မြန်မာ-တရုတ်နယ်စပ်ဒေသ မူဆယ်-လားရှိုး-ချင်းရွှေဟော် ကုန်သွယ်ရေးလမ်းဇုံများ ပိတ်ထားနေဆဲဖြစ်သဖြင့် ဖြတ်သန်းသွားလာ၍ မရသေးကြောင်း ကားသမားထံများထံမှ သတင်းသိရသည်။
ယနေ့ (အောက်တိုဘာလ ၂၈ )ရက်အထိ လားရှိုး-မူဆယ်၊ လားရှိုး-ချင်းရွှေဟော် လမ်းပိုင်အား လုံခြုံရေး အခြေအနေအရ ဖြတ်သန်းသွားလာ၍ မရသေးကြောင်း၊ ဖြတ်သန်းသွားလာနေသူ အချို့သည်လည်း စစ်ကောင်စီ၏ စစ်ရေးဂိတ်၌ ရပ်နားနေရကြောင်း မူဆယ်ကားသမားတစ်ဦးက သျှမ်းသံတော်ဆင့်ကို ပြောသည်။
“ မူဆယ် ၁၀၅ မိုင်ကို ကျော်လာရင် နမ့်ပေါ့တံတားနဲ့ နမ်ဖတ်ကာမှာ ပိတ်နေတယ်။ အဲ့မှာ စစ်ကောင်စီ၊ ရဲတပ်ဖွဲ့တွေနဲ့ ပြည်သူ့စစ်စောင့်ပြီး လမ်းတွေပိတ်တာ ဘယ်သူမှသွားလာလို့မရဘူး။ နမ့်ခိုင်တံတားမှာလည်း စောင့်နေတယ်။ သိန္နီဘက်လည်း သွားလို့မရသေးဘူး။ မနေ့ကဈေးသွားရောင်းတဲ့သူတွေတောင် ပြန်မလာသေးဘူး “ ဟု ၎င်းကားသမားတစ်ဦးက ပြောသည်။
လက်ရှိမှာ မူဆယ်-သိန္နီ-လားရှိုး-ကွမ်းလုံ-ချင်းရွှေဟော် လမ်းပိုင်းများအား လုံခြုံရေး အခြေအနေအရ ပိတ်ထားသေးကြောင်း သိရသည်။
ယင်းကဲ့သို့ လမ်းပိုင်းများ ပိတ်ထားလျက်ရှိသဖြင့် ခရီးသွားသူများ၊ ကုန်တင်ကားများ အခက်အခဲ ဖြစ်နေသည်ဟု လားရှိုးမြို့ရောက်ကားသမားတစ်ဦးက ဆက်ပြောသည်။
“ ကျနော်တို့ ကားသမားတွေအတွက်က လမ်းပိတ်တော့ ရက်ပိုရှည်တယ်။ ပိုက်ဆံပိုကုန်တယ်လေ။ ဘယ်နှရက်ထိ ပိတ်မယ်မသိ။ တရက်လည်း တရက် ပိုက်ဆံပိုကုန်တာပေါ့” ဟု ၎င်းကားသမားက ပြောသည်။
ယမန်နေ့ (အောက်တိုဘာလ ၂၈) ရက်မှ ဖြစ်ပွားခဲ့သည့် စစ်ကောင်စီတပ်ဖွဲ့နှင့် ညီနောင်မဟာမိတ်သုံးဖွဲ့၊ တော်လှန်ရေး ပူးပေါင်းတပ်ဖွဲ့ PDF တို့အကြား တိုက်ပွဲကြောင့် မြောက်ပိုင်းကုန်သွယ်ရေးဇုံ လမ်းကြောင်းများအား ပိတ်ထားရခြင်း ဖြစ်သည်။
Leave a Comments