သျှမ်းပြည် လားရှိုးမြို့ ပန်စုံကျေးရွာရှိ မွေတော်စေတီ အနီးတွင် လာရောက်စခန်းချနေသည့် ကိုးကန့်တပ်ဖွဲ့ MNDAA ကို စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ကြောင်း စုံစမ်းသိရသည်။
ယမန်နေ့ (အောက်တိုဘာ ၂၅ ရက်) နံနက် ၁၁နာရီခွဲကျော်တွင် လားရှိုးမြို့အနီး ကုန်းသာ၊ ပန်စုံကျေးရွာရှိ မွေတော်စေတီအနီး ကိုးကန့်တပ်ဖွဲ့ MNDAA စခန်းချနေရာကို စစ်ကောင်စီဘက်မှ လေကြောင်းဖြင့် ၂ ကြိမ်လာရောက် ဗုံးကြဲတိုက်ခိုက်ကြောင်း လားရှိုးဒေသခံတစ်ဦးက ပြောသည်။
“မနေ့က နေ့လည် ၁၁ နာရီခွဲလောက် လေယာဉ်နဲ့ ဗုံးလာကြဲတာ။ လေယာဉ်နဲ့ ၂ ခါ လာဝဲပြီး ပစ်သွားတာ။ ကိုးကန့်တပ်ဖွဲ့ MNDAA က ရွာမှာ ရောက်နေတော့ စစ်တပ်က လေယာဉ်နဲ့ ဗုံးလာကြဲတာ။ မြေပြင်မှာ တိုက်ပွဲဖြစ်တာတော့ မဟုတ်ဘူး။ ရွာမှာရှိတဲ့ မွေတော်စေတီတစ်ဝိုက်ကို ပစ်တာ၊ စေတီတစ်ဆူ ထိတယ်။ လမ်းဘေးမှာ မပေါက်ကွဲသေးတဲ့ ဗုံးသီးတွေလဲ ရှိသေးတယ်”ဟု အမည်မဖော်လိုသည့် လားရှိုးဒေသခံတစ်ဦးက သျှမ်းသံတော်ဆင့်ကို ပြောသည်။
တိုက်ပွဲတစုံတရာ ဖြစ်ပွားခြင်းမရှိဘဲ ကိုးကန့်တပ်ဖွဲ့ MNDAA စခန်းချရာ ကျေးရွာအနီးတဝိုက်ကို လားရှိုးအခြေစိုက် အရှေ့မြောက်တိုင်း စစ်ဌာနချုပ် (ရမခ) လက်အောက်ခံ ခလရ (၆၈)မှ လက်နက်ကြီးဖြင့် ၃ ခါ ပစ်ခတ်ခဲ့သည်ဟု စုံစမ်းသိရပြီး ထိခိုက်ကျဆုံးမှုကို မသိရှိရသေးပေ။
လားရှိုးမြို့ မြောက်ဘက်ရှိ ကျေးရွာများတွင် ကိုးကန့် MNDAA တပ်ဖွဲ့ အပါအဝင် မြောက်ပိုင်းမဟာမိတ် အင်အားအများအပြား ရောက်ရှိနေပြီး ဒေသခံများမှာ တိုက်ပွဲထပ်မံဖြစ်ပွားကာ စားဝတ်နေရေး အခက်အခဲဖြစ်မည်ကို စိုးရိမ်နေကြသည်။
“တိုက်ပွဲဖြစ်မှာ အရမ်းစိုးရိမ်တယ်။ ပြီးရင် အခုချိန်က ဆန်ရေစပါး ရိတ်သိမ်းတဲ့ အချိန်လဲဖြစ်တယ်၊ သီတင်းကျွတ်ပွဲလုပ်မယ့် အချိန်လဲဖြစ်တယ်ပေါ့။ ရွာသားတွေ တိုင်ပင်ကြတာတော့ ဒီနှစ် သီတင်းကျွတ်ပွဲကို မလုပ်ဖြစ်တော့ဘူး။ အဘက်ဘက်ကလဲ အင်အားတွေဖြည့်လာကြတော့ ရွာသားတွေလဲ တိုက်ပွဲဖြစ်မှာ ကြောက်တယ်။ တောင်ယာကတော့ ဘယ်လိုမှ မသွားရဲကြတော့ဘူး။ အခုတော့ မငတ်ရုံတမယ်ပဲရှိတယ်”ဟု ၎င်းဒေသခံက ဆက်ပြောသည်။
ယင်းကဲ့သို့ လက်နက်ကိုင်တပ်ဖွဲ့ဝင် စစ်သားများက သာသနာ့နယ်မြေ အနီးပတ်ဝန်းကျင်တွင် တိုက်ပွဲပစ်ခတ်မှု ဖြစ်ပွားခြင်း၊ ကျေးရွာအတွင်း လူထုနှင့်အတူ ရောနှောနေထိုင်ခြင်း တို့သည် ဂျီနီဗာ ကွန်ဗင်းရှင်း (Geneva Convention) ဥပဒေနှင့် ဆန့်ကျင်သည့်အပြင် စစ်ရာဇဝတ်မှု မြောက်သည်။
ပြီးခဲ့သည့် အောက်တိုဘာလ ၂၀ ရက်တွင် မူဆယ်မြို့နယ် နမ့်အွမ်ကျေးရွာအုပ်စု တီးမရွာအနီး တပ်စွဲထားသည့် ကချင်လွတ်လပ်ရေးတပ်မတော် KIA ၏ တပ်မဟာ ၆ စခန်းနေရာကိုလည်း စစ်ကောင်စီတပ်က ဂျက်တိုက်လေယာဉ်ဖြင့် လေကြောင်းမှ ဗုံးကြဲတိုက်ခိုက်ခဲ့သေးသည်။
Leave a Comments