘူး “ ဟု ၎င်းဒေသခံ အမျိုးသမီးတစ်ဦးက ပြောသည်။

ယခင်က ဆန်တစ်အိတ်လျှင် တရုတ်ယွမ်ငွေ ၂၅၀ ယွမ် ( ကျပ်ငွေ ၁ သိန်း) ရှိသော်လည်း လက်ရှိမှာ ဆန်တစ်အိတ်လျှင် ယွမ်ငွေ ၁,၀၀၀ (ကျပ်ငွေ ၄ သိန်းနီးပါး) အထိ မြင့်တက်နေလျက်ရှိကြောင်း ၎င်းက ဆက်ပြောသည်။

အလားတူ သျှမ်းပြည် ဟိုပန်မြို့နယ်တွင်လည်း တိုက်ပွဲကြောင့် လမ်းကြောင်းပိတ်ဆို့ခြင်း၊ တံတားကျိုး ပြတ်ခြင်းကြောင့် ကုန်သွင်း၊ ထွက်ကုန် ပြတ်တောက်ကာ စားနပ်ရိက္ခာကို အလုအယက် ပြေးဝယ်နေရကြောင်း ဟိုပန်မြို့ဒေသခံတစ်ဦးက ပြောသည်။

“ ဒီမှာတော့ ကုန်ဈေးနှုန်းတွေ တက်နေတယ်။ အရင်က ၁၉ ပြည်လောက်ရှိတဲ့ ဆန်တစ်အိတ်ကို ကျပ် ၁ သိန်းနဲ့ ရောင်းတာ။ အခုတော့ ဆန်တစ်အိတ်ကို ၂ သိန်းကျော်ပြီ။ ကျနော်တို့တွေ အလုအယက်နဲ့ ဝယ်ထားရတာ အခုတော့ ရောင်းဖို့မကျန်တော့ဘူး။ တံတားတွေလည်းပြတ်၊ လမ်းတွေလည်း ပိတ်တော့ လာမရဘူးလေ “ ဟု ၎င်းအမျိုးသားတစ်ဦးက ပြောသည်။

ပြီးခဲ့သည့် (အောက်တိုဘာလ ၂၇ ရက်)မှစပြီး ဖြစ်ပွားခဲ့သည့် စစ်ကောင်စီတပ်ဖွဲ့နှင့် ညီနောင်မဟာမိတ်သုံးဖွဲ့၊ ပူးပေါင်းတပ်ဖွဲ့တို့အကြား တိုက်ပွဲကြောင့် နယ်မြေဒေသအတွင်း တည်ငြိမ်မှုမရှိရာ ကုန်ဈေးနှုန်း မြင့်တက်လာရခြင်း ဖြစ်သည်။