သျှမ်းပြည် ကလောမြို့နယ် မြင်းမထိရွာနှင့် နန်းတိုင်းရွာကြား ကားလမ်းမပေါ်တွင် ကားတစ်စီးနှင့် ဆိုင်ကယ်တစ်စီး တိုက်မိကြရာ ဆိုင်ကယ်ယာဉ်မောင်း ၁ ဦးသေဆုံးသွားခဲ့ကြောင်း လူမှုကူညီရေးအသင်းထံမှ သိရသည်။

ယနေ့ (အောက်တိုဘာလ ၂၅) ရက် ၁၁ နာရီခွဲတွင် ကလောမြို့နယ် မြင်းမထိရွာနှင့် နန်းတိုင်းရွာကြား ကားလမ်းမပေါ် အကွေ့တစ်နေရာ၌ ကားတစ်စီးနှင့် ဆိုင်ကယ်တစ်စီး တိုက်မိကြရာ ဆိုင်ကယ်ယာဉ်မောင်း အမျိုးသား ၁ ဦး သေဆုံးသွားခဲ့ကြောင်း ၎င်းကိုသွားရောက်ကူညီခဲ့သည့် အောင်ပန်းနားရေး ကူညီမှုအသင်းမှ ပြောသည်။

“ ကျနော်တို့ကို အကြောင်းကြားလာလို့ သွားကူညီခဲ့တာ။ ယာဉ်တိုက်ထားတာတော့ တော်တော်ကြမ်းတယ်။ ဘယ်လိုတိုက်မိကြတာလဲတော့ မသိရဘူး။ ဒါပေမယ့် အဲ့မှာတော့ လမ်းအကွေ့တစ်ခုရှိတယ်။ ကွေ့ရင်း တိုက်မိကြသလားတော့ မပြောတတ်ဘူး။ ဆိုင်ကယ်ယာဉ်မောင်းတော့ ဆေးရုံအရောက်မှာဘဲ ဆုံးသွားတယ်။ ကားသမားတော့ ထွက်ပြေးသွားတယ် “ ဟု ၎င်းနားရေးကူညီမှုအသင်းမှ တာဝန်ခံတစ်ဦးက ပြောသည်။

လက်ရှိမှာ ကားတိုက်ခံရပြီး သေဆုံးသွားသည့် အမျိုးသားတစ်ဦးကို ကလောဆေးရုံ ရင်ခွဲရုံသို့ ပို့ဆောင်ခဲ့ပေးသည်။

သေဆုံးသွားသူသည် မည်သူဖြစ်ကြောင်း မသိရှိရသေးဘဲ ၎င်းနှင့်နီးစပ်သူ မိသားစုထံသို့ ဆက်သွယ်ရန် ကြိုးစားနေကြောင်း ၎င်းကဆိုသည်။

ထို့အပြင် အောက်တိုဘာလ (၁ ရက်နေ့မှ ၂၅ ရက်) အထိ ကလောမြို့နယ်နှင့် အောင်ပန်းမြို့နယ်အတွင်း စုစုပေါင်း ယာဉ်တိုက်မှု ၈ ကြိမ်ဖြစ်ပွားခဲ့ပြီး လူ ၁ ဦးသေဆုံးကာ ၂၄ ဦး ထိခိုက်ဒဏ်ရာရရှိခဲ့ကြောင်း နားရေးကူညီမှုအသင်းမှ သွားရောက်ကူညီခဲ့သည့် မှတ်တမ်းအရ သိရသည်။