သျှမ်းပြည် လားရှိုးမြို့နယ်တွင် ညီနောင်မဟာမိတ် ၃ ဖွဲ့နှင့် စစ်ကောင်စီတို့၏ “စစ်ဆင်ရေး-၁၀၂၇”ကြောင့် စစ်ဘေးရှောင်ဦးရေ စုစုပေါင်း ၃၀၀၀ ကျော်အထိ တိုးလာသည်ဟု စုံစမ်းသိရသည်။
လားရှိုးမြို့နယ်၌ ယမန်နေ့ (အောက်တိုဘာ ၂၇ ရက်) ညပိုင်းတွင် တိုက်ပွဲ ပြန်လည်ဖြစ်ပွားမှုကြောင့် လားရှိုးမြို့ပေါ်နှင့် ကျေးရွာဘုန်းကြီးကျောင်းများတွင် စစ်ဘေးရှောင် ၃၀၀၀ ကျော် လာရောက်ခိုလှုံနေရသည်ဟု လားရှိုးဒေသခံများက ပြောသည်။
လားရှိုးမြို့ သီရိမင်္ဂလာ မန်ဆူရှမ်းကျောင်းတွင် စစ်ဘေးရှောင်ဦးရေ ၂၀၀၀ ခန့်၊ ကုန်းသာကျေးရွာတွင် စစ်ဘေးရှောင် ၅၀၀ နီးပါး၊ မိုင်းတင်ကျေးရွာ ဘုန်းကြီးကျောင်းတွင် လည်း စစ်ဘေးရှောင် ၅၀၀ ခန့်၊ ဟိုပိတ်ကျေးရွာ ဘုန်းကြီးကျောင်းတွင် စစ်ဘေးရှောင် ၂၅၀ ခန့်၊ စုစုပေါင်း စစ်ဘေးရှောင်ဦးရေ ၃၀၀၀ ကျော် လာရောက်ခိုလှုံနေသည်ဟု သျှမ်းသံတော်ဆင့်က စုံစမ်းသိရသည်။
ကုန်းသာကျေးရွာနှင့် မိုင်းတင်ကျေးရွာတို့မှ စစ်ဘေးရှောင် ပြည်သူများသည် လမ်းပန်းဆက်သွယ်ရေး ခက်ခဲသည့်အတွက် လုံခြုံရေးအခြေအနေ စိုးရိမ်နေရပြီး လားရှိုးမြို့ပေါ် စစ်ရှောင်စခန်းများသို့ ပြောင်းရွှေ့နေကြသည်။
“စစ်ဘေးရှောင်တွေက အရမ်းများလာပြီ။ ဒီထက်ပိုများလာရင်တော့ စားရေးသောက်ရေး ခက်ခဲမှာ။ စစ်ရှောင်အများစုက အိမ်ကနေ ရုတ်တရက်ကြီး ပြေးလာကြတော့ ဘာမှ မယူလာနိုင်ကြဘူး။ အခုက လားရှိုးမှာ အရမ်းအေးတော့ အိပ်ယာခင်းနဲ့ စောင်တွေ လိုအပ်နေတယ်။ ဆေးဝါးတွေနဲ့ သွားတိုက်ဆေးတို့လို တစ်ကိုယ်ရေသုံးပစ္စည်းတွေလဲ အရမ်းလိုအပ်နေတယ်”ဟု လားရှိုးမြို့ မန်ဆူကျောင်းတိုက်တွင် စစ်ဘေးရှောင်နေသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယမန်နေ့ (အောက်တိုဘာ ၂၇ ရက်) ည ၇ နာရီအချိန်ခန့်မှ စတင်ပြီး ညသန်းခေါင်ကျော် အချိန်အထိ လားရှိုးမြို့ စစ်ကောင်စီတပ်များမှ လက်နက်ကြီးများဖြင့် မြို့ပြင်ဘက်သို့ တရစပ် ပစ်ခတ်တာကြောင့် မြို့ခံပြည်သူများမှာ စိုးရိမ်ထိတ်လန့်နေကြသည်။
“လားရှိုးမှာ လက်ရှိငြိမ်နေသေးတယ်ဆိုပေမယ့် သတင်းကြားတာတော့ မက်ခိနု၊ ကောင်းစိမ်း၊ ကောင်းဖြူ၊ ဝမ်မွန်း ဒီရွာတွေဘက်မှာ ညီနောင်မဟာမိတ်အဖွဲ့တွေ ထပ်ရောက်လာတယ် ပြောတယ်။ စစ်ကောင်စီတပ်ဘက်ကလည်း အင်အားထပ်ဖြည့်တယ်လို့ ကြားတယ်”ဟု လားရှိုးဒေသခံတစ်ဦးက သျှမ်းသံတောင်ဆင့်ကို ပြောသည်။
လားရှိုးမြို့နယ်ရှိ ဒေသခံပြည်သူများ တိုက်ပွဲထပ်မံဖြစ်ပွားမည်ကို စိုးရိမ်လျက်ရှိကာ မြို့ပေါ်နှင့် ကျေးရွာဘုန်းကြီးကျောင်းများသို့ လာရောက်ခိုလှုံနေပြီး စစ်ဘေးရှောင်ဦးရေမှာ ထပ်မံတိုးလာနိုင်သည်။
Leave a Comments