သျှမ်းပြည် စစ်ကောင်စီ စခန်းများကို ညီနောင်မဟာမိတ်သုံးဖွဲ့မှ ဝင်ရောက်တိုက်ခိုက် သိမ်းပိုက်နိုင်ခဲ့ကြောင်း သတင်းသိရှိရသည်။

ယနေ့ (အောက်တိုဘာလ ၂၇ ရက်) နံနက် ၄ နာရီအချိန်မှစပြီး လားရှိုး၊ ချင်းရွှေဟော်၊ ကွမ်းလုံ၊ မုံးကိုး၊ နမ့်ခမ်း၊ သိန္နီ စသည့်မြို့ရှိ စစ်ကောင်စီတပ်စခန်းများကို ညီနောင်မဟာမိတ်သုံးဖွဲ့ မှ ဝင်ရောက်တိုက်ခိုက် သိမ်းပိုက်ခဲ့ကြောင်း ညီနောင်မဟာမိတ် ၃ ဖွဲ့က ထုတ်ပြန်ထားသည်။

ချင်းရွှေဟော် တံတား၊ ဟိုပန်ဒေသ ချွမ်းဟုတ်ရွာ၊ ကွမ်းလုံ၊ မုံးကိုးနှင့် လားရှုံးမြို့ရှိ စစ်ရေးအဓိကကျသော နေရာ အများအပြားကို သိမ်းပိုက်နိုင်ခဲ့ကြောင်း ရေးသားဖော်ပြထားသည်။

ထိုထဲတွင် ချင်းရွှေဟော်ရှိ စစ်တပ်ဗျူဟာကုန်းအပါအဝင် ဖောင်ဆိပ်စခန်း၊ မြို့အဝင်စစ်ဆေးရေးဂိတ်နှင့် စစ်ကောင်စီစခန်းများကို ကိုးကန့်တပ်ဖွဲ့ MNDAA မှ သိမ်းပိုက်ထားနိုင်ပြီ ဖြစ်ကြောင်း ဒေသခံအမျိုးသား တစ်ဦးက ပြောသည်။

“ ချင်းရွှေဟော်မှာတော့ ကိုးကန့်တွေ ထိန်းချုပ်နိုင်ပြီ။ စစ်ကောင်စီ စစ်ရေးဂိတ်တွေလည်း တိုက်ခံရတာ ရဲတပ်ဖွဲ့တွေ အများကြီးသေတယ်။ အခုချင်းရွှေဟော်မှာရှိတဲ့ ပြည်သူတွေလည်း တရုတ်ဘက်ကို ကူးနေပြီ “ ဟု ဒေသခံတစ်ဦးက ပြောသည်။

လက်ရှိအချိန်ထိ သျှမ်းမြောက် နေရာအနှံ့အပြားတွင် စခန်းသိမ်းတိုက်ပွဲများအပါအဝင် တိုက်ပွဲကြီး၊ တိုက်ပွဲငယ်များ ဖြစ်ပွားနေလျက်ရှိပြိး စစ်ကောင်စီဘက်မှ လက်နက်ကြီးအပြင် လေကြောင်းဖြင့် တိုက်ခိုက် နေလျက်ရှိသည်။

ထို့အပြင် လားရှိုး-ချင်းရွှေဟော်နှင့် လားရှိုး-မူဆယ်လမ်းမ တို့ကို အရေးပေါ်ပိတ်ထားလျက်ရှိပြီး ပြည်သူများ ဖြတ်သန်းသွာလာခွင့် ပြုမည်မဟုတ်ကြောင်း မြန်မာ အမျိုးသားဒီမိုကရက်တစ် မဟာမိတ်တပ်မတော် (MNDAA)က ယနေ့ ၂၀၂၃ခုနှစ် အောက်တိုဘာလ (၂၇)ရက်နေ့ တွင် သတင်းထုတ်ပြန်သည်။

ညီနောင်မဟာမိတ်တို့ရဲ့ (၁၀၂၇) စစ်ဆင်ရေးနှင့်အတူ ဗမာပြည်သူ့လွတ်မြောက်ရေး တပ်တော် PBLA အပါအဝင် ပြည်သူ့ကာကွယ်ရေးတပ် (မန္တလေး) PDF စသည့် တော်လှန်ရေး ပူးပေါင်း PDF များက ပူးပေါင်းတိုက်ခိုက်သွားမည်ဟု ကြေညာပြီး ပါဝင်တိုက်ခိုက်နေလျက်ရှိသည်။

စစ်ကောင်စီသည် ပြီးခဲ့သည့် အောက်တိုဘာလ ၂၆ ရက်နေ့မှစပြီး MNTJP/ MNDAA ၏ နန်ဖာရှမ်းစခန်း၊ မန်တုံပစခန်းနှင့် ပြောက်ကျားလှုပ်ရှားနယ်မြေများကို လေကြောင်းမှတစ်ဆင့် အဆက်မပြတ် ဗုံးကြဲတိုက်ခိုက်ခဲ့ခြင်းကြောင့် MNDAA မှ တပ်သား (၁) ဦး ကျဆုံးခဲ့ရပြီး (၄) ဦး ဒဏ်ရာရရှိခဲ့ကြောင်း ဆိုသည်။