ချင်းရွှေဟော်တွင် အရပ်သား တစ်ထောင်ကျော်ပိတ်မိနေ၊ မိသားစုဝင်များ စိုးရိမ်နေ

သျှမ်းပြည် မြောက်ပိုင်း ချင်းရွှေဟော်မြို့ တွင် စစ်ကောင်စီ နှင့် ကိုးကန့်တပ်ဖွဲ့တို့သည် ယမန်နေ့ (အောက်တိုဘာ ၂၇) ရက်မှ စတင်ပြီး တိုက်ပွဲ ပြင်းထန်ခဲ့ရာ ပြည်သူ တစ်ထောင်ကျော် ပိတ်မိနေကြောင်း စုံစမ်းသိရသည်။

အဆိုပါ ပိတ်မိနေသည့် ပြည်သူ တစ်ထောင်ကျော်သည် ချင်းရွှေဟော် ကယ်ဆယ်ရေးစခန်းတွင် ရှိနေသော်လည်း လက်ရှိမှာ တိုက်ပွဲများ ဆက်လက်ဖြစ်ပွားနေသဖြင့် စိုးရိမ်နေကြကြောင်းလည်း ပိတ်မိနေသူ တစ်ဦး၏ မိသားစုဝင်က သျှမ်းသံတော်ဆင့်ကို ပြောသည်။

“ ကျနော်ရဲ့ အမျိုးသမီးနဲ့ မိတ်ဆွေတွေက ချင်းရွှေဟော် ကယ်ဆယ်ရေးစခန်းမှာ ပိတ်မိနေတာ။ မနေ့က သူတို့ တရုတ်ပြည်ဘက် ဝင်တာ အဝင်မခံဘူး။ မနေ့ ညကလည်း လက်နက်ကြီးတွေကျတယ်ပြောတယ်။ သူတို့အတွက် မလုံခြုံဘူးဖြစ်နေတယ်” ဟု ပိတ်မိနေသူတစ်ဦး၏ အမျိုးသားက ဆိုသည်။

ချင်းရွှေဟော် ကယ်ဆယ်ရေးစခန်းတွင် ပြည်သူ တစ်ထောင်ကျော်ရှိပြီး၊ တဲထိုးပြီးနေရသော်လည်း အိပ်စရာ အခင်းမရှိခြင်း၊ စောင်မရှိခြင်းတို့ကြောင့် ဒုက္ခရောက်နေကြောင်း၊ လက်နက်ကြီး ပစ်ခတ်သံများလည်း ဆက်တိုက်ကြားနေသဖြင့် စိုးရိမ်မှုရှိကြောင်းလည်း ၎င်းအမျိုးသားက ပြောသည်။

“ သူတို့နဲ့ ကျနော် ဒီနေ့ (အောက်တိုဘာ ၂၈) ရက် နေ့လယ် ၂ နာရီထိ အဆက်အသွယ်ရတယ်။ ဖုန်းနဲ့တော့မရဘူး။ လိုင်းနဲ့ဆက်သွယ်တာ၊ အခု လိုင်းလည်း မရတော့ဘူး။ ဆက်သွယ်မရဘူး။ စိတ်အရမ်းပူနေတယ်” ဟု သူက ထပ်လောင်းပြောသည်။

ထိုစစ်ရှောင်များသည် တစ်ရက်လျှင် ထမင်း တနပ်သာ စားသုံးနေရကြောင်း ပိတ်မိနေသည့် မိသားစုဝင်များက သျှမ်းသံတော်ဆင့်ကိုပြောသည်။

လက်ရှိမှာ ချင်းရွှေဟော်ဘက်တွင် ဖုန်းလိုင်းများ၊ အင်တာနက်လိုင်းများ ပြတ်တောက်နေသဖြင့် ဒေသခံများနှင့် ချိတ်ဆက်မရပေ။

ချင်းရွှေဟော် ဒေသခံအချို့သည် မြို့ထဲတွင် မနေရဲသဖြင့် မိမိ၏ စိုက်ခင်းများထဲသို့ သွားရောက်နေထိုင်နေကြသည်။

ယမန်နေ့ (အောက်တိုဘာ ၂၇) ရက် နံနက် ၄ နာရီဝန်းကျင်တွင် ကိုးကန့်ဒေသ ချင်းရွှေဟော်မြို့တွင် တိုက်ပွဲဖြစ်ပွားပြီး စစ်ကောင်စီ တပ်စခန်းတစ်ခုကို MNDAA က သိမ်းယူနိုင်ခဲ့သည်။ ထို့ ပြင် နံနက် ၇ နာရီခွဲကျော်တွင်လည်း ဟိုပန်တာချန်ခုတ်၊ ချင်းရွှေဟော် နယ်စပ်ဂိတ်၊ မာလူအိုက်ဖိုင်၊ ပိုက်တာပေါက်ပေါက်၊ နန်တောင်ဟော်တောင်ကုန် စသည့် စစ်ကောင်စီစခန်းများကို တပြိုင်နက် သိမ်းယူနိုင်ခဲ့သည်။

တိုက်ပွဲကြောင့် ချင်းရွှေဟော်ရှိ အရပ်သားများကို ပြင်ပသို့ ထွက်ပြေး တိမ်းရှောင်ကြပြီး၊ ပြည်သူများ၏ လုံခြုံရေးကို ကာကွယ်ပေးရန် အတွက် MNDAA မှ လုံခြုံသည့်နေရာသို့ ပို့ဆောင်ခဲ့ပြီး ရှေ့တန်းသတင်းအရ လုံခြုံသည့်နေရာ ပို့ဆောင်ခံရပြည်သူ တစ်ထောင်ကျော်သည် အခြားနယ်မြေမှလာရောက်အလုပ်လုပ်သူ (၆၀၀) ကျော်ပါဝင်ကြောင်း ကိုးကန့် ထုတ်ပြန်ချက်အရ သိရသည်။