သျှမ်းပြည် နောင်ချိုမြို့အနီး ကျောက်ကြမ်းရွာရှိ စစ်ကောင်စီတပ် ခမရ-၁၁၄ မှ လက်နက်ကြီးဖြင့် ရမ်းသမ်းပစ်ခတ်နေကြောင်း စုံစမ်းသိရသည်။

ယနေ့ (အောက်တိုဘာ ၂၉ ရက်) နံနက် ၄ နာရီအချိန်ခန့်မှ စတင်ပြီး နောင်ချိုမြို့အနီး ကျောက်ကြမ်းကျေးရွာရှိ စစ်ကောင်စီတပ်ကို TNLA တပ်ဖွဲ့နှင့် မန္တလေး-PDF တပ်ဖွဲ့တို့က ပူးပေါင်းတိုက်ခိုက်ခဲ့ရာ စစ်ကောင်စီတပ် အထိနာသဖြင့် လက်နက်ကြီးများ ရမ်းသမ်းပစ်ခတ်နေကြောင်း နောင်ချိုဒေသခံများက ပြောသည်။

“မနက်အစောကြီး ၄ နာရီလောက်ကတည်းက စပစ်နေတာ။ စစ်ကောင်စီတပ်ထဲက အထိနာမယ်ထင်တယ်။ ၇ နာရီလောက်ကျတော့ ဂျက်လေယာဉ်နဲ့ပါ လာဝဲပြီး ပစ်တာ။ ၁၀ နာရီခွဲလောက်အထိ ဂျက်လေယာဉ်နဲ့ ၃ ခါ မြို့ပေါ် လာဝဲတာ။ အခုတော့ ခမရ-၁၁၄ တပ်ထဲကနေ လက်နက်ကြီးနဲ့ ရမ်းထုနေတဲ့ အသံကြားရတယ်”ဟု နောင်ချိုမြို့ခံတစ်ဦးက သျှမ်းသံတော်ဆင့်ကို ပြောသည်။

ယနေ့နံနက် (အောက်တိုဘာ ၂၉ ရက်) တိုက်ပွဲအတွင်း စစ်ကောင်စီအလောင်း ၆ လောင်း၊ လက်နက် ၇ လက်၊ ၆၀ မမ (60 mm) မော်တာ ၁ လုံး၊ လက်နက်ခဲယမ်းနှင့် စစ်အသုံးအဆောင်ပစ္စည်းများ သိမ်းဆည်းရမိခဲ့သည်ဟု TNLA တပ်ဖွဲ့၏ သတင်းနှင့် ပြန်ကြားရေးဌာနက ထုတ်ပြန်ထားသည်။

လက်ရှိတွင် နောင်ချိုမြို့နယ်ရှိ ဂုတ်တွင်းလမ်းပိုင်း၌ ယာဉ်သွားလာမှုမရှိဘဲ ယမန်နေ့ (အောက်တိုဘာ ၂၈ ရက်)က ဆိုင်ကယ်မောင်းနှင်သူတစ်ဦး သေနတ်ထိမှန်ပြီး စစ်ကားတစ်စီးမှာ မီးလောင်နေသည်ဟု နောင်ချိုဒေသခံထံများထံမှ သိရသည်။

“ညီနောင်မဟာမိတ် ၃ ဖွဲ့နဲ့ PDF တပ်ဖွဲ့တွေက သျှမ်းပြည်တောင်ပိုင်းကနေ လာမယ့် စစ်ကောင်စီရဲ့ စစ်ကူတွေကို ဖြတ်တောက်ချင်တာလို့ ပြောလို့ရတယ်။ အခုတောင် အောင်ပန်းဘက်ကလာတဲ့ စစ်ကူတွေက ရပ်စောက်အရောက်မှာ ကုန်းကြောင်းနဲ့ မြောက်ပိုင်းကို ကူးနေတယ်လို့ ကြားတယ်”ဟု နောင်ချိုမြို့ ဒေသခံတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် အောက်တိုဘာလ ၂၆ ရက်နေ့ကလည်း နောင်ချိုမြို့နယ် သံဘိုရွာ နတ်စင်ကုန်းရှိ စစ်ကောင်စီ တပ်စခန်း ၁ ခုအား TNLA နှင့် မန္တလေး-PDF ပူးပေါင်းတပ်ဖွဲ့တို့က သိမ်းပိုက်ရရှိခဲ့သည်ဟု ထုတ်ပြန်ထားပြီး စစ်ကောင်စီတပ် လက်နက်ကြီးကြောင့် သံဘိုရွာ ဘုန်းကြီးကျောင်းမှာ မီးလောင်ပျက်စီးသွားသည်ဟု သိရသည်။

ညီနောင်မဟာမိတ် ၃ ဖွဲ့တို့၏ “စစ်ဆင်ရေး-၁၀၂၇”ဖော်ဆောင်ရာ တိုက်ပွဲဖြစ်ပွားနေသည့် အရပ်ဒေသများသို့ ပြည်သူများအနေဖြင့် ဘေးအန္တရာယ်မှ ရှောင်ရှားနိုင်ရန်အတွက် ခရီးသွားလာခြင်း မပြုလုပ်ရန်လည်း သတိပေးထားသည်။