မြန်မာ-တရုတ်နယ်စပ် ကုန်သွယ်ရေးလမ်းကြောင်း တလျှောက်ကို ယနေ့ (အောက်တိုဘာ ၂၇ ရက်) တွင် ယာယီပိတ်ပင်လိုက်ကြောင်း သတင်းရရှိသည်။
ယနေ့ (အောက်တိုဘာ ၂၇ ရက်) နံနက် ၄ နာရီအချိန်မှ စပြီး မြန်မာ-တရုတ်နယ်စပ် ကုန်သွယ်ရေး အချက်အခြာကျသော သျှမ်းမြောက် လားရှိုး၊ ချင်းရွှေဟော်၊ မူဆယ်နှင့် နမ့်ခမ်း မြို့တို့တွင် စစ်ကောင်စီနှင့် ညီနောင်မဟာမိတ် ၃ ဖွဲ့တို့ တိုက်ပွဲပြင်းထန်နေကြောင်း သိရသည်။
သျှမ်းမြောက် လားရှိုးမြို့မှ မူဆယ်နှင့် ချင်းရွှေဟော်မြို့သို့ သွားသည့် ပြည်ထောင်စုလမ်းကြီးကို ယနေ့ (အောက်တိုဘာလ ၂၇ ရက်) နံနက် ၆ နာရီတွင် အရေးပေါ် ပိတ်ပင်လိုက်ကြောင်း မြန်မာအမျိုးသား ဒီမိုကရက်တစ် မဟာမိတ်တပ်မတော် MNDAA စစ်ရေးကော်မတီက ထုတ်ပြန်ထားသည်။
ပြည်ထောင်စုလမ်းမကြီးကို အရေးပေါ် ပိတ်သိမ်းလိုက်သည့် အချိန်ကာလတွင် ဖြတ်သန်းသွားလာမည့် ယာဉ်များကို ရန်သူ၏ သယ်ယူပို့ဆောင်ရေး ယာဉ်တန်းအဖြစ် သတ်မှတ်ပြီး ပြင်းထန်စွာ တိုက်ခိုက် ချေမှုန်းသွားမည်ဖြစ်ကြောင်း ကိုးကန့်တပ်ဖွဲ့ MNDAA စစ်ရေးကော်မတီက ထုတ်ပြန်ထားသည်။
သျှမ်းပြည်မြောက်ပိုင်းတွင် တိုက်ပွဲအခြေအနေ၊ လမ်းခရီး အခြေအနေကြောင့် ကားဂိတ်၊ လေဆိပ်များပါ ယာယီ ပိတ်ထားရပြီး ပြည်ထောင်စုလမ်းမကြီးပေါ်တွင် ပိတ်မိနေသော ကုန်တင်ယာဉ်များ၊ အဝေးပြေးခရီးသည်ယာဉ်များလည်း ရှိနေကြောင်း လားရှိုးဒေသခံ ကားသမားတစ်ဦးက သျှမ်းသံတော်ဆင့်ကို ပြောသည်။
“လမ်းမှာ ပိတ်မိနေတာတွေရှိတယ်၊ ကုန်တင်ကားတွေကြတော့ ခေါင်းပြန်လှည့်လို့မရတော့ဘူး။ ကားကြီးတွေ လူတင်ကားတွေကတော့ လမ်းမှာခံနေမှာပဲ။ လားရှိုးကတော့ လုံးဝ ဝင်လို့လည်းမရဘူး။ ထွက်လို့လည်းမရဘူး”ဟု လားရှိုးဒေသခံ ကားသမားတစ်ဦးက သျှမ်းသံတော်ဆင့်ကို ပြောသည်။
ယခုကဲ့သို့ လမ်းပိတ်ပင်ခြင်းကြောင့် ပြည်သူလူထုများအတွက် အခက်အခဲများဖြစ်နေကြပြီး၊ ကွမ်းရွက်များ၊ ပုပ်သိုးလွယ်သော ကုန်ပစ္စည်းတင်သည့် ကားသမားများ၊ သီတင်းကျွတ် ကျောင်းပိတ်၍ အိမ်ပြန်သောကလေးများ၊ ဆေးကုသရန် လိုအပ်နေသည့် လူနာများအတွက် ယခုလို စစ်ပွဲများကြား လမ်းပိတ်မှုကြောင့် ပြည်သူလူထု အများအပြား ဒုက္ခရောက်ပြီး စိုးရိမ်နေရကြောင်း စုံစမ်းသိရသည်။
“ဒီလိုတွေ မြန်မြန်ပြီးစေချင်နေပြီ၊ မပြီးသေးရင် ကျနော်တို့ပဲခံရမှာ။ ဘာမှမဆိုင်တဲ့လူတွေ ဘာမှမဟုတ်တဲ့ လူတွေပါ လိုက်သေနေရတာလေ။ သူတို့လက်နတ်ကြီးတွေနဲ့ ပစ်ရင် အိမ်တွေဆုံးရှုံးရတယ်၊ မီးတွေလောင်တယ်။ လုံးဝမဖြစ်စေချင်ဘူး မြန်မြန်ပြီးစေချင်နေပြီ” ဟု ၎င်းကားသမားက ဆက်ပြောသည်။
သျှမ်းပြည်မြောက်ပိုင်းအတွင်း အောက်တိုဘာလ ၂၇ ရက် နံနက် ၄ နာရီအချိန်ခန့်မှ စ၍ လက်နက်ကြီး၊ လက်နက်ငယ် ပစ်ခတ်သံများ ဆက်တိုက်ကြားနေရပြီး လားရှိုး၊ သိန္နီ၊ ကွတ်ခိုင်၊ နမ့်ဖက်ကာ၊ နမ့်ခမ်း၊ ချင်းရွှေဟော်တို့မှာပါ တိုက်ပွဲဖြစ်ပွားနေကြောင်း စုံစမ်းသိရသည်။
