သျှမ်းပြည် ကျောက်မဲမြို့နယ် နောင်ပိန်၊ နောင်ပစ်ကျေးရွာအနီး စစ်ကောင်စီတပ်နှင့် ညီနောင်မဟာမိတ် ၃ ဖွဲ့တို့ ဖြစ်ပွားခဲ့သည့် တိုက်ပွဲကြောင့် စစ်ဘေးရှောင် ၃၀၀နီးပါး တိမ်းရှောင်နေရကြောင်း သတင်းရရှိသည်။
“စစ်ဘေးရှောင် အရေအတွက်က မနေ့က ညနေအထိ ၁၂၀ ဝန်းကျင်ရှိတယ်။ ဒီနေ့ ထပ်တိုးတာနဲ့ဆိုရင် ၁၆၀ လောက် ရှိတယ်။ အခု နောင်ပိန် အောင်ဓမ္မာရုံ စစ်ရှောင်စခန်းမှာ ရောက်နေတာ။ နီးစပ်ရာ ရွာတွေက ဆွေမျိုးအိမ်တို့၊ မိတ်ဆွေအိမ်တို့မှာ ရှောင်တာနဲ့ စုံစမ်းကြည့်မယ်ဆိုရင် စုစုပေါင်းဆိုရင် ၃၀၀ ပတ်ဝန်းကျင်လောက် စစ်ဘေးရှောင်နေကြတယ်”ဟု စစ်ဘေးရှောင်များကို ကူညီပေးနေသူတစ်ဦးက သျှမ်းသံတော်ဆင့်ကို ပြောသည်။
စစ်ဘေးရှောင်ပြည်သူများကို နောင်ပိန် အောင်ဓမ္မာရုံ စစ်ရှောင်စခန်းတွင် နေရာချထားပေးပြီး လက်ရှိတွင် စစ်ရှောင်ပြည်သူ စုစုပေါင်း ၃၀၀ ခန့် ရှိသည်ဟု သိရသည်။
စစ်ဘေးရှောင်ပြည်သူများတွင် နာမကျန်းဖြစ်နေသူများလည်း ရှိကာ ဆေးဝါးကုသမှု ပေးထားပြီး နေရေးထိုင်ရေးနဲ့ စားရေးသောက်ရေးအတွက် အခက်အခဲဖြစ်နေသည်ဟု ၎င်းက ဆက်ပြောသည်။
ယမန်နေ့ (အောက်တိုဘာ ၂၆ ရက်)က စစ်ကောင်စီတပ်နှင့် ညီနောင်မဟာမိတ် ၃ ဖွဲ့တို့သည် ကျောက်မဲမြို့နယ် နောင်ပိန်တိုက်နယ် နောင်ပစ်ကျေးရွာ အနီးတဝိုက်တွင် ထိတွေ့တိုက်ပွဲ ဖြစ်ပွားခဲ့ပြီး စစ်ကောင်စီတပ်က လေကြောင်းဖြင့် ကျေးရွာတဝိုက်ကို ဗုံးကြဲတိုက်ခိုက်ခဲ့ခြင်းကြောင့် ရွာသားများ ထွက်ပြေးတိမ်းရှောင်ရသည်ဟု ဒေသခံများက သျှမ်းသံတော်ဆင့်ကို ပြောသည်။
“နေ့လယ် ၁၂ နာရီတုန်းက လေယာဉ်နဲ့တခါ လာဝဲပြီး အုမ္မသီးဘက် သွားခဲ့တာ။ တပ်ပေါင်းစုတွေကို လာပစ်တာဖြစ်မယ်။ ညနေ ၄ နာရီကျတော့ လေယာဉ်နဲ့ နောက်တစ်ခါ နာရီဝက်လောက် လာပစ်တာ။ လေယာဉ်နဲ့လာမပစ်ခင်တုန်းက ရွာမှာ သေနတ်ပစ်သံတွေ အရင်ကြားတယ်။ အဲ့တာနဲ့ ကျတော်တို့လဲ ထွက်ပြေးလာတာ”ဟု အမည်မဖော်လိုသည့် ဒေသခံစစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတပ်သားများက မန်ကျောင်းကျေးရွာတဝိုက်တွင် လှုပ်ရှားနေပြီး ညီနောင်မဟာမိတ်များက ခဲလုံကျေးရွာအုပ်စုအတွင်း ကျေးရွာများအနီးတွင် နေရာယူထားသည်ဟု စုံစမ်းသိရသည်။
အလားတူ လားရှိုးမြို့နယ်တွင်လည်း အောက်တိုဘာ ၂၅ ရက် နေ့လည်ပိုင်းအချိန်က လားရှိုးမြို့ ပန်စုံကျေးရွာရှိ မွေတော်စေတီ အနီးတွင် လာရောက်စခန်းချနေသည့် ကိုးကန့်တပ်ဖွဲ့ MNDAA ကို စစ်ကောင်စီတပ်က လေကြောင်းဖြင့် ၂ ကြိမ် လာရောက် ဗုံးကြဲတိုက်ခိုက်ခဲ့ရာ မပေါက်ကွဲသေးသည့် ဗုံးသီးများ ပြန့်ကျဲနေကြောင်း သိရသည်။
လားရှိုးမြို့နယ်ရှိ ဒေသခံပြည်သူများမှာ တိုက်ပွဲထပ်မံဖြစ်ပွားမည်ကို စိုးရိမ်လျက်ရှိကာ ကျေးရွာဘုန်းကြီးကျောင်းများသို့ လာရောက်ခိုလှုံနေရသည်ဟု ဒေသခံများထံမှ သိရသည်။
လက်ရှိတွင်လည်း လားရှိုးခရိုင်အတွင်း စစ်ကောင်စီတပ်စခန်း အသီးသီးကို ညီနောင်မဟာမိတ် ၃ ဖွဲ့မှ အောက်တိုဘာ ၂၇ ရက် နံနက် ၄ နာရီအချိန်မှ စ၍ ၁၀ နာရီ အချိန်ခန့်အထိ လက်နက်ကြီး လက်နက်ငယ်များဖြင့် အပြန်အလှန် ပစ်ခတ်တိုက်ခိုက်ကြောင်း သိရသည်။
Leave a Comments