သျှမ်းပြည် လားရှိုးမြို့နယ်တွင် စစ်ကောင်စီတပ်နှင့် ညီနောင်မဟာမိတ် ၃ ဖွဲ့တို့ ဖြစ်ပွားခဲ့သည့် တိုက်ပွဲများကြောင့် စစ်ဘေးရှောင် အရေအတွက်မှာ ၆၀၀ နီးပါး ရှိလာပြီဖြစ်ကြောင်း စုံစမ်းသိရသည်။
လားရှိုးမြို့နယ်၌ ယနေ့ (အောက်တိုဘာ ၂၇ ရက်) နံနက် ၄ နာရီအချိန်ခန့်တွင် စတင်ဖြစ်ပွားသည့် တိုက်ပွဲကြောင့် လားရှိုးမြို့ သီရိမင်္ဂလာ မန်ဆူရှမ်းကျောင်းတွင် စစ်ဘေးရှောင် ၃၅၀ ခန့်နှင့် ဟိုပိတ်ကျေးရွာ ဘုန်းကြီးကျောင်းတွင် စစ်ဘေးရှောင် ၂၅၀ ခန့်၊ စုစုပေါင်း စစ်ဘေးရှောင်ဦးရေ ၆၀၀ ခန့် လာရောက်ခိုလှုံနေသည်ဟု သျှမ်းသံတော်ဆင့်က စုံစမ်းသိရသည်။
“ရွာမှာနေရင်လဲ ကြောက်ရတယ်။ ကိုယ့်ပေါ် ဗုံးကျလာမှာလဲ ကြောက်ရတယ်လေနော်။ သူတို့တွေ တစ်ဖက်နဲ့တစ်ဖက် ပြန်တိုက်ကြမှာလဲ စိတ်ပူတယ်။ အစကတော့ မပြေးတော့ဘူးပေါ့။ မနက် ၁၀ နာရီလောက် ရောက်တော့ ပရဟိတအဖွဲ့တွေ ရွာမှာလာကြိုတာ၊ အများကြီးပဲ စစ်ရှောင်လာကြတာ”ဟု လားရှိုးမြို့ မန်ဆူရှမ်းကျောင်းသို့ စစ်ဘေးရှောင်လာသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ယနေ့ (အောက်တိုဘာ ၂၇ ရက်) နံနက် ၉ နာရီ အချိန်ခန့်က စစ်ကောင်စီတပ်မှ လေယာဉ် ၂ စီးဖြင့် လားရှိုးမြို့နယ်အတွင်းရှိ ဝမ်မွန်း၊ ကုန်းသာ၊ ဟိုနား၊ ပန်စုံနှင့် ကောင်းဖြူကျေးရွာ အနီးတဝိုက်ကို လေယာဉ်ဖြင့် ဗုံးကြဲတိုက်ခိုက်ခဲ့သည်ဟု စုံစမ်းသိရသည်။
“မနက် ၉ နာရီ အချိန်လောက်မှာ စစ်ကောင်စီတပ်ဘက်က လေယာဉ် ၂ စီးတက်လာတယ်။ သူတို့က အပြန်အလှန် ပစ်ကြတော့ ကျမတို့ကို ဗုံးထိမှာကြောက်တာပေါ့။ ပြီးခဲ့တဲ့နှစ်က အိမ်နားမှာ ဗုံးခိုကျင်းတူးထားတာရှိတယ်။ ကျမက အဲ့ဒီကို ပြေးသွားတဲ့အချိန် လေယာဉ်နဲ့ ဗုံးကြဲချတာ။ ကျမတောင် ကပ်သီလေးပဲ လွတ်လာတာ၊ မဟုတ်ရင် ဗုံးစာထိမှာ။ ကံကောင်းလို့သာ လွတ်လာတယ်ပြောရမှာ”ဟု ၎င်းအမျိုးသမီးက သျှမ်းသံတော်ဆင့်ကို ဆက်ပြောသည်။
လားရှိုးမြို့နယ်အတွင်းရှိ မက်ခိနု၊ ပန်စိန်း၊ ကောင်းဖြို၊ ဝမ်မွန်းနှင့် ဟိုနမ့်ကျေးရွာတို့မှ ပြည်သူများသည် လားရှိုးမြို့ပေါ်ရှိ ဆွေမျိုးများနှင့် ဘုန်းကြီးကျောင်းများသို့ လာရောက်ခိုလှုံနေရသည်။
ယနေ့ (အောက်တိုဘာ ၂၇ ရက်) ညနေ ၄ နာရီ အချိန်ခန့်ကလည်း စစ်ကောင်စီဘက်မှ အထိနာသဖြင့် လေကြောင်းအသုံးပြုပြီး ဗုံးကြဲတိုက်ခိုက်မှု ထပ်မံပြုလုပ်လာခြင်းကြောင့် စစ်ဘေးရှောင်အရေအတွက်မှာ ထပ်တိုးလာနိုင်သည်ဟု လားရှိုးဒေသခံများက ပြောသည်။
Leave a Comments