သျှမ်းပြည် ဆီဆိုင်မြို့ရောက် စစ်ရှောင်များသည် နေရပ်သို့ပြန်နေစဉ်အတွင်း လမ်း၌ မြေမြုပ်မိုင်းနင်းမိခြင်းနှင့် နေအိမ် ဖောက်သွင်းခံရမှုများ ကြုံတွေ့နေရကြောင်း စစ်ရှောင်တစ်ဦးက ပြောသည်။
ပြီးခဲ့သည့် သြဂုတ်လမှ အောက်တိုဘာလအထိ စစ်ရှောင်များသည် မူလနေရပ် ဒီးမော့ဆိုမြို့နယ် ကျေးရွာနေအိမ်သို့ ပြန်သွားပြီး ပစ္စည်းယူနေစဉ် မြေမြုပ်မိုင်းများကြောင့် အမျိုးသား ၁ ဦးသေဆုံးကာ၊ အမျိုးသမီးအပါအဝင် ၃ ဦးထက်မနည်း ထိခိုက်ဒဏ်ရာရရှိခဲ့ကြောင်း ဒီးမော့ဆိုစစ်ရှောင်တစ်ဦးက ပြောသည်။
“ အရင်တလောတုန်းက အုပ်စုလိုက်နေရပ်ကို ပြန်ကြည့်တယ်။ လူဦးရေအတိအကျနဲ့ ကားနံပါတ်ကို စစ်တပ်ကို အကြောင်းကြားရတယ်။ တချို့လည်း မိုင်းနင်းမိတယ်။ ထော်လာဂျီနဲ့ ပြန်ကြတာ။ မိုင်းနင်းမိတာတော့ နှစ်ခါ၊ သုံးခါ ရှိပြီ။ အမျိုးသား တစ်ယောက်ကတော့ ဆုံးသွားတယ် “ ဟု ၎င်းစစ်ရှောင် အမျိုးသမီးတစ်ဦးက ပြောသည်။
ထွက်ပြေးတိမ်းရှောင်ခဲ့စဉ်က စစ်ရှောင်များသည် သိုလှောင်ထားသော ဆန်အိတ်များ၊ စပါးများ နှင့် အိမ်သုံးပစ္စည်းများကို ယူဆောင်ထွက်ပြေးမရခဲ့သဖြင့် ယခုလို တိုက်ပွဲငြိမ်သက်သည့် ကာလအတွင်း စွန့်စားပြီးနေရပ်ပြန်ချိန် မြေမြုပ်မိုင်းနင်းမိ ကြောင်း သိရသည်။
နေရပ်ပြန်သွားသည့် စစ်ရှောင်များ၏ ပြောပြချက်အရ မြေမြုပ်မိုင်းများသည် တောင်ယာစိုက်ခင်း၊ လူသွားလမ်းနှင့် ဘုရားကျောင်းဝိုင်းထဲတွင် တွေ့ရကြောင်း ဆိုသည်။
ထို့အပြင် နေအိမ်များသည်လည်း ဖောက်သွင်းခံရပြီး အိမ်သုံးပစ္စည်းများ ခိုးယူခံရသည့်အပြင် နေအိမ်ထဲ မူးယစ်ဆေးဝါးသုံးစွဲသူ၊ သူခိုးများက လာရောက်နေထိုင်ကြောင်း အသက် ၃၅နှစ်အရွယ် စစ်ရှောင်တစ်ဦးက ဆက်ပြောသည်။
“ သူခိုး၊ ဓားပြတွေတောင် အိမ်ထဲဝင်နေတယ်။ “ ငါ့အိမ်ကိုငါပြန်လာကြည့်တာ “ လို့ သူတို့ကို ပြောရသေးတယ်။ မီးကြိုးတွေ၊ မီတာပေါက်တွေ၊ ရေစုပ်စက်နားက မော်တာတွေလည်း အကုန်ဖြုတ်ခံထားရတယ်။ အိမ်ဆောက်ဖို့ သစ်တွေတောင်အကုန် ယူသွားတယ်။ တချို့ချန်ထားဆိုင်ကယ်တွေလည်း တစ်စီးမှ မကျန်ဘူး “ ဟု ၎င်းကထပ်လောင်းပြောသည်။
ထို့ကြောင့် စစ်ရှောင်များအနေဖြင့် နေရပ်သို့ ပြန်ပြီး ပစ္စည်းသယ်ယူခြင်း မပြုလုပ်ကြရန် ပြည်သူ့ကာကွယ်ရေးတပ် PDF မှ သတိပေးထားသည်။
တိုက်ပွဲကြောင့် ၂ နှစ်ကျော်ကြာ ဆီဆိုမြို့နယ်အတွင်းသို့ ထွက်ပြေးတိမ်းရှောင်လာကြသည့် စစ်ရှောင်များသည် ဖယ်ခုံ၊ မိုးဗြဲ၊ ဒီးမော့ဆို၊ ဖရူဆို၊ မယ်စဲ့နှင့် လွိုင်ကော် စသည့်မြို့မှ စစ်ရှောင်ဦးရေ ၆ ထောင်ကျော် ရှိကြောင်း သိရသည်။
Leave a Comments