သျှမ်းမြောက် ညီနောင်မဟာမိတ်သုံးဖော် နှင့် အာဏာသိမ်း စစ်ကောင်စီ တို့ တိုက်ပွဲများကြောင့် စစ်ဘေးရှောင် နေကြရသည့် ကိုးကန့်ဒေသမှ ပြည်သူ ၅၀၀၀ ကျော်ကို ကူညီထားပေးကြောင်း “ဝ” ပြည်သွေးစည်းညီညွတ်ရေးပါတီ ပြင်ပဆက်ဆံရေးတာဝန်ခံ ဦးညီရန်း ၏ ပြောကြားချက်အရ သိရသည်။
အောက်တိုဘာလ ၂၇ရက်တွင် ချင်းရွှေဟော်မြို့ကို ကိုးကန့်တပ်ဖွဲ့ MNDAA မှ သိမ်းပိုက်ထားရှိကြောင်း ကြေငြာပြီးနောက် တိုက်ပွဲများ ဆက်လက်ဖြစ်ပွားနေရာ ကိုးကန့်၊လောက်ကိုင်မှ စစ်ဘေးရှောင် ဒေသခံများ ချင်းရွှေဟော်မြို့၏ အရှေ့တောင်ဘက်ခြမ်းရှိ ” ဝ ” နယ်မြေတစ်ခုဖြစ်သည့် နမ့်တစ် မြို့အထိပြေးလွှားရောက်ရှိလာခြင်းဖြစ်ကြောင်း သိရသည်။
” မနေ့က ည ဖက်အထိကို တဖွဲဖွဲရောက်နေကြတုန်းပါ။ လူကြီးတွေက စည်းကမ်းတွေ ထုတ်ပေးထားတယ်။တည်းခိုခန်းတွေ၊ဟိုတည်တွေ၊အိမ်ငှါးခတွေ ဈေးတက်မယူကြဖို့၊ စားသောက်ကုန်ပစ္စည်းတွေအပေါ်လည်း ဈေးတင်မရောင်းကြဖို့နဲ့ မလိုက်နာသူတွေကိုလည်း ထိထိရောက်ရောက် အရေးယူသွားမယ်လို့ အသိပေးစာ ထုတ်ပြန်ထားပါတယ်” လို့ “ဝ”တပ်ဖွဲ့ဝင်တစ်ဦးမှ ပြောသည်။
မြောက်ပိုင်းမဟာမိတ်ညီနောင် အဖွဲ့အစည်း (၃) ဖွဲ့အနေဖြင့် ၁၀၂၇ စစ်ဆင်ရေးကို အောက်တိုဘာလ ၂၇ ရက်နေ့ မနက် ၄ နာရီ၌ တစ်ပြိုင်နက်စတင်ပြုလုပ်ခဲ့ကြပြီး အောက်တိုဘာလ ၂၈ရက်အထိစစ်ကောင်စီ စခန်းပေါင်း ၃၀ ကျော် ကို တိုက်ခိုက်သိမ်းပိုက်ရရှိထားကြောင်း MNDAA အဖွဲ့၏ ထုတ်ပြန်ချက်များအရ သိရသည်။
