သျှမ်းပြည် တောင်ကြီးမြို့နယ်ရှိ စစ်ရှောင်များဆောက်လုပ်ထားသော စာသင်ဆောင်နှင့် ဘုရားကျောင်းဆောင်များကို ဖြိုချရန် အတွက် စစ်ကောင်စီနှင့် ပအိုဝ်းပြည်သူ့စစ် (PNO) တို့က ဖိအားပေးကြောင်း စုံစမ်းသိရသည်။
အဆိုပါ စစ်ရှောင်များ၏ စာသင်ဆောင်နှင့် ဘုရားကျောင်ဝတ်ပြုသည့်နေရာကို PNO နှင့် စစ်ကောင်စီဖိအားကြောင့် စက်တင်ဘာလပိုင်း ဖြိုချခဲ့ကြောင်း တောင်ကြီးမြို့ ထဲက စစ်ရှောင်တစ်ဦးက သျှမ်းသံတော်ဆင့်ကိုပြောသည်။
တောင်ကြီးမြို့သို့ ပြောင်ရွှေ့ စစ်ရှောင်လာသည့် သူများသည် ဖယ်ခုံနှင့် မိုးဗြဲဒေသ မှ ဖြစ်ပြး၊ အများစုသည် ခရစ်ယာန်ဘာသာဝင်များဖြစ်သည်။
ထို့ကြောင့် ၎င်းတို့ လက်ရှိနေထိုင်ရာ စစ်ရှောင်အတွင်း ကိုယ်ထူကိုယ်ထဖြင့် ဆောက်လုပ်ထားသော ကလေးများစာသင်ရန် နှင့် ဆုတောင်းရန် အဆောက်အဦးကို ဖျက်သိမ်းရန်ပြောခဲ့ကြောင်းသိရသည်။
“ဖျက်ခိုင်းတာက စက်တင်ဘာလလောက် ကတည်းပေါ့။ ဖျက်ခိုင်းရတဲ့ အကြောင်းအရင်းကတော့ လူစုလူဝေးမလုပ်စေချင် တာလို့ပြောတယ်။ လူစုပြီး စာသင်ကြားတာတွေ ဆုတောင်းရှိခိုးတာတွေ မလုပ်ဖို့လည်း တားမြစ်ထားတယ်။ ကလေးတွေ စာမသင်ရဘူး” ဟု စစ်ရှောင်တစ်ဦးက ပြောသည်။
အဆိုပါ စစ်ရှောင်စခန်းများတွင် ဖယ်ခုံ၊ မိုးဗြဲနှင့် လွိုင်ကော်မှ စစ်ရှောင်လာသူ (၅၀၀၀)ဝန်းကျင်ရှိပြီး၊ ထိုစခန်းတွင် တစ်နှစ်ကျော်ကြာ နေလာပြီဖြစ်ကြောင်းသိရသည်။
ထိုစစ်ရှောင်စခန်းအတွင်း အဆောက်အဦးသစ်များ မတည်ဆောက်ရန် ယခုနှစ် ဇူလိုင်လ တွင် စစ်ကောင်စီမှ သတိပေးစာများ ကပ်ခဲ့ပြီး၊ ထိုသတိပေးစာထဲတွင် အစိုးရမြေပေါ် တရားမဝင် လူနေအိမ်ဆောက်လုပ်လျက်တွေ့ရှိရသဖြင့် ၎င်းမြေပေါ်တွင် လက်ရှိနေထိုင်းခြင်းမပြုရ၊ ပြောင်းရွှေ့ရန် ရေးသားထားသည်။
“ သူတို့ (စစ်ကောင်စီ) ခွင့်ပြုချက်မရဘဲ အိမ်ဆောက်တာတွေလုပ်တော့ ပေးမနေတဲ့ပုံစံမျိုးပေါ့။ ကျမတို့က ဒီမှာမနေရင် ဘယ်ကို သွားနေရမှာလဲ။ အိမ်လည်းပြန်လို့မရဘူးလေ။ အလုပ်ကလည်းမရှိတော့ အိမ်ငှားနေလို့မရဘူး” ဟု စစ်ရှောင် အမျိုးသမီးက ထပ်လောင်းပြောသည်။
လက်ရှိအချိန်ထိ ကရင်နီ (ကယား)ပြည်တွင် ပြည်သူ့ကာကွယ်ရေးတပ်မတော် (PDF) တပ်များနှင့် စစ်ကောင်စီတို့ တိုက်ပွဲ ဆက်လက်ပြင်းထန်ပြီး စစ်ရှောင်များ ယနေ့အချိန်ထိ နေရပ်ပြန်ရန် ခက်ခဲနေသေးကြောင်း သိရသည်။
Leave a Comments