သျှမ်းပြည် လောက်ကိုင်မြို့နယ် ချင်းရွှေဟော်မြို့တွင် ယနေ့ (အောက်တိုဘာလ ၂၇) ရက် နံနက် ၄ နာရီ အချိန်မှစပြီး စစ်ကောင်စီနှင့် ကိုးကန့်တပ်ဖွဲ့ MNDAA တို့အကြား တိုက်ပွဲခဲ့ရာ တမြို့လုံးနီးပါး ပြည်သူများ ထွက်ပြေးတိမ်းရှောင်နေရကြောင်း သတင်းသိရသည်။
“ တမြို့လုံးကတော့ ထွက်ပြေးနေပြီ၊ ချင်းရွှေဟော်မြို့ကို ကိုးကန့်တပ်က သိမ်းပိုက်နိုင်ပြီလို့ပြောတယ်။ အခုတော့ ရာဘာစိုက်ခင်းထဲမှာ ရှောင်နေကြတယ်။ တချို့ကတော့ ချောင်းကူးပြီး ဟိုဘက်ကမ်းကူးမလို့လုပ်နေတာရှိတယ်” ဟု ချင်းရွှေဟော်မြို့ စစ်ရှောင်နေသူ တစ်ဦးက သျှမ်းသံတော်ဆင့် ကိုပြောသည်။
တိုက်ပွဲအတွင်း အရပ်သားထိခိုက်မှု၊ သေဆုံးမှုကို မသိရှိသေးကြောင်း၊ သို့သော် ချင်းရွှေဟော်မြို့ရှိ အွန်လိုင်း ငွေလိမ်းဂိုဏ်း(ကျားဖြန့်)၊ ဂိမ်းဆိုင် ဝန်ထမ်းများ ထွက်ပြေးတိမ်းရှောင်နေရကြောင်း သိရသည်။
လက်ရှိ မြန်မာ-တရုတ်နယ်စပ် ချင်းရွှေဟော်မြို့ ရှိ ရေဖောင် ဆိပ် ၂ခုနှင့် နယ်စပ်ကုန်သွယ်ရေးလမ်းကြောင်း အားလုံးကို ပိတ်ထားကြောင်းလည်း ဒေသခံများက ပြောသည်။
“ နယ်စပ်ကုန်သွယ်ရေးလမ်းကြောင်းတွေပိတ်ထားတယ်။ စစ်ကောင်စီက အထိနာတော့ အခုလေကြောင်းတွေဝဲနေတယ်။ တိုက်ပွဲကတော့ ပြင်းထန်ဖို့ပဲရှိတယ်။ လောက်ကိုင်အထိလည်း ဆက်ကူးသွားနိုင်တယ်” လို့ မြေပြင် ဒေသခံ တစ်ဦးက ဆိုပြန်သည်။
ထိုတိုက်ပွဲကြောင့် အချို့ပြည်သူများသည် မည့်သည်နေရာသို့ ရှောင်ပုန်းရမည်ကိုမသိရှိသဖြင့် လယ်ယာထဲ၊ ရာဘာစိုက်ခင်းထဲတွင် ကြောက်လန့်ပြီးနေနေရသည်။
ထို့အပြင် ချင်းရွှေဟော် စစ်ဆင်းရေးတွင် စစ်ကောင်စီ တပ်သားအချို့ နှင့် လက်နက် အများအပြား သိမ်းဆည်းရမိပြီး၊ ကိုးကန့်တပ်ဘက်မှ တစ်ဦးကျဆုံး၊ ၄ဦး ဒဏ်ရာရရှိကာ အရပ်သား တစ်ဦးသေဆုံးပြီး ၅ဦး ဒဏ်ရာရရှိကြောင်း ကိုးကန့်တပ်ဖွဲ့ က ထုတ်ပြန်ထားသည်။
