သျှမ်းပြည် လားရှိုးမြို့နယ်အတွင်း စစ်ကောင်စီတပ်မှ လက်နက်ကြီး ရမ်းသမ်းပစ်ခတ်မှုကြောင့် မိုင်းတင်ကျေးရွာအုပ်စုရှိ ပြည်သူနေအိမ် ၄ အိမ် ထိခိုက်ပျက်စီးခဲ့ကြောင်း စုံစမ်းသိရသည်။
ယမန်နေ့ (အောက်တိုဘာ ၂၇ ရက်) ည ၇ နာရီခန့်တွင် စစ်ကောင်စီတပ် ခလရ-၆၈ မှ ၁၂၀ မမ (120 mm)အရွယ်ရှိ လက်နက်ကြီးများဖြင့် ရမ်းသမ်းပစ်ခတ်မှုကြောင့် လားရှိုးမြို့နယ် မိုင်းတင်အုပ်စု ကောင်းကန်ရွာအတွင်း ကျရောက်ပေါက်ကွဲပြီး ပြည်သူနေအိမ် ၄ အိမ် ထိခိုက်ပျက်စီးခဲ့သည်ဟု လားရှိုးဒေသခံများက ပြောသည်။
“ခလရ-၆၈ တပ်က ပစ်လာတဲ့လက်နက်ကြီးက အိမ်ပေါ်ကျလာတာ။ တစ်အိမ်လုံး မီးလောင်သွားတဲ့အပြင် ဆိုင်ကယ်တစ်စီးလဲ မီးထဲပါသွားတယ်။ နွားတစ်ကောင်လဲ သေတယ်။ လက်နက်ကြီးကျတုန်းကတော့ အိမ်သားတွေက မိုင်းတင်ဘုန်းကြီးကျောင်းမှာ စစ်ဘေးရှောင်နေကြပြီ။ အိမ်သားတွေတော့ ဘာမှမဖြစ်လိုက်ဘူး။ တန်ဖိုးအားဖြင့် သိန်း ၂၀၀ လောက် ပျက်စီးသွားတာပေါ့”ဟု တိုက်ပွဲအတွင်း ပိတ်မိနေသည့် မိုင်းတင်ရွာမှ ဒေသခံတစ်ဦးက သျှမ်းသံတော်ဆင့်ကို ပြောသည်။
ထို့အပြင် ယမန်နေ့ (အောက်တိုဘာ ၂၇ ရက်) ညသန်းခေါင်အချိန်က လက်နက်ကြီး ထပ်မံကျရောက်ခြင်းကြောင့် ကောင်းကန်ကျေးရွာအတွင်းရှိ ပြည်သူနေအိမ် ၃ အိမ် ထပ်မံပျက်စီးခဲ့သည်။
“အခု ရွာသားတွေအကုန်လုံး စစ်ဘေးရှောင်ကုန်ကြပြီ။ တချို့က ဘုန်းကြီးကျောင်းမှာ သွားနေကြတယ်။ တချို့က နမ့်ယော်မြစ်ဘက်၊ တောင်ယာတဲတွေဘက် စစ်ဘေးရှောင်ကြတာလဲ ရှိတယ်။ အခု ကျနော်တို့ မိုင်းတင်အုပ်စုက စစ်ဘေးရှောင်ဖို့ သွားနေကြတုန်းပဲ။ သေနတ်သံလည်း မတိတ်သေးဘူး”ဟု မိုင်းတင်ရွာမှ စစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။
လားရှိုးမြို့ အထက်မန်အိုင်တွင်လည်း ယမန်နေ့ (အောက်တိုဘာ ၂၇ ရက်) ညအချိန်က စစ်ကောင်စီတပ်မှ ရမ်းသမ်းပစ်ခတ်သည့် လက်နက်ကြီးသံကြောင့် အမျိုးသမီး ၁ ဦး သေဆုံးသွားသည်ဟု သိရသော်လည်း အတည်ပြုနိုင်ခြင်း မရှိသေးပါ။
စစ်ကောင်စီနှင့် ညီနောင်မဟာမိတ် ၃ ဖွဲ့တို့၏ တိုက်ပွဲကြောင့် လားရှိုးမြို့နယ်ရှိ ကျေးရွာပေါင်း ၂၅ ရွာခန့်မှ ပြည်သူ ၃၀၀၀ ကျော်သည် မြို့ပေါ်နှင့်ကျေးရွာရှိ ဘုန်းကြီးကျောင်းများတွင် ရောက်ရှိခိုလှုံနေကြရသည်။
ယမန်နေ့ (အောက်တိုဘာ ၂၇ ရက်) ကလည်း မူဆယ်မြို့နယ် ပန်ဆိုင်း(ကြူကုတ်)ရှိ စစ်ကောင်စီတပ်စခန်းမှ ပစ်ခတ်လိုက်သည့် လက်နက်ကြီးသည် တရုတ်နိုင်ငံအတွင်း ကျရောက်ပေါက်ကွဲခဲ့ပြီး အဆောက်အဦးအချို့ ထိခိုက်ပျက်စီးခဲ့သည်။
