သျှမ်းပြည် ကွတ်ခိုင်မြို့နယ် နမ့်ဖတ်ကာ ရပ်ကွက် ၄ အတွင်းရှိ လူနေအိမ်ပေါ် လက်နက်ကြီး ကျရောက်ပေါက်ကွဲ မှုကြောင့် ကလေးငယ်အပါအဝင် အရပ်သား ၂ ဦးသေဆုံးပြီး၊ ၅ ဦး ပြင်းထန်စွာ ထိခိုက်ဒဏ်ရာရှိခဲ့ကြောင်း လူမှုကူညီရေးအသင်းထံမှ သိရသည်။

ယနေ့ (အောက်တိုဘာလ ၂၇ ရက်) နံနက် ၅ နာရီခွဲ ဝန်းကျင်တွင် နမ့်ဖတ်ကာ ရပ်ကွက် ၄ အတွင်းရှိ လူနေအိမ်ပေါ် လက်နက်ကြီး ကျရောက်ပေါက်ကွဲမှုကြောင့် မိသားစုဝင်များဖြစ်ကြသည့် အသက် ၇ နှစ် ကလေးငယ် အမျိုးသမီး ၁ ဦးနှင့် အသက် ၃၃ နှစ် အမျိုးသမီး ၁ ဦး သေဆုံးခဲ့သည်။

အလားတူ အသက် ၁၈ နှစ် ကလေးငယ် ၂ ဦးအပါအဝင် အမျိုးသမီး ၂ ဦးနှင့် အမျိုးသား ၁ ဦးသည်လည်း ခြေထောက်၊ ပုခုံး နှင့် ရင်ဘတ်တွင် ပြင်းထန်စွာ ထိခိုက်ဒဏ်ရာရှိခဲ့သည်ဟု ၎င်းကိုသွားရောက်ကူညီခဲ့သည့် လူမှုကူညီအသင်းမှ ပြောသည်။

“ တိုက်ပွဲတော့မဟုတ်ဘူး။ တဖက်သတ် လက်နက်ကြီးသံပါ။ မြို့ပေါ်ရပ်ကွက်ထဲမှာ လာကျတာ။ အရေးပါ်လူနာတွေ ကို လားရှိုးပို့လို့ မရဘူး။ အခု လမ်းကနေပြန်လှည့်လာရတယ်။ အရေးပါ်ကားလည်း ဖြတ်လို့မရဘူး။ အခု စစ်ဆေးခန်းမှာ ပြနေရတယ်။ လူတွေ အားလုံးအခက်ကြုံတာပေါ့ “ ဟု ၎င်းလူမှုကူညီမှု အသင်းမှ တာဝန်ခံတစ်ဦးက ပြောသည်။

အဆိုပါ ထိခိုက်ဒဏ်ရာသူများကို ဒေသအတွင်း လူမှုကူညီရေးအသင်းများက သွားရောက်ကူညီခဲ့ပြီး နမ့်ဖတ်ကာ တိုက်နယ်ဆေးရုံသို့ အရေးပေါ် ပို့ပေးဆောင်ခဲ့ကြောင်း ၎င်းကဆိုသည်။

လက်ရှိ အခြေအနေနှင့် ပတ်သက်ပြီး နမ့်ဖတ်ကာ ဒေသခံတစ်ဦးက “ အခုက လမ်းတွေမှာ လူတောင်မရှိဘူး။ အိမ်ထဲကနေ အိမ်ပြင်မထွက်ရဲကြဘူး။ နမ့်ဖက်ကာ ရပ်ကွက်ထဲထိ လက်နက်ကျတော့လူတွေက အိမ်ထဲနေလည်း မလွှတ်ဘူးဆိုတဲ့သဘောပဲ။ အခုက ဘယ်ကိုပြေးရမှန်းမသိဘူးလေ။ ကြောက်နေရတာ။ လက်နက်ကြီးသံတော့ တချက်တချက်အသံကြားနေတယ် “ ဟု ၎င်းကထပ်လောင်းပြောသည်။

ထို့အပြင် တိုက်ပွဲသည် ယနေ့ (အောက်တိုဘာလ ၂၇ ) ရက် နံနက် ၄ နာရီအချိန်မှစပြီး မူဆယ်၊ နမ့်ခမ်း၊ နမ့်ဖတ်ကာ၊ လားရှိုး၊ ချင်းရွှေဟော် စသည့်ဖြင့် မြောက်ပိုင်းဒေသနေရာများတွင် ပြိုင်တူ တိုက်ပွဲဖြစ်ပွားနေသည်။